Vygiiben 9 - Biblija - Pe Baltitko Romani čib (Romanes) 2019

Pándžto Bida

¹ I phendiá Raj Devél Mojzáske: “Džá ke faraóno i phen léske: ‘Adiáke rakiréla Raj Devél, Devél Judéngiro’: ‘Otmek Miré manušén, sob (kaj) jone te kerén Mánge patýv.

² Ne, kóli tu na zakamesa te otmekes len, i duredýr javésa len te rikires,

³ to tedy, ĥáda, Ráskire-Devléskiro vast javéla pe tyré kheritkoné murdalénde (pe skoto), savó isyn pe félda, pe grénde, pe oslende, pe vierbliudende, pe guruvende i bakrende; javéla dukh ke meribén drieván pharí;

⁴ i roskerela Raj Devél Izrailjoskire kheritkoné murdalén (skoto) Jegiptóskire murdaléndyr, i saré Izrailjoskire čhavéngire-murdaléndyr na meréla (muljola) ničí.’”

⁵ I uphendia Raj Devél časo, pheny: “Atasiá Raj Devél keréla davá pe daja phuv.”

Šóvto Bida

⁶ I kerdiá davá Raj Devél pe javír dyvés, i vymyne saré Jegiptóskire kherítka murdalá; Izrailjoskire-čhavéngire kheritkoné murdaléndyr (skotóstyr) nijékh na mulyja.

⁷ Faraóno bičhadiá te udžinel, i ĥáda, Izrail'tianengire kheritkoné murdaléndyr na mulyja nijékh. Ne iló faraonóskiro jaciá syr bar, i jov na otmekciá manušén.

⁸ I phendiá Raj Devél Mojzáske i Aaronóske: “Len pherdý burnyk (žmienia) bovestyr práska (pieplo), i mek te čhurdel la Mójza ke bolybén dre faraonóskire jakhá;

⁹ i ĥazdélape pylo pir sarí Jegiptóskiri phuv, i javéla pe manušénde i pe kheritkoné murdalénde šuvlypen čyl'čakenca (naryvenca), pe sarí Jegiptóskiri phuv.”

¹⁰ Jone lyné bovestyr práska, i terdiné angíl faraonóskiro muj. Mójza čhurdyjá la ke bolybén, i kerdiápe šuvlypen čyl'čakenca pe manušénde i pe kheritkoné murdalénde.

¹¹ I na mogindlé čovahane te vyrikiren angíl Mojzaste pir šuvlypnaskiri pričyna, pal-dová so šuvlypen sys pe čovahanende i pe saré Jegiptianende.

¹² O Raj Devél pharjakirdia iló faraonóskiro, i jov na kandyjá len, syr i rakirdiá Raj Devél Mojzáske.

Eftáto Bida

¹³ I phendiá Raj Devél Mojzáske: “Atasiá uštý tasiárles (ránes), i jav angíl faraonóskiro muj, i phen léske: ‘Adiáke rakiréla Raj Devél, Devél Judéngiro: Otmek Miré manušén, sob (kaj) jone te kerén Mánge patýv;

¹⁴ pal-dová so davá mólo Me bičhaváva saré Miré meribnytka fránsy (jazvy) dro tyró iló, i pe tyré dynar'jende, i pe tyré manušénde, sob (kaj) tu te džinés, so nane adasaves, syr Me som, pir sarí phuv;

¹⁵ adiáke, syr Me te čhuvav Miro vast, tedy te nasvaliakirav tut i tyré manušén meribnytkone fransenca (jazvasa), i tu javésa te xasjos phuvjátyr:

¹⁶ ne vaš davá Me tut zrakhcjom, sob (kaj) te sykavav pe túte Mirí zor, i, sob (kaj) te javél Miro lav vyphendlo pir sarí phuv;

¹⁷ tu iščo (inké) san proti Miré manušénde, sob (kaj) te na otmekes len,

¹⁸ Ĥáda, Me atasiá bičhaváva, dre davá-pac' časo grado drieván baró, savó nijékhvar na sys dro Jegípto léskire javibnaskire dyveséstyr ke davá časo;

¹⁹ i adiáke bičháv te skedén tyré stády i saró, so isyn túte pe félda: pe saré manušénde i kheritkoné murdalénde, savé jačénape pe félda i na skedénape dre kherá, peréla grado, i jone meréna.’”

²⁰ Odolé-faraonóskire pishar'jendyr, savé strahádyne Ráskire-Devléskire lavéndyr, sýges skedyné péskire pishar'jén i péskire stády dre kherá;

²¹ a kon na riskirdiá péskiro iló ke Ráskire-Devléskiro lav, odová mekciá peskiren pishar'jén i péskire stády pe félda.

²² I phendiá Raj Devél Mojzáske: “Ĥazde vast tyró ke bolybén, te džal grado pe sarí Jegiptóskiri phuv, pe manušénde, pe kheritkoné murdalénde, i pe sarí čar feldytko pe Jegiptóskiri phuv.”

²³ I ĥazdyjá Mójza péskiro destó ke bolybén, i Raj Devél kerdiá gromo i grado, i jag rosčhuvelape pir phuv, i bičhadiá Raj Devél grado pe Jegiptóskiri phuv;

²⁴ i sys grado i jag maškirál grado, drieván zoraló grado, savó na sys pir sarí Jegiptóskiri phuv dolé časostyr, syr jaciá džiibén pe láte.

²⁵ I vymardia grado saró pir Jegiptóskiri phuv, so sys dre félda, manušéstyr ke kherítka murdalá, i sarí čar feldytko vymardia grado, i saró veš pe félda vyphagirdia.

²⁶ Pe jekh Giesiemoskiri phuv, kaj dživdé Izrailjoskire čhavé, na sys grado.

²⁷ I bičhadiá faraóno, i khardiá Mojzás i Aaronós, i phendiá lénge “Davá mólo me kerdjom grého; Raj Devél isyn čačunó, a me i miré manušá sam bangé;

²⁸ mangénpe Ráske-Devléske: mek te pirijačen Ráskire-Devléskire grómy i grado; i me otmekáva tumen, i me na javáva butýr te zarikirav.”

²⁹ Mójza phendiá léske: “Syr syg me vydžava foróstyr, i ĥazdáva miré vastá ke Raj Devél; to grómy pirijačena, i grado butýr na javéla, sob (kaj) tu te udžines, so phuv isyn Raskiri-Devléskiri;”

³⁰ ne me džinóm, so tu, i tyré pishárja iščo (inké) na daréna Rástyr-Devléstyr.

³¹ Ljono (ĥandlado) i jačmienjo (ĥersto) sys vymarde, pal-dová so jačmienjo (ĥersto) vykolosindiape, a ljono dyjá siemi;

³² a parnó giv i giv (polba) na vymarde, pal-dová so jone sys pozdnia (korigitka).

³³ I vygijá Mójza faraonostyr i foróstyr, i ĥazdyjá péskire vastá ke Raj Devél, i pirijaciá gromo i grado, i bryšýnd pirijaciá te čhuvelpe pe phuv.

³⁴ I dykhciá faraóno, so pirijaciá bryšýnd i grado i gromo, i durydyr griešyndia, i kerdiá kokoró pharó péskiro i pishar'jengiro iló.

³⁵ I jaciá pharedyr faraonóskiro iló, i jov na otmekciá Izrailjoskire čhavén, syr i rakirdiá Raj Devél pir Mojzaste.