Vygiiben 4 - Biblija - Pe Baltitko Romani čib (Romanes) 2019

Dívna ĥiertyká vaš Faraonóske

¹ I otphendiá Mójza i phendiá: “A kóli jone na patiána mánge, i na šunéna mirí zan, i phenéna: ‘Na sykadyjá túke Raj Devél?’”

² I phendiá léske Raj Devél: “So davá isyn dro vast túte? Jov otphendiá: “Destó.”

³ Raj Devél phendiá: “Čhurde les pe phuv.” Jov čhurdyjá les pe phuv, i destó risijá dre sapeste, i prastándyja léstyr.

⁴ I phendiá Raj Devél Mojzáske: “Ĥazde tyró vast i le les pal pori.” Jov ĥazdyjá péskiro vast i lyjá les; i jov jaciá destesa dro léskiro vast.

⁵ Ake, vaš dová, sob (kaj) te patián, so sykadyjá túke Raj Devél, Devél léngire-dadéngiro, Avraamóskiro Devél, Isaakoskiro Devél i Jakovóskiro Devél.”

⁶ Iščo phendiá léske Raj Devél: “Čhuv tyró vast ke pe pal brek.” I jov čhudiá péskiro vast ke pe pal brek, vylyja les, i ĥáda, léskiro vast parnyja prokazatyr, syr iv.

⁷ Iščo phendiá: “Čhuv nevéstyr (nevés) tyró vast péske pal brek.” I vylyja les pal péskire brekatyr, i ĥáda, jov nevéstyr jaciá dasavo, syr léskire masá.

⁸ Kóli jone na patiána túke, i na šunéna zan anglatuné dophenybnaske, tedy javéna te patián glosake javire dophenybnaske;

⁹ kóli na patiána i dalenge dujenge dophenybnenge i na šunéna tyrí zan, tedy le rekátyr (leniátyr) paní i vyčhuv pe phuv; i paní lyny rekátyr (leniátyr), kerélape ratésa pe phuv.

¹⁰ I phendiá Mójza Ráske-Devléske: “O, miro Rajo Dévla! Manúš me na som rakiribnytko, i adasavó sómas i atasiá, i tríto dyvés, i kiéli Tu jacián te rakirés Tyré dynarisa: me pharés rakiráva i namištes.”

¹¹ I Raj Devél phendiá: “Kon dyjá uštá manušéske? Kon keréla manušés bičibakiresa, ci kašukesa, ci dykhibnytkonesa, ci kororesa? Ci na Me som Raj Devél?

¹² I adiáke džá, i Me javáva pašýl tyré uštá, i vysykliakirava tut, so túke te rakirés.”

¹³ Mójza phendiá: “Rajo Dévla! Bičháv javirés, konés moginésa te bičhaves?”

¹⁴ I zahačíia xolý Devléskiri pe Mojzaste, i Jov phendiá: “Naúšto nane túte Aaronós pšalés, Lievitianinos? Me džinóm, so jov moginéla te rakirél, ĥáda, jov vydžála angíl túke, i, dykhéla tut, obradynelape dro péskiro iló;

¹⁵ tu javésa te rakirés léske i te čhuvés lavá dre léskire uštá, a Me javáva pašýl tyré uštá i pašýl léskire, i Me javáva te sykliakirav tumen, so tuménge te kerén;

¹⁶ i javéla jov te rakirél zamiést túte manušénge; i adiáke jov javéla tyré ušténca, a tu javésa léske zamiést Devléste;

¹⁷ i le destó davá dro tyró vast: lésa tu javésa te kerés znamiénii (ĥiertyká).”

Mójza Džála ke Jegípto

¹⁸ I gijá Mójza, i risijá ke Ioforo, péskiro sastro, i phendiá léske: “Džáva me, i risjováva ke miré pšála, savé isyn dro Jegípto, i podykhava, ci džidé jone isyn?” I phendiá Ioforo Mojzáske: “Džá ramanjosa (mirósa).”

¹⁹ I phendiá Raj Devél Mojzáske pe Madiamoskiri phuv: “Džá, risjov dro Jegípto, pal-dová so myné saré, savé rodyne tyró iló.”

²⁰ I lyjá Mójza peskirjá romniá i péskire čhavén, čhudiá len pe osloste, i gijá pe Jegiptóskiri phuv. I Devléskiro destó Mójza lyjá dro péskiro vast.

²¹ I Raj Devél phendiá Mojzáske: “Kiéli tu džása i risjosa dro Jegípto, dykh, saré dívy, savé Me dyjom te kerés túke, ker len angíl faraonoste, a Me xoliakirava léskiro iló, i jov na otmekéla manušén.

²² I phen faraonóske: ‘Adiáke rakiréla Raj Devél: “Izrailjo isyn Miro čhavó, anglatunó Miro;

²³ me rakiráva túke: ‘Otmek Miré čhavés, sob (kaj) jov te dynarinél Mánge;’ a kóli na otmekesa les, tedy, ĥáda, Me zamarava tyré čhavés, anglatunes tyrés.’”

²⁴ Dromésa pe rat'kiriben kerdiápe, so streindia les Raj Devél, i kamdiá te muliakirél les.

²⁵ Tedy Siepfora, lyjá čhuri barestyr, občhindia jagóro (krajo) péskire-čhaveskiri loč (plot'), i, čhurdyjá les ke léskire ĥerá, phendiá: “Tu san rateskiro ternó mánde.”

²⁶ I otgijá léstyr Raj Devél. Tedy phendiá joi: ‘Rateskiro’ ternó – pir občhinyben.”

²⁷ I Devél phendiá Aaronóske: “Džá pe čhučí phuv gil Mojzáske. I jov gijá, i strenindiape lésa pašýl Devléskiri bérga, i čamudia les.

²⁸ I piriphendia Mójza Aaronóske saré Devléskire lavá, Savó les bičhadiá, i saré dívy, savé Jov uphendia.

²⁹ I gijá Mójza Aaronosa, i skedyné jone sarén Izrailjoskire-čhavéngire barydyrén,

³⁰ i piriphendia Aaróno saré lavá, savé rakirdiá Devél Mojzáske, i kerdiá Mójza dívy angíl manušéngire jakhá,

³¹ i patiandyné manušá; i šundlé, so Raj Devél sys ke Izrailjoskire čhavé i dykhciá léngire mén'ki i terdiné jone pe čangá i poklonindlepe.