Софония 3 - Biblija - Pe Baltitko Romani čib (Romanes) 2019

Fuj Jerusalimo

¹ Bida pe davá fóro, dro savó manušá buntuinena proti Devléste i, savénge naštý te dopatias, savé pritasavéna javirén.

² Dro davá fóro na kandéna zan Ráskire-Devléskiri, na kaména, sob (kaj) Jov te pirisykliakirel len. Adalé manušá na dopatiana Ráske-Devléske, jone na džána pašyledýr ke Devél.

³ Léskire thagárja (kniázi) maškír lénde isyn sýrby ščerá (lievy), so rykinena; léngire sendárja isyn sýrby bel'velitka ruvá, savé na jačkirena ni jekh kokalkico vaš atasiatuno dyvés.

⁴ Léskire proróki isyn balvalitka, savénge naštý te patias, léskire rašaja magirena svénto štéto; jone phagirena Mojzáskiro Zakóno, syr kaména.

⁵ Ne čačipnáskiro Raj Devél isyn maškír davá fóro, Jov na keréla pir načačipén. Kažno zlóko Jov janéla Péskiro čačipén pe dud, les uhtýlla (dósi): ne načačune manušá na džinéna ladžaipén.

⁶ “Me xasiakirdjom manušýtka nácyi (narody)”, – rakiréla Raj Devél, – “léngire zoralé vánty fenštrorenca phagirdé dre ruíny; Me kerdjom adiáke, so pe léngire vulícy (gásy) jaciá čhučó, i nikón na džála pašýl. Léngire fórja isyn phagirdé, so nijékh manúš nane, so nijékh manúš na dživéla”.

⁷ Me phendjom foróskire manušénge: “Čačes, tumé féni (tóka) darén Mándyr, sob (kaj) Me te pirisykliakirav tumen”, sob (kaj) tumaré kherá te na javén xasiakirdé, sob (kaj) Me na sendiakirav pharés tumen. Ne jone tasiárles (ránes) uštyné, i kerdé saró bipatyvakires.

Patiaibnaskiro Otiačaiben Manušéngiro

⁸ “Paldavá užakiren Man”, – rakiréla Raj Devél, – “ke/ žýko davá dyvés, dro savó Me javáva te bangiakirav. Miro priphenybén isyn dasavo, sob (kaj) te kedav khetané kralipená te vyčhuvav pe lénde Mirí xolý, sarí Mirí bari xolyn; pal-dová so Miré-zevlynypnaskiri jag pohala sarí phuv.

⁹ Tén'ci Me dáva pale manušénge žužé (čysta) uštá i godý, sob (kaj) jone moginénas te kharén lav Ráskire-Devléskiro, te dynarinén Léske dro jekh psikó.

¹⁰ Duripnastyr pal réki (leniá) dre Jefiopija, Miré mangipnaskire (poklonniki), Miré čhaja Miré rosčhurdyne manušéndyr, janéna Mánge svénta dyibená.

¹¹ Dro dová Dyvés tumé, Miré manušále, na javéna te ladžan ni savé tumaré rendéndyr, dre savé tumé kerdé čoripén proti Mánde; adiáke, syr tén'či Me láva krig tumaré maškiralypnastyr kodolén, kon drieván radynélape péskire phut'kiribnastyr, i butýr tumé na javéna te zadenpe pe Mirí svénto bérga.

¹² I Me mekava maškír tuménde kovlé-iléskire i naphut'kirde manušén, i jone javéna te dopatian dro lav Ráskire-Devléskiro.

¹³ Manušá, kon jaciápe Izrailjostyr, na javéna te kerén načačipén i te rakirén xohaibén, i na lathelape xohany čib dro léngiro muj. Jone javéna te čaravenpe i te pasjon, i nijékh na javéla te trašavel len.

Rádyma Devléskire Laskatyr

¹⁴ Rádynpe i bága, čhájo Sionóskiri! De gódla, o Izrailie! Drieván rádynpe i ker rádyma péskire ileske, o čhaj Sionóskiri!

¹⁵ O Raj Devél lyjá krig pharó séndo pe túte, Jov tradyjá krig tyré vergos. Králi Izrailjoskiro, o Raj Devél isyn maškír tuménde, tumé butýr na javéna te dykhén bari bibáht.

¹⁶ Dro dová dyvés javéla phendló Jerusalimoske: “Na dar, Sióno, mek te na perén telé tyré vastá syr bizorjákire”.

¹⁷ O Raj Devél, tyró Devél, isyn túsa, Jov isyn Zoralypnaskiro te zrakhél tut; Jov javéla drieván te radynélpe radymása, Jov déla ramánjo (miro) túke Léskire laskatyr, Jov javéla te radynélpe tútyr viesjolymasa (lošasa).

¹⁸ “Me javáva te skedav len”, – rakiréla Raj Devél, – “savé tuginena pal uphendle svénki, kon isyn maškír tuménde, pe savénde bang isyn syr ĥámo.

¹⁹ Ake, dre davá časo Me roskedavape kodolenca sarénca, Kon pritasadia tumen, Me zrakháva langalen, i Me kedava khetané adalen, savé tradyne krig. Me barjakirava i Me dáva patýv lénge pe kažno phuv, pe saví ladžakirdé len.

²⁰ Dro davá časo Me janáva tumen pale, i adiáke-pac' Me skedáva tumen. Me dáva patýv tuménge i ĥazdáva tumen maškír saré manušénde pe phuv, kiéli Me janáva pale tumaré plienonen angíl tumaré jakhá”, – phendiá Raj Devél.