Pritčy 9 - Biblija - Pe Baltitko Romani čib (Romanes) 2019

Godypén i Dylnypén

¹ Godypén čhudiá péskiro kher, jov vyčingirdia péske eftá (bitrinéngiro deš) stýlby;

² jov čhindiá péskire murdalén (žyvotnonen), jov zmiešyndia péskiri mol (vino), jov adiáke-pac' kerdiá péskiro skamínd (xabén).

³ Godypén bičhadiá angíl péskire dynaricen, jov kharéla ke pe naj vučedyršone šteténdyr dro fóro:

⁴ “Kon isyn nabaré – godiákiro, risjov adarík.” Odoléske, savó but na ĥaljola, godypén phendiá:

⁵ “Javén, xan miro maró i p'jen mol (vino), saví me zmiešyndjom.

⁶ Mekén dylnypén, sob (kaj) te dživén, psirén god'varé dromésa.”

⁷ Manúš, kon sykavéla bang javire manušéske, savó sykavéla napatyv ke javír manušá, priléla ladžaipén pe péste; kodová manúš, kon bangiakirela čoré manušés, doreséla doš péske.

⁸ Na sykáv bang kodoléske, savó sykavéla napatyv ke javír manušá, sob (kaj) jov te na bidykhel tut: sykáv bang godé manušéske i jov javéla te sykavél patýv túke.

⁹ Podsykliakir godé manušés, i jov javéla godedyr, sykliákir čačuné (vorte) manušés i léste javéla butedýr džinybén.

¹⁰ Angledýr trej te dares Rástyr-Devléstyr, sob (kaj) te javes godó: i džinybén pal Sventoné Raste-Devléste, déla xor rozlyiben (rozĥalyiben).

¹¹ Me, godypén Rástyr-Devléstyr, davá butýr dyvesá túke te dživés, i davá butedýr beršá ke tyró džiibén.

¹² Kóli tu san godó, tu san godó vaš péske, kóli tu sykavesa bipatyv ke manušá, tu kokoró javésa te tugines (te piridžives) pal davá.

¹³ Dylynin'ko džuvlý nahrates rakiréla; joj isyn prostone-godiakiri, i na džinéla nisó.

¹⁴ I joj isyn bešty pašýl vudár lákire kheréskiro, ci pe banko pe vučé štéty dro fóro,

¹⁵ sob (kaj) te kharel ke pe odolén, savé džána pašýl, savé džána mamúj péskire dromésa:

¹⁶ Kon isyn nabaré-godiákiro, risjov adarík. Kodoléske, savó nábut ĥaljola, joj rakiréla:

¹⁷ “Čordo paní isyn gudló, i maró, savó xána čorahanés, isyn drógo.”

¹⁸ Ne kadalé manušá na džinéna, so myné manušá, kon gijá ke joi, so lákire gosti isyn xor pašté dro liúno (ado).