Pritčy 8 - Biblija - Pe Baltitko Romani čib (Romanes) 2019

Godypén isyn Kučedyr Saréstyr

¹ Ci godypén na déla gódla zoralés? Ci ĥalyibén na ĥazdéla péskiri zan?

² Godypén isyn terdó pe sámo vučó štéto pe vučipená, pašýl drom, pe trušulytka dromá.

³ Godypén déla gódla portatyr (vratendyr), syr te džas andré dro fóro, kiéli džása pirdál vudár:

⁴ “O muršale. Me kharáva tumen; i mirí zan (glos) kharéla tumen, manušéngire čhavé:

⁵ Tumé, prostone-godiakire, sykljon te javén baré-godiakire! Tumé, dylynin'ka, sykljon te javén godé.

⁶ Šunén! Me javáva te rakiráv naj fededýr lavá, i miré uštá phenéna jekh čačipén.

⁷ Pal-dová so miré-moskiro taloj (njobo) phenéla patiaibén, fuipén isyn džungaló (brydko) uštenge.

⁸ Saré lavá miré móstyr isyn čačipnaskire, ni savó xohaibén, ci čoripén pefromi (naročnes) nane dre miré lavá.

⁹ Len prostes te ĥaljon, jone isyn čačuné odolénge, savé džinéna pal davá.

¹⁰ Šunén, so me sykliakirava, savó vaš tuménge isyn fedýr rupéstyr, i vykedeno džinybén vaš tuménge isyn drogedyr čikade suvnakástyr.

¹¹ Pal-dová so godypén Devléstyr isyn fedýr rubinendyr, i saró, so manúš kamdiá, naštý te priparuves (te priravnines) ke godypén.

¹² “Me, godypén Devléstyr, dživáva baré godiása, mánde isyn džinybén, sob (kaj) xor te rozlav (te rozĥaljovav).

¹³ Sob (kaj) te des patýv ke dar Ráske-Devléske, trej drieván te na kames fuipén, phut'kiribén, i odolén, kon pes barjakiréla, čoré réndy (diély) i, kon pefromi rakiréla čoripén – me drieván na kamám.

¹⁴ Me dáva godý i čačunó godypén: mánde isyn xor ĥalyibén i mánde isyn zor.

¹⁵ Mánca králja kralinena; theméskire barydyrá (viel'možy) keréna čačuné statúty (ustavy).

¹⁶ Mánca thagárja rikiréna zor, i baré rajo, i saré sendárja pe phuv.

¹⁷ Me kamám te sykavav patýv odolénge, savé sykavav patýv mánge, i kodolé, kon dobusoves rodéla man, jone lathéna man.

¹⁸ Mánde isyn barvalypena i patýv; drógima, saví na xasjola, čačipén;

¹⁹ mánde barjakirdó (plódo) isyn fedýr čikade rupéstyr i mándyr l'góta butýr čikade (vykedyné) rupéstyr.

²⁰ Me psirava čačuné droménca, maškír dromore, kaj isyn čačipén,

²¹ sob (kaj) mánge te keráv adiáke, sob (kaj) odolé, savé kaména man, te doresen meknó mištypén; sob (kaj) me te pherdiakirav léngiri piralý (sokroviščnica).

²² Raj Devél sozdyjá man dro sámo anglypén, angíl, syr Jov sozdyjá saró ĥarym ĥará.

²³ Me, godypén, sómas pomakhno samone viekendyr, anglypnástyr, angíl dová, syr phuv sys čhudý.

²⁴ Kiéli iščo (inké) na sys xor štéty, Me lotijom (bijandyjom), i kiéli iščo (inké) na sys panieskire ĥanyngorja pherdé paniésa:

²⁵ angíl dová, syr bérgi sys začhude, angíl dová, syr sys bérgicy, me ŭže lotijom (bijandyjom);

²⁶ angíl dová, syr Raj Devél sozdyjá phuv, ci féldy, ci pérva prahitka častyra (časticy) dro svéto (lot).

²⁷ Kiéli Jov kerélas bolybén, me, godypén, sómas odój; kiéli Jov prolydžija krugo uprál xore šteténdyr:

²⁸ kiéli Jov čhudiá óbloki upralestyr, kiéli Jov zorjakirdia panieskire ĥanyngorja xore šteténdyr;

²⁹ kiéli Jov uphendia morjoske kustýk, sob (kaj) paniá te na pirithaden léskiro priphenybén; kiéli Jov čhudiá phuvjákiro fundámiento;

³⁰ tén'či me, godypén, sómas, pašýl Ráskire-Devléskiri rig, syr Léskiro pomogibnaskiro dre butý: Jov radynelaspe mándyr; me sómas usady (sak) bahtaló angíl Léste.

³¹ Me bahtalyjom dre Léskire-phuvjákiri paš, i me, godypén, zoralés radyndjompe manušéngire čhavénca.

³² I akaná, čhavé, šunén man, pal-dová so bahtalé isyn odolé, savé džána pir miré dromá:

³³ šunén, so me sykliakirava, i javén godé i na vyčhurden iléstyr miré lavá.

³⁴ Bahtaló isyn odová manúš, savó kandéla man; savó dykhéla ciamkes so dyvés pašýl mirí pórta; savó užakiréla pašýl vudará.

³⁵ Manúš, savó lathéla man – godypén, lathéla džiibén i Raj Devél javéla te bahtiakirél les;

³⁶ ne manúš, kon bistrela pal mánde, kodová keréla čoripén péskire dieske; saré, konéske me na som pir iló, sýrby užakiréna meribén.