Pritčy 7 - Biblija - Pe Baltitko Romani čib (Romanes) 2019

¹ Míro čháva! Rípir miré lavá, i rakh len dre godý syr barvalypén miré priphenybená.

² Rikirpe ke miré priphenybená i rakh dre godý miro zakóno syr lial'ka (zračko) dre jakh.

³ Priphande len ke tyré angušta (pal'cy), čhin len pe iló syr pe tablicy.

⁴ Phen godypnaske: “Tu san mirí phen, i khar godý syr tyrí sámo fedýr seménca:

⁵ sob (kaj) jone te rakhén tut čužoné džuvliatyr, odoliatyr, saví prityrdela ke pe gudlé lavénca.

Fuj Džuvlý

⁶ Ĥáda, jekh mólo me dykhávas pir rišotka (kraty) dre fenštra miré kheréskiri;

⁷ ĥáda, me maškír balvalitkone manušénde, rozdykhcjom terné manušénde, terné manušores nabaré godiása,

⁸ savó piridžalas vulíca (gása) pašýl venglo, kaj dživelas jekh džuvlý. I jov gijá dromoresa ke lákiro kher,

⁹ dre pacjomki, bel'velié, kalé i ciamle ratiasa.

¹⁰ I, ake, adáia džuvlý pirilyja les; joj sys uridy syr biladžakuny džuvlý frentone ilésa.

¹¹ Joj zoralés rakirdiá i kerdiá, so joj kamdiá. Lákire ĥerá na jačenaspe kheré.

¹² Jekh mólo joj sys javrí, javír mólo joj sys pe štéto, kaj manušá skedenaspe, užakiri čorahanés pašýl kažno venglo.

¹³ I joj uhtyldia kadalé terné manušores i čamudia les; joj phendiá léske biladžaipnytkone mósa:

¹⁴ “Mánde isyn svénta janybená te parikiras Devléske, adadyvés me dyjom péskire sovlahá Devléske.

¹⁵ Paldavá me javdjom te pirilav tut, me dobusoves (staratiel'nes) rodyjom tyró muj i me lathjom tut.

¹⁶ Me prikedyjom miro čhuibén paringenca (kovrenca), cviatnone cergenca Jegiptóskire ĥandlestyr (ljonostyr).

¹⁷ Me počhudjom (podušyndjom) miro čhuibén mirósa, alojosa, koricasa.

¹⁸ Jav, javása te kamas jekh jekhés but ke tasiarla (ke zlóko), javása te bahtaljovas kamibnasa čalés.

¹⁹ Miro rom isyn na kheré, jov tradyjá dro baró drom.

²⁰ Jov lyjá mujengiro (košel'ko) lovenca pésa, jov javéla pale dro dyvés, syr javéla pherdó čhon.

²¹ Joj utyrdelas dro grého (bizo) les péskire lavénca adiáke, so jov poddyjape, joj xohané, gudlé lavénca prityrdyja les.

²² Jekhátyr (srázu) jov gijá pal láte, syr guruv, savó džála pe péskiro čhinybén, ci syr dylynó, sob (kaj) les pharés te sykliakirén pe zan'dir [cji syr alienjo, sob (kaj) te den kar'je les-r.s.];

²³ angíl, syr maribnýtko bust (striela) promarela pir léskiro kaló buko (piečonka). Davá manúš isyn sýrby čirikloro, so sýges prastala dre felý (pietlia). Jov na džinéla, so saró davá xasiakiréla les.

²⁴ Paldavá, čhavale, šunén man, riskirén iló ke lavá, so me phenáva:

²⁵ na domeken, sob (kaj) kadaja džuvlý te riskirél ke pe tumaró iló, sob (kaj) tumé te džán lákire dromorenca:

²⁶ but manušá dukhandyne pal láte, i saré, savé isyn muliakirdé, sys zoralé manušá.

²⁷ Lákiro kher lydžála ke liúno (ado), léstyr džána telé ke meribnaskire štéty.