Pritčy 5 - Biblija - Pe Baltitko Romani čib (Romanes) 2019

Kófo Godypnastyr

¹ Míro čháva! Rikir iló ke miro godypén i band'kir kan ke dová (prišunpe ke miro lavá), syr me ĥaljovava,

² sob (kaj) tu moginésa xor te rozles, sob (kaj) tyré uštá te zrakhen (te rikirenpe) ke džinybén.

³ Pal-dová so čužoné-romniakire uštá občhuvenape avginesa i lákire lavá isyn kovledyr olivitkone dzetestyr (aliejostyr),

⁴ ne pe kónco (pe jagóro) joj isyn kirkedyr palynostyr i vostro syr duje-rigitko kurtála (sablia).

⁵ Lákire piré (stópy) lydžána ke meribén, joj štavela angíl ke liúno (ado).

⁶ Sob (kaj) te ĥaljos mištés lákire džiibnáskire dromá, tu nijékhvar na udžinenas len, jone na čačuné (stala).

⁷ Akaná šunén man, čhavé, na džán krig miré moskire lavéndyr.

⁸ Durjon krig dasavé džuvliatyr, na džán pašýl vudár lákire kheréskiro.

⁹ Sob (kaj) tyrí patýv (tyró sastypen) te na piridžal pe javirende, i tyré beršá biileskire manušéske.

¹⁰ I sob (kaj) javire-theméskire manušá te na pherdjon tyré mištypnasa, i tyré butiarné te na džán dro kher ke čúžo manúš.

¹¹ I tu javésa zoralés te tugines pe kónco (pe jagóro), syr tyrí loč i tyré masá jačénape šuké (bizorjákire)

¹² i tu phenésa: “Syr davá sys, so me bidykcjom sykliakiribén (miro iló na kamdiá), kiéli sykliakirdé man čačipnaske!”

¹³ Syr me na kandyjom miré sykliakiribnaskiren, na pričhudjom kan ke odolé sykliakiribnaskire, savé sykliakirdé man čačipnaske!

¹⁴ Me sómas pe sámo kónco (jagóro), syr kerdjom fuipén maškír devlytkonende, kaj jone skedenaspe.

¹⁵ Pi paní péskire venderjatyr (vodojomostyr), i paní, savó thadéla tyré ĥanyngatyr.

¹⁶ Ci isyn bangé tyré folahara (fontany) te čhuvén javrí paní? Ci isyn bangé-paniengire valny (velny) te thaden javrí pir vulícy (pir gásy)?

¹⁷ Mek jone te javén jekhdžineskire tyré, mek jone te na javén khetané čužoneske i túke.

¹⁸ Mek tyrí ĥanýng te javél bahtiakirdy i rádynpe drieván romniása, saví isyn žužy tyré ternypnastyr,

¹⁹ saví isyn sýrby drógo mirga (lan') i šukár ĥazel', savjakire goža masá te radynen čalés tut usady (sak), saví gudliakirela tyró kamiben.

²⁰ Vaš so túke, miro čhavó, te gudliakirespe čužoné džuvliása i te obles čúža masá?

²¹ Raj Devél dykhéla manušéskire dromá, i Jov ublavela dre godý (važynela) saré léskire dromore.

²² Fuj manúš kokoró xasjola péskire čoripnástyr, a léskiro grého sýrby šelenca phandela les kokores.

²³ Jov meréla, pal-dová so léske na uphendle, jov džála krig droméstyr pir péskiro baró dylnypén.