Pritčy 4 - Biblija - Pe Baltitko Romani čib (Romanes) 2019

Dadéskiro Uphenybén

¹ Šunén, tumé čhavále, syr dad sykliakiréla tumen i riskirén godý, sob (kaj) xor i buĥles te ĥaljon.

² Dová, so me sykliakirava tumen, isyn lačhipén: na mek miro zakóno (sykliakiribén).

³ Kiéli me, Solomóno, sómas miré dadéskiro, (Davidóskiro) čhavó, drógo i jekhoro angíl miré dákire jakhá,

⁴ to miro dad adiáke-pac' sykliakirdiá man i phendiá mánge: “Mek tyró iló te ripirel miré lavá: ríkirpe ke miré priphenybená i dživ.

⁵ Sykljov te javes godedyr, sykljov xor i bugles te ĥaljos, na bistyr davá, na risjov krig miré lavéndyr, so me rakiráva.

⁶ Na mek godypén, i jov javéla te rakhél tut; rikir syr drógima les i godypén javéla te dykhél rakhibnýtkes pal túte.

⁷ Godypén isyn baró réndo, sykljov te javes godedyr, i sykljov te ĥaljos saró, so túte isyn.

⁸ De bari čol (timín) godypnaske i jov ĥazdéla tut: godypén janéla patýv, syr tu prilesa ilésa les.

⁹ Godypén čhuvéla pe tyró šeró bahtalypnaskiri šukár viánka, janéla patyvakiri koróna túke.”

¹⁰ Šun, miro čhavó, prilé miré lavá, i tu javésa te dživés but berš.

¹¹ Me sykliakirdjom tut godé dromeske, me lydžijom tut čačuné dromorenca.

¹² Syr tu džása, tyré ĥerá na javéna te štaven pharipnasa; i, kiéli tu prastasa, to tu na javésa te obštavespe.

¹³ Rikirpe zoralés ke čačunó sykliakiribén, na bistyr pal léste: rakh les, pal-dová so davá sykliakiribén isyn tyró džiibén.

¹⁴ Na terdjov pe dromoro, kaj isyn bidevleskire; na psir čoré-manušéngire dromésa:

¹⁵ ríkirpe rigasa, na lode dalé dromoresa, risjov krig léstyr i džá mamúi.

¹⁶ Pal-dová so soiben na léla fujé manušén, angíl, syr jone te kerén čoripén, i léngiro sunó džála krig léndyr angíl, syr jone te kerén adiáke, sob (kaj) vari-kon te perél (te xasjol).

¹⁷ I jone xána maró fujé rendéndyr, jone p'jena mol (vino), so doresné nahrates (zorjása).

¹⁸ Ne čačuné-manušéngiro drom isyn sýrby dud (svéto), so ziainela, savó svencynela i ziainela jarkedyr angíl parnó dyvés.

¹⁹ Ne drom fujé-manušéngiro isyn sýrby ciamlypén; jone na džinéna, pir so jone obštavenape.

²⁰ Míro čhavó! Prilé ilésa dová, so me phenáva; pričhúv tyró kan (prišunpe) ke miré lavá.

²¹ Mek jone te na džán krig tyré jakhéndyr, rakh len maškirál tyró iló.

²² Pal-dová so jone isyn sýrby džiibén kodolénge, kon lathéla len i sastypen saré léngire masenge (ločake).

²³ Rakh péskiro iló butedýr saréstyr, so isyn drógo túke. Pal-dová so léstyr thadéla ĥanýng, saví déla džiibén.

²⁴ Rískir péstyr xohany čib, i uštá, so isyn frenta.

²⁵ Mek tyré jakhá te dykhén mamúi, mek tyré cymbly (riesnicy) te dykhén mamúj angíl túte.

²⁶ Produmin mištés, karik tyrí ĥerój džála (lydžála), mek saré tyré dromá te lydžán tut bi darákiro.

²⁷ Na rískir (na risjov) nji pe čačí (pravo) nji pe zérvo (liévo) rig; le (otlydža) krig tyrí ĥerój čoripnástyr.