Pritčy 3 - Biblija - Pe Baltitko Romani čib (Romanes) 2019

Uphenybén Terné Manušénge

¹ Miro čhava! Na bistyr, syr me sykliakirava tut, mek tyró iló te rakhél (te rikirelpe) ke miré priphenybená,

² pal-dová so butýr dyvesá te dživés, dlengo džiibén i ramánjo (miro) javéna upralestyr dyné túke.

³ Mek te na mekén tut lačhé-ilýtkima i čačipén; phande len trusciál men, začhin len pe tyró iló sýrby pe tablicy tyré iléskire;

⁴ i tu javésa drógo i dre bari patýv Devléste i manušénde.

⁵ Patia zoralés dre Raste-Devléste saré tyré iléstyr, na drieván dopatia péskire godypnaske.

⁶ Rípir pal Raste-Devléste, sob (kaj) tu te na keresas, i Jov mamuiakirela (keréla priamonesa) tyró drom.

⁷ Na sykáv pes godedyr, syr tu san: dar Rástyr-Devléstyr i durjov čoripnástyr.

⁸ Davá javéla sastypen tyré masenge ločake i drab tyré kokalenge.

⁹ De patýv Ráske-Devléske saré tyré mištypnástyr, i pervoné barjakirdendyr (plodendyr), so túte vybarjona;

¹⁰ i tyré šurny javéna pherdé pherdés i tyré priesy javéna te piričhuvenpe moliasa (vinosa).

¹¹ Míro čhava! Na dykh vučipnástyr, kiéli Raj Devél pharés sykliakiréla tut, adiáke-pac' i na xoliasov zoralés, syr Jov sykliakiréla dukhanes pal doša:

¹² pal-dová so Raj Devél sykliakiréla dukhanes pal doša (promekibena) kodolés, kon isyn drógo Léske, adiáke-pac' sýrby dad čhavés, savéske Jov zoralés radynélape.

¹³ Bahtaló isyn kodová manúš, savó jaciá godó, i manúš, kon jaciá but te ĥaljol.

¹⁴ Davá isyn fededýr syr te doreses rup, davá isyn kofitkedyr (pribyl'nedyr) suvnakástyr.

¹⁵ Godypén isyn drogedyr kuč barendyr, i saré kučipena, so tu ke isyn dróga, nane rávna (šerá) godypnaske.

¹⁶ Godypén rikiréla dlenga beršá dro čačó vast, a barvalypén i patýv isyn dro léskiro zérvo (liévo) vast.

¹⁷ Godypnaskire dromá isyn lačhé, a léngire dromá déna ramánjo (miro) túke.

¹⁸ Godypén isyn sýrby džiibnáskiri phabelyn kodoléske, kon xála léskire phabá: bahtaló isyn kodová manúš, savó rikirélape ke davá kašt.

¹⁹ Raj Devél Péskire godypnasa sozdyjá phuv, Jov Péskire ĥalyibnasa sozdyjá bolybén.

²⁰ Léskire džinybnastyr xor ĥanyngá otkerdepe i bolybén počhudia pahlyniasa (rosasa).

²¹ Míro čhavó! Na mek len, sob (kaj) te džán krig tyré jakhéndyr: rakh sastó godypén i xor rozlyiben:

²² i jone déna džiibén túke, i jone javéna te gožakiren tyrí men.

²³ Tedy tu džása péskire dromésa bidarakiro, i tyrí ĥerój na obštavelape.

²⁴ Syr tu pasjosa te soves, tu na javésa te dares, syr tu zasovesa, tyró soiben javéla gudló.

²⁵ Na dar trašaibnastyr ke meribén, ci pharipnastyr, so javéla pe fujé manušénde.

²⁶ Pal-dová so dre Raste-Devléste javéla tyró zoraló patiaibén, i Jov javéla te rakhél tyrí ĥerój te na obštavelpe.

²⁷ Na depe pale te kerés lačhipén kodolénge, savénge trej te kerés, kóli davá isyn pir zor tyré vasteske.

²⁸ Na phen tyré pašatuné manušéske: “Džá, tén'či, risjov pale. Atasiá me dáva túke, kóli túte isyn davá.”

²⁹ Na pridumin čoripén pe tyré pašatuneste, pal-dová so jov dživéla bi darákiro pašýl túte.

³⁰ Na košpe manušésa ni palsó, kóli jov na kerdiá čoripén (bedypen) túke.

³¹ Na zevlyne nahratone manušéske, na vykede péske vari-so léskire droméstyr.

³² Pal-dová so manúš, kon džal krig čačuné droméstyr, javéla džungaló (brydinela) Ráske-Devléske, a léskiro garadó khetanypen isyn čačuné manušénca.

³³ Raj Devél prokošela kher, kaj isyn fuj manúš, ne Jov bahtiakiréla štéto, kaj čačipnáskiro manúš dživéla.

³⁴ Jov salape xoliames odoléndyr, kon salape xoliames javirendyr, ne Jov déla bahtalypén odolénge, savé isyn na phut'kirdé.

³⁵ Godé manušá doreséna (dolena) sláva syr mištypén, ne ladž javéla te učhakirel dylynen.