Pritčy 22 - Biblija - Pe Baltitko Romani čib (Romanes) 2019

¹ Lačhó lav isyn drogedyr (kučedyr) baré barvalypnastyr, i lačhí mavlýn (malva) isyn kučedyr rupéstyr i suvnakástyr.

² Barvaló i čororó manúš dykhenape jekh jekhésa: Raj Devél sozdyjá len dujén.

³ Baré-godiákiro manúš dykhéla angíl bibáht (bída) i garadjola, ne prosto džála angíl i javéla sendiakirdo.

⁴ Kon kandéla, i daréla Rástyr-Devléstyr, kodová doreséla barvalypén, patýv i džiibén.

⁵ Phusadytka xrústy (tierny) i feliá isyn pe drom, kaj isyn mižeh manúš; a kon prirakhela péskiro di, kodová javéla te durjol léndyr.

⁶ Sykliákir terné čhavés adiáke, syr léske trej duredýr te dživél, i, kiéli jov javéla phuró, jov na džála krig dalé droméstyr.

⁷ Barvaló rikiréla zor pe čororeste: i kon isyn vužlo, odová isyn dynári kodoléske, savó pokerdia (konéske jov isyn bangó).

⁸ Kon počhuvela (sieinela) načačipén syr giv pe félda, kodová keréla bibáht (bída) péske, i léskiri zor dre xolý končynelape.

⁹ Kon isyn barvalé-iléskiro, kodová javéla bahtiakirdó, pal-dová so jov déla péskiro maró čororenge.

¹⁰ Trade krig adasaves, savó isyn bipatyvakiro ke javír manušá, i čingárd durjola; i košybén, i obrakiriben pirijačena.

¹¹ Kon tyrdelape ke žužó iló, i konéste isyn bahtalypén pe léskire uštá, kadasavé manušéske králi isyn léskiro mal.

¹² Ráskire-Devléskire jakhá rakhena džinybén, ne Jov ravela telé lavá, savé isyn napatiaibnaskire manušéndyr.

¹³ Nabutitko (kirne-maséngiro) manúš phenéla: “Ščer (liévo) isyn javrí! Me javáva muliakirdo, pe vulícy (pe gásy).”

¹⁴ Fuje-džuvliengiro muj isyn xor ĥanbín (jama); peréla odorík kodová manúš, pe konéste Raj Devél xoliasóla.

¹⁵ Dylnypén priphandiape ke čhavéskiro iló, ne ran (rozga), savjása sykliakiréna pharés, tradéla dylnypén krig.

¹⁶ Kon tasavela (dukhavela) čorores te barjakirel péskiro barvalypén; i kodová, kon déla barvaleske, kadasavó manúš javéla čororó.

¹⁷ Pričhúv péskiro kan i pošun god'varé-manušéngire lavá, i bandiakir tyró iló ke miro džinybén;

¹⁸ pal-dová so kuč javéla, kóli tu javésa te rikirespe ke jone péskire ilésa, sob (kaj) jone te javén adiáke-pac' skedyné pe tyré uštá.

¹⁹ Sob (kaj) túte te javél zoraló patiaibén dre Raste-Devléste, me sykliakirava tut i adadyvés, i tu rípir.

²⁰ Ci me na čhindjom túke trin móly naj kučedyr godé i džinybnytka lavá,

²¹ sob (kaj) me moginavas te piridav túke patiaibnytka lavá pal čačipén, sob (kaj) tu moginesas te otphenes pale patiaibnytkone lavénca kodolénge, savé bičhavena tut.

²² Na čor čororestyr, pal-dová so jov isyn čororó, na tasav odolén, savén pritasavéna pašýl pórta:

²³ pal-dová so Raj Devél zaterdjola pal léngiro réndo, i léla krig kodolengiro di, savé občorena len.

²⁴ Na jav mal (na družyn) xolynakire manušéske, na rákir [na džá-ju.o.] jaglune manušésa,

²⁵ sob (kaj) tu te na sykljos, syr jov keréla, i sob (kaj) tu te na čhuvés felý vaš tyró di.

²⁶ Na jav kadasavé manušésa, savó marela pir vastá dre symadý (zalogo), ci savó isyn dudvalo/iakhítko (svidietieljo) pal vužlypena (dlugi);

²⁷ pal-dová so, kóli nane túte sósa te pleskires, to tedy tútyr otlena tyrí pasindly (postiel').

²⁸ Na piričhuv ĥaratuny špéra pe phuv, saví tyré dadá čhudé.

²⁹ Ci tu dykhésa manušés, savó dobusoves keréla péskiri butý? Jov javéla te terdjol angíl kral'jénde; jov na javéla te terdjol angíl prostone (napatyvale) manušénde.