Pritčy 2 - Biblija - Pe Baltitko Romani čib (Romanes) 2019

Pal Godypén

¹ Míro čhava! Kóli tu prilesa miré lavá, i garavesa (zrakhésa) mištés miré priphenybená andré péste;

² adiáke, so tu prišunesape ke godypén, i riskiresa iló, sob (kaj) te ĥaljos;

³ i, kóli tu javésa te manges zoralés péske godypén i tu riskiresa iló, sob (kaj) te ĥaljos;

⁴ kóli tu javésa te pričhuves zor te lathes godypén syr rup, i tu javésa te rodes godypén syr kučipén:

⁵ to tedy tu ĥaljosa, sóske trej te kutiakires ke dar Ras-Devlés, i te udžines butedýr pal Devléste.

⁶ Pal-dová so Raj Devél déla džinybén, Léskire lavéstyr javéla džinybén i ĥalyibén.

⁷ Jov prigaravela zrakhibén (baró godypén) devlytkonenge, Jov isyn ščýto vaš odolénge (dykhéla pal odolénde), savé dživéna pir čačipén;

⁸ Jov prirakhela dromore, kaj isyn čačipén manušénde, i Jov rakhéla dromá vaš Péskire sventonenge.

⁹ Tén'ci tu ĥaljosa čačipén, čačipén maškír manušénde, i čačunó drom.

¹⁰ Syr godypén zadžála dro tyró iló, i džinybén javéla te radynel tyró di;

¹¹ to tedy xor rozĥalyiben javéla te zrakhél tut, a ĥalyibén javéla te dykhél rakhibnýtkes pal túte.

¹² Sob (kaj) te vyrakhel tut čoré droméstyr, manušéstyr, savó rakiréla fuipén pefromi (narošnes),

¹³ odoléndyr, savé mekéna čačuné dromá, sob (kaj) te psirén kalé droménca dro grého;

¹⁴ savé isyn ráda te kerén čoripén i drieván te radynénpe fuipnaske (zahale biladžaipnaske),

¹⁵ savengire dromá isyn bangé (xohané), i savé keréna frentes (xohanés) saró.

¹⁶ Sob (kaj) te zrakhél tut javire-romeskire romniatyr (čužonatyr), saví gudliakirela péskire lavénca,

¹⁷ saví mekciá drogoné males péskire tyrnypnastyr, i bistyrdia péskire-Devléskiro zavieto.

¹⁸ Pal-dová so lákiro kher lydžála ke meribén, a lákire dromore džán ke mulé;

¹⁹ nijékh, kon džála ke joi, na risjola pale, i jov adiáke-pac' na terdjola pe džiibnáskiro drom,

²⁰ paldavá psir lačhé dromésa, i ríkirpe ke čačipnaskire dromore.

²¹ Pal-dová so čačipnaskire javéna te dživén pe phuv, i bidošengire jačénape pe láte,

²² a fuj manušá javéna čhurdyné phuvjátyr, i napatiaibnaskire vykušenape látyr syr dylyny čar.

maintained by the United Bible Societies for the Baltic Romani Mission

Lean sinn:

Ceanglaichean taic

Sanasan