Pritčy 13 - Biblija - Pe Baltitko Romani čib (Romanes) 2019

Solomonóskire Godypena

¹ Godó čhavó šunéla, syr dad sykliakiréla les čačipnaske, ne kon isyn napatyvakiro ke javír, jov na šunéla, syr sykavéna bang léske.

² Manúš čaliakirela lačhipnása sýrby phabatyr péskire uštendyr, ne napatiaibnaskire dijá čaliakirenape nahratymatyr.

³ Kon pririkirela péskiro muj, odová rakhéla péskiro džiibén, ne kodová, savó otphandela buĥles péskiro muj, odová xasjola.

⁴ Kirne-maséngiro manúš tyrdelape te xal, ne nisó na doreséla, ne dobusovengiro (staratiel'no) di javéla barvaló.

⁵ Čačunó manúš drieván na kaméla xohaibén, ne nadevlytko manúš lydžála pes namištes i doreséla ladž.

⁶ Čačipén rakhéla odolén, savengiro drom isyn bidošéngiro, ne fuipén ravela telé [hasiakiréla-r.s.] grehitkoné manušés.

⁷ Isyn manúš, savó sykavéla pes, xaj, jov isyn barvaló, ne nisó nane léste. Isyn manúš, savó sykavéla pes sýrby jov isyn čororó, ne léste isyn baró barvalypén.

⁸ Manúš moginéla te del péskiro barvalypén pal džiibén syr symadý (zalogo), ne čororó na šunéla, syr sykavéna bang léske.

⁹ Čačuné-manušéskiro dud (svéto) xačola radymása, a fujé-manušéskiro momolýtko (svietíl'niko) murdjola.

¹⁰ Phut'kiribnastyr džála čingárd, ne, kon kandéla, syr léske déna godypén, odová isyn godó.

¹¹ Mištypén, so manúš doreséla bipatyvakire rendéndyr, tyknjola, ne kon kerdiá butý pharés, odoleskiro mištypén barjola.

¹² Užakiribén, so na janéla nisó, keréla adiáke, so iló dukhala, ne kiéli zoraló mangipén kerélape dro čačipén, tedy džiibén pherdjola radymása.

¹³ Kon na priléla ke godý lav, isyn xasibnýtko, ne kon kutiakirela ke dar priphenybén, odová doreséla mazúri (nagrada).

¹⁴ Godé-manušéskiro lav isyn džiibnáskiri ĥanýng, sob (kaj) te risjon krig meribnaskire feliatyr.

¹⁵ Kon ĥaljola mištés, kodová isyn manušénge pir iló, ne napatiaibnytko manúš pharés dživéla.

¹⁶ Baré-godiákiro manúš keréla saró džinybnasa, ne dylynó sykavéla mamúj péskiro dylnypén.

¹⁷ Fuj manúš, savó bičhadó zaniása (viestiasa), peréla dro pharipén, ne patiaibnýtko viestia-bičhaibnaskiro (poslo) janéla sastypen.

¹⁸ Čororipen i ladž peréna pe manušéste, savó vyčhurdela iléstyr dová, pal so sykliakiréna les. Ne kodová, savó priléla les, kiéli les bangiakirena zoralés, javéla dre patýv.

¹⁹ Kiéli zoralý myslia ke vari-so kerélape ke kónco (ke jagóro), davá gudliakirela iló, ne dylyneske na pir iló te džal krig fuipnastyr.

²⁰ Kon kumplinelape (malynelape) godé manušénca, javéla godó, ne kampanija (malypen) dylynin'konenca xasiakiréla les.

²¹ Fuipén rodéla grehitkoné manušén, ne čačuné manušénge otpleskirelape pale lačhipnása.

²² Lačhó manúš jačkiréla meknó mištypén (nasliedstvo) léskire-čhavéngire čhavénge, ne barvalypén grehitkoné-manušéngiro prirakhelape vaš čačuné manušénge.

²³ But maró isyn pe čhučé féldy čororé manušéngire, ne, kaj na uhtýlla (nádosi) čačipén maškír manušénde, odój javéla xasibén.

²⁴ Kon žalinela péskiri ran, odoléske nane drógo drieván čhavó, ne konéske isyn drógo jov, odová sykliakiréla ke dukhá tyknal les.

²⁵ Čačunó manúš xála čalés, kicý léskiro di kaméla, ne fujé-manušéngiro kužum (želudko) javéla te bokhaljol.