Pritčy 12 - Biblija - Pe Baltitko Romani čib (Romanes) 2019

Solomonóskire Godypena

¹ Kon kaméla, sob (kaj) les te sykliakirén, odoleska trej džinybén, a kon drieván na kaméla, syr sykavéna léskiri bang, odová isyn nagodo.

² Ráske-Devléske isyn drógo lačhó manúš, ne Jov bangiakirela manušés, savó priduminela fuipén.

³ Manúš nane terdó zoralés fuipnastyr, ne rukh (kornjo) čačuné-manušéngiro na kharélape (na piričhuvelape) krig.

⁴ Kuč romný isyn sýrby koróna pe romeskiro šeró, ne kodoia, saví ladžakirela les, isyn sýrby kirnypen dre léskire kokalý.

⁵ Čačuné manušá duminéna pal čačipén, ne fuj manušá khetané déna xohanó godypén.

⁶ Fuj manušá rakiréna lavá: “Podrakhasa te zamaras”, ne devlytkonengire lavá vyrakhena len.

⁷ Fuje manušén ravena telé i jone nane butýr, ne kher čačuné-manušéngiro javéla te terdjol.

⁸ Manušés šarena pal léskiri godý, ne manušá javéna te dykhén vučipnástyr pe odoléste, konéste isyn xohanó iló.

⁹ Nabaró manúš, savéste isyn dynári, fedýr kodolestyr, savó isyn dre patýv féni péste, ne léste na uhtýlla (nádosi) maró.

¹⁰ Čačunó manúš pekelape (zabotisola) pal léskire kheritkoné murdalénde, ne fujé-manušéngiro iló isyn bimanušytko (bitangipnaskiro).

¹¹ Kon keréla butý pe péskiri phuv, odová javéla te xal maró čalés, ne kodová, savó džála pal balvalitkone manušénde, nábut ĥaljola.

¹² Fuj manúš isyn ĥálko te uhtylel čoripnasa, ne čačuné manušénde isyn zoralý phuv tel ĥerá.

¹³ Fuj manúš peréla dre felý čoripnasa péskire uštendyr, ne čačunó manúš džála krig pharipnastyr.

¹⁴ Manúš javéla čalo lačhipnastyr syr phabatyr, so vydžála léskire uštendyr, i javéla dynó manušéske pir butiá léskire-vastengire.

¹⁵ Dylyneskiro drom isyn čačunó dre léskire jakhá, ne odová, savó kandéla, syr léske déna godypén, isyn godó.

¹⁶ Dylynin'ko manúš jekhátyr zoralés xoliasóla, ne baré-godiákiro sčhakirela xolý.

¹⁷ Kon rakiréla dová, so jov džinéla, odová phenéla čačipén, ne načačuno dudvalo /iakhítko (svidietieljo) xohavela.

¹⁸ Kon rakiréla, i na duminéla, odová promarela javirés syr kurtála (sablia), ne godé-manušéngiri čib sastiakirela les.

¹⁹ Patiaibnytka lavá javéna te rikirenpe ŭsády (sak), ne xohany čib pe momiento.

²⁰ Frentyma isyn dro iló odolénde, savé keréna čoripén, ne kon déla godypén pal ramánjo (miro), kodová radynélape.

²¹ Čačuné manušés obdžala rigasa meribnytko dar, ne fuj manušá javéna pherdé čoripnasa.

²² Raj Devél rikirlape dre rig xohané uštendyr, ne odoléndyr, savé keréna pir patiaibén, Jov bahtaljola.

²³ Baré-godiákiro manúš garavela džinybén, ne dylynó rosphenéla angíl sarénde dylnypén.

²⁴ Dobusovo vast javéla te xulainél, ne nabutitko vast začhuvena ke butý zorjása.

²⁵ Kalypén pe iló pritasavela manušés, ne lačhó lav radynela les.

²⁶ Čačuneske trej te vykedel malen (drugen), pal-dová so fuj manušá lydžána krig droméstyr.

²⁷ Nabutitko manúš na pekela mas, so jov doresciá pe stariben (ohota), ne dobusovo manúš barjakiréla mištypén.

²⁸ Čačunó drom lydžála ke džiibén, pe léskire dromore nane meribén.