Pritčy 10 - Biblija - Pe Baltitko Romani čib (Romanes) 2019

Solomonóskire Godypena

¹ Solomonóskire pritčy. Godó čhavó radynela péskire dadés, ne dylynin'kone čhavestyr kaljola iló léskire date.

² Kučipena (sokroviščy), so doreséna čoré rendéndyr, na janéna lačhipén, ne čačipén zrakhéla meribnástyr.

³ Raj Devél na domekela, sob (kaj) čačunó manúš te bokhaljol, ne Jov na priléla dová, so drieván trej nadevlytkone manušénge.

⁴ Odová manúš, savéste isyn kirnačo (lienivo) vast, javéla čororó, ne dobusovo (staratiel'no) vast barvaliakirela manušés.

⁵ Kon ukedela lynaskiro, isyn godó čhavó, ne kodová manúš, savó isyn sutó, kiéli ukedena ubijandypen, isyn balvalitko čhavó.

⁶ Bahtiakiribén učhakiréla šeró čačipnaskire manušéskiro, ne nahratyma garavela muj fujé-manušéngiro.

⁷ Bahtaló isyn ripiribén pal čačuné manušéste, ne čoré-manušéngiro lav kirnjola.

⁸ Godé manušá priléna ke godý priphenybená, ne nabaré-godiákiro manúš peréla.

⁹ Kodová manúš, savó keréla bidošengires, psiréla bidarakiro; ne kodová manúš, savó psiréla bangé dromésa, javéla uhtyldo vaš kára.

¹⁰ Manúš, savó marela jakhasa, kiéli keréla čoripén, janéla kalypén, a phut'kirdo manúš peréla.

¹¹ Čačuné-manušéskire lavá isyn džiibnáskiri ĥanýng, ne nahratyma garavela muj fujé-manušéngiro.

¹² Zoraló nakamiben ĥazdéla košybén, patýv ke javír manušá začhakirela saré gréhi.

¹³ Godypén džála godypnaskire manušéstyr, a ran kedelape te marel pir dumo kodoléske, savó na ĥaljola godypén.

¹⁴ Godé manušá skedéna (zrakhena) džinybén, ne dylynó rakiréla ke xasibén.

¹⁵ Barvalé-manušéskiro mištypén isyn syr zoraló fóro, ne čororó manúš peréla dro dúho (fáno) péskire bogipnastyr.

¹⁶ Čačipnaskire-manušeskiri pharí butý lydžála ke džiibén, ne bažyn (prirosto), saví doreséla načačuno (čoro) manúš, lydžála ke grého.

¹⁷ Odová, savó rikirélape ke sykliakiribén, isyn pe drom ke džiibén, ne kodová, kon na priléla ke godý, kiéli léske sykavéna bang, džála dre rig dalé droméstyr.

¹⁸ Kon garavela javirendyr dová, so jov drieván na kaméla, isyn xohanó, i kon rozmekela čib (kalé-keribnaskire) lavá, isyn dylynó.

¹⁹ Kaj rakiréna but lavá, odój i čoripén phenéna: ne kon obrikirela péskire uštá, odová isyn godó manúš.

²⁰ Čačuné-manušéskire lavá isyn sýrby vykedyno rup, a fujé-manušéngiro iló na mol nisó.

²¹ Čačuné-manušéskire uštá déna godý buté manušénge, ne dylynin'ka meréna pir dová, so lénge na uhtýlla (nádosi) godypén.

²² Ráskire-Devléskiro bahtiakiribén barjakiréla manušés, jov nisó na moginéla te pričhuvel ke davá, keri butý pharés.

²³ Dylyné manušéske te kerél čoripén sýrby te broinel, ne manušéste, savó ĥaljola, isyn but godypén.

²⁴ Dová, sóstyr daréla fuj manúš, peréla pe léste, ne dová, so drieván isyn drógo čačuné manušénge, javéla otmekno lénge.

²⁵ Riskiribnaskiri balvál (vihro) prodžála i fuj manušá butýr na javéna, ne čačunó manúš isyn pe viéčno fundámiento.

²⁶ So isyn šut (uksuso) vaš dandá, ci thuv vaš jakhá, adiáke-pac' isyn kirne-maséngiro manúš vaš odolénge, savé bičhadé kadasavé manušés.

²⁷ Kon daréla Rástyr-Devléstyr, kodová dživéla ĥaredyr (dlugedyr), ne fuj manušá meréna sygedýr.

²⁸ Čačuné-manušéngiro užakiribén isyn rádyma, ne fujé-manušéngiri nadiéia xasjola.

²⁹ Raj Devél isyn zoralypén vaš čačuné manušénge, ne Jov xasiakiréla kodolén, [i dar vaš odolénge-r.s.], savé keréna čoripén.

³⁰ Čačuné manušá nijékhvar na kuninenape, ne fuj manušá na javéna te dživén duredýr pe phuv.

³¹ Čačuné manušá rakiréna godé lavá, ne xohany čib čingirena krig.

³² Čačuné-manušéngire uštá džinéna, so te phenén, ne muj fujé-manušéngiro féni (tóka) xohavela.