Pritčy 1 - Biblija - Pe Baltitko Romani čib (Romanes) 2019

Dro so Dróga isyn Pritčy

¹ Solomonóskire pritčy, Davidóskire čhavéskire, Izrailjoskire-kralískire tuménge,

² sob (kaj) tumé te džinén godypén, i te sykljon čačipnaske, sob (kaj) tumé te ĥaljon xor lavá rakiribnastyr;

³ sob (kaj) tumé te doresen (te ĥaljon) godypén, čačipén, čačipnytko otlydžaiben i čačunó séndo.

⁴ Te den godý prostone-ileskirenge džinybén i rozlyiben terné manušéske.

⁵ Kon isyn godó (god'varó) manúš, javéla te šunél i te sykljol butýr; manúš baré godiása doreséla péske lačhó godypén (sovieto),

⁶ sob (kaj) te ĥaljol pritča i čorahano vyphenyben, godé-manušéngire lavá i léngire šerepharibnytka (zagadki).

Godypén Tyrne Manušénge

⁷ Angíl saréstyr trej te dares Devléstyr, sob (kaj) te javél davá džinybén, ne bigodiakire manušá na priléna ke godý godypén i uphenybén.

⁸ Šun, míro čhavó, so tyró dad uphenela i na prilé bi patyvakiro (na steliakir) dová, pal so daj sykliakiréla;

⁹ pal-dová so jone javéna sýrby bahtalypnaskiri viánka pe tyró šeró i sýrby miriklia trusciál tyrí men.

¹⁰ Míro čhavó; kóli grehítka manušá tyrdena tut ke pe, na zdžape (na malynpe) lénca.

¹¹ Kóli jone phenéna: “Jav aménca, javén, podrakhasa te zamaras ke rat, javén, užakirasa bibangeskire manušés, konéste nane doš;

¹² iavén, nakhavasa len džidenca syr liúno (ado), i sarén kodolén, savé džána pročhuven telé dre maĥila (kula).

¹³ Ame lathasa (zalasa) saró kuč barvalypén, ame pherdiakirasa amaré kherá čorde mištypnasa;

¹⁴ tu čhurde péskiro žrebijo pe baht khetané aménca i aménde sarénde javéla jekh traminengiro (košel'ko).”

¹⁵ Míro čhavó! Na psir jekhe dromésa lénca. Rakh krig péskiri ĥerój léngire dromorestyr;

¹⁶ pal-dová so léngire ĥerá prastána te kerén čoripén, i jone prastána sýges te pročhuven manušéngiro rat.

¹⁷ Ne ivjá (naprásnes) jone čhudé felý angíl jakhá saré čirikliende.

¹⁸ I kadalé manušá isyn pašté, i sýrby užakiréna pe léngiro rat, jone ĥaradjona čorahanés i rodéna meribén péske.

¹⁹ Kadasavó isyn taláno manušénge, savé isyn ĥalka (alčna) ke manušéngiro barvalypén, ke xohanó kófo (pribyl'), jone sýges phagirena péskiro šeró.

²⁰ Godypén godlela javrí pe vulíca (gása): jov ĥazdéla péskiri zan (glos) pe foruniá (plóščy);

²¹ godypén prikharela pe trušulytka dromá, pašýl foróskiri pórta i dro fóro rakiréla:

²² “Ci but tumé, búra manušá (nievieždy), javéna te tyrdenne ke napatyvalypen (biladžaipén)? Ci but odolé, kon salape xoliames, javéna te bahtaljon xoliamé sabnastyr? Ci but (kicý) dylyné javéna drieván te na prilén džinybén?

²³ Risjon mósa ke me, kiéli me bangiakirava xoliames tumen: ake, me vyphurdava miro dúho (fáno) pe tuménde, me keráva adiáke, sob (kaj) tumé te džinén miré lavá.

²⁴ Paldavá so me khardjom, i tumé na kandyné (otphendlepe); me protyrdyjom péskiro vast i nijékh na prilyjá ke iló.

²⁵ Pal-dová so tumé na prilyné saré godypena (soviety) i na riskirdé ile, kiéli me sykadjom tumarí bang,

²⁶ me javáva te savpe tumaré baré bidatyr (xasibnastyr), me javáva te prosav tumen, syr javéla trašaibén (bari dar).

²⁷ Kiéli trašaibén peréla pe tuménde syr sýgno xasiakiriben i tumaró xasibén javéla syr vihro, kiéli bari dar i bída peréna pe tuménde,

²⁸ to tedy tumé kharéna man, ne me na javáva te otphenav tuménge, i tumé javéna te rodén man saré zorjátyr, ne tumé na lathéna man.

²⁹ Pal-dová so tumé na vyrikirenas džinybén, i na vykedyné vaš péske (na zakamle te kutiakires ke dar) Ras-Devlés,

³⁰ i tumé nijékhvar na prilyné miro godypén i tumé na prilyné ke godý, syr me sykadjom tumarí bang,

³¹ pal-dová tumé javéna te xan dová, so tumé san mol, i tumé javéna te čaljon doléstyr, so tumé pridumindle.

³² Pal-dová so jone xasjona, kiéli jone risjona krig godypnastyr i dylyné-manušéngiri nahratyma kokori xasiakiréla len.

³³ Ne kon šunéla miré lavá, kodová javéla te dživél bi darákiro, i jov javéla bi trašaibnaskiro (štylés), jov na javéla te darel fuipnastyr.”