Osija 2 - Biblija - Pe Baltitko Romani čib (Romanes) 2019

¹ Rakirén tumaré pšalénge: ‘Miré manušále,’ i rakirén tumaré phenienge: ‘Potangindly’ (požalindly).’

Izrailjoskire Manušá Isyn Napatiaibnytka Devléske

² Bangiakirén [sendinén-r.s.] tumaré da, bangiakiren la: pal-dová so joj butýr na javéla Mirí romný, i Me na som lákiro rom! Mek joj te durjakirel lákire móstyr lákiro biladžaipén, i lákiro nálačho kamiben krig lákire kolynendyr;

³ sob (kaj) Me te na rosčhakirav lákiro nangipén, i te na čhuvav la angíl, syr dro dyvés, kiéli joj bijándyja; i sob (kaj) Me na keráv látyr čhučí (pusto) félda, i sob (kaj) Me te na pirikerav la dre šukí phuv, i te na pekavav la smegasa te p'jel.

⁴ Me na sykaváva láska vaš lákire čhavorenge (bijatenge), pal-dová so jone isyn bijaty biladžakuné džuvliatyr.

⁵ Pal-dová so léngiri daj kheldia biladžakunes; joj sys pharí lénca napatyvalés: pal-dová so joj phendiá: “Me džáva pal miré kamlytkonende, savé déna mánge miro maró, i miro paní, i mirí výlna (šers'), miro ĥandlado (ljono), miro olivítko dzet (jeliejo) i miro pibén.”

⁶ Paldavá, ake, Me zakerava drom láke phusaibnytkoné xrusténca (tiernienca), i Me občhuvava la vantasa, sob (kaj) joj te na del ráda te lathel péskire dromore.

⁷ I joj tradelape pal lákire kamlytkonende, ne joj na dotradela len; i joj iavéla te rodél len, ne joj na lathéla len: I tedy phenéla joi: ‘Ne, džáva me i risjováva pale ke miro pérvo rom, pal-dová so sys fedýr mánge syr akaná isyn mánca.’

⁸ Joj na džindiá, so davá sómas Me, Raj Devél, Kon délas láke giv (maró), mol (vino), i dzet, i Kon kerdiá butedýr (butedyrjakirdia) lákiro rup i suvnakái, savéndyr jone kerdé Vaalo.

⁹ Pal-davá Me risjováva pale, i Me láva pale Miro giv (maró) dro umalotno časo, i Mirí mol (vino) dro lákiro siezono, i Me láva pale Mirí výlna i Miro ĥandlado (ljono), so dynó sys láke te učhakirel joj péskiro nangipén.

¹⁰ Akaná Me otkerava lákiro biladžaipén angíl jakhá lákire kamlytkone muršende, i nijékh manúš naštý na vyrakhela la Miré vastéstyr.

¹¹ I Me keráva adiáke, so láte pirijačéla (končynelape) saben radymása, butýr na javéna svénki lákire, lákire-čhoneskire svenkicy, i lákire sávaty-saré lákire skaminda.

¹² I Me čhučakirava lákire vinagradýtka barja (posadki) i lákire inžyritka drevicy, pe savé joj rakiréla: ‘Ĥáda, kadalé isyn miré mazúrja (nagrady), so miré kamlytka muršá dyné mánge.’” I Me keráva léndyr veš, sob (kaj) feldýtka murdalá (zvieri) te xan len.

¹³ I Me pharés sendiakirava la pal kodolé dyvesá, pe savé joj thuvaliakirdia dróga smóly Vaalenge. Joj šukarjakirdia pes čenienca i miriklienca, i joj gijá pal lákire kamlytkone muršende, i tedy joj bistyrdia Man”, – rakiréla Raj Devél.

Devléskiri Laske pe Léskire Manušénde

¹⁴ “Paldavá Me zatyrdava (urakirava) la i janáva la pe čhučí phuv, i Me javáva te rakiráv ilytkes lása.

¹⁵ I Me dáva láke vinagradýtka barja odothýr i dólo Ahoroskiro, syr vudár te užakirel lačhipén. Odój joj iavéla te bagal, syr dre dyvesá lákire ternypnaskire, i syr dro dyvés, kiéli joj gijá krig Jegiptóskire phuvjátyr.

¹⁶ I javéla adiáke pe dro dová dyvés, – rakiréla Raj Devél, – ‘so tu javésa te khares Man: ‘Miro rom,’ i tu na javésa butýr te khares Man ‘Vaali’,

¹⁷ pal-dová so Me keráva adiáke, so lákire uštá butýr na javéna te phenén lavá Vaalengire, i kadalé kharibena (lavá) butýr na javéna te ripirenpe pe godý manušéngire Izrailjostyr.

¹⁸ Pe dová dyvés Me čhuváva zavieto vaš lénge feldytkone murdalénca (zvierienca), bolybnytkone čiriklienca i capnienca (polzučone džidypnenge), savé polzynena pir phuv. I Me phagirava lúko i kurtála, sob (kaj) jone te na javén pe doiá phuv, i Me keráva adiáke, sob (kaj) jone te pasjon bi darákiro, i sob (kaj) te na javél maribén.

¹⁹ I Me javáva te angrustynav (obrenčynava) tut Mánca usady (sak); i Me angrustynava (obrenčynava) tut Mánca pir čačipén i čačunó séndo, i pir drógo lačhipén, i pir lačhé-ilýtkima;

²⁰ i Me angrustynava (obrenčynava) tut Mánca, so tu javésa patiaibnýtko ke Me, i Tu javésa te džinés Man, Ras-Devlés.

²¹ I javéla adiáke dro dová dyvés, so Me ušunava [otphenava-ju.o.], – rakiréla Raj Devél, – i Me šunava bolybén, i jov javéla te šunél phuv.

²² Phuv šunela i déla giv (maró), i mol (vino), i dzet (jeliejo), i adalé ušunena Izriejeljos [Izrailjoske-ju.o.].

²³ I Me počhuvava la vaš Péske pe phuv, i Me sykaváva láska pe ‘Loruhamate,’ i Me phenáva ke ‘Loami’ (na Miré manušá): tumé san Miré manušá’! I jone phenéna: ‘Tu san amaró Devél!’”