Матфеё 7 - Biblija - Pe Baltitko Romani čib (Romanes) 2019

Pal Sendiakiriben

¹ Na sendinén, i tumen na javéna te sendinén,

² pal-dová so, syr tumé sendinena, adiáke-pac' i tumen javéna te sendinén; savé mierasa tumé mierinena, dasavé-pac' mierasa tumen javéna te mierinen.

³ Sóske tu dykhésa pe tykny phusinka dre jakh tyré pšaleskiri, a baró berno na dykhésa dre péskiri jakh?

⁴ Ci, syr tu phenésa pšaléske peskireske; ‘de, me vylava phusinka tyré jakhatyr; a berno isyn dre tyrí jakh?

⁵ Dujemuitko, vyle angledýr berno péskire jakhatyr, tedy dykhésa, syr te vyles phusinka tyré pšaléskire jakhatyr.

⁶ Na den dová, so isyn svénto, džuklenge, na čhurdén mutinia (žemčugi) angíl balyčende, sob (kaj) jone te na štakiren len ĥerénca, i te na risjon, i te na roskušen tumen.

Mangén, Rodén i Marén dro Vudár

⁷ Mangén, i javéla dynó tuménge; rodén, i lathéna; marén dro vudár, i psiravena (otphandena) tuménge.

⁸ Pal-dová so kažno, kon mangéla, doreséla péskiro; kažno, kon rodéla, lathéla; kažnonéske, kon marela dro vudár, javéla psirado (otphandlo).

⁹ Ci isyn vari-kon tuméndyr, kóli léskiro čhavó mangéla léstyr maró, te del čhavéske bar?

¹⁰ I kiéli mangéla mačho, te del léske sapes?

¹¹ Kóli tumé san nalačhé, i džinéna te kerén lačhipén péskire čhavénge, pe kicý butýr tuméndyr tumaró Bolybnáskiro Dad keréla lačhipén odolénge, savé mangena Léstyr.

¹² Kerén dová javirénge, so tuménge isyn pir iló, sob (kaj) i javír te kerén tuménge; Zakóno i proróki sykliakiréna davá-pac'.

Ciasno Pórta

¹³ Zadžán dro ciasno (tango) pórta, pal-dová so buĥly isyn pórta i otphandlo isyn drom, savó lydžála dro xasiakiriben, i but džána dro davá vudár.

¹⁴ Pal-dová so ciasno isyn pórta i nabuĥlo isyn drom, savó lydžála dro džiibén, i nábut lathéna les.

Kašt (Drévo) i Léskire Barjakirdé

¹⁵ Rakhénpe xohané prorokendyr, savé javéna ke ame dre bakrany ídia, ne andrál jone isyn xoliamé ruvá;

¹⁶ tumé ĥaljona len pir léngire barjakirdé. Ci skedéna dylyné čarjatyr vinagrado (drakh) ci inžyro kodriljostyr (diedoŭnikostyr)?

¹⁷ Adiáke-pac' kažno lačhó kašt déla lačhé barjakirdé (plódy) i dylynó kašt déla dylyné barjakirdé.

¹⁸ Lačhó kašt na moginéla te del dylyné barjakirdé, i dylynó kašt na déla lačhé barjakirdé.

¹⁹ I kažno kašt, so na déla lačhé barjakirdé, čingirena telé i čhurdena dre jag.

²⁰ Adiáke pir léngire barjakirdé tumé ĥaljona xohané prorokén.

Dyvés, Kiéli Javéla Séndo

²¹ Na kažno, savó rakiréla Mánge: ‘Dévla, Dévla!’ – zadžála dro Kralipén dro Bolybnáskiro Rajo; ne kodová, savó keréla pir vólia Miré Dadéskiri, Savó isyn dro Bolybnáskiro Rajo.

²² But manušá phenéna Mánge dro dová dyvés, kiéli javéna te sendinén: ‘Dévla, Dévla! Ci na Tyré lavésa ame angilphendiam? Ci na Tyré lavésa ame vytradasas nalačhé dúhi? Ci na Tyré lavésa but dívy kerasas?’

²³ Tén'ci Me phenáva lénge: ‘Me nikieli na džindjom tumen; džán krig Mándyr tumé, savé keréna čoripén.’

Rázna Kherá

²⁴ Kažno, kon šunéla lavá Miré i kandéla len, isyn syr god'varó manúš, kon čhudiá péskiro kher pe bar.

²⁵ I giné bryšynda, i ĥazdynépe réki (leniá), i lyné te phurdén balvalia, i saró pyjá pe davá kher; i jov na pyjá, pal-dová so sys čhudó pe bar.

²⁶ Ne kažno, kon šunéla lavá Miré, i na kandéla len, isyn syr balvalitko manúš, kon čhudiá péskiro kher pe práho;

²⁷ i giné bryšynda, i ĥazdynépe réki (leniá), i lyné te phurdén balvalia, i saró pyjá pe davá kher. I pyjá kher, i rospyjape sarésa.’”

Isusóskiro Pravo

²⁸ I sys adiáke: kiéli Isúso končyndia dalé lavá, manušá divindlépe Léskire sykliakiribnastyr,

²⁹ pal-dová so Jov sykliakirdiá, syr Odová, Savéste isyn pravo, a na syr lylvarítka.