Матфеё 4 - Biblija - Pe Baltitko Romani čib (Romanes) 2019

Nálačho Propatiakirela Isusós

¹ Tén'ci lydžijá Dúho (Fáno) Isusós pe čhučí phuv, sob (kaj) te propatiakirel Les nálačho.

² I kiéli Jov postindia štardešá dyvesá i štardešá ratia, Jov zakamdiá te xal.

³ I nálačho podgíia ke Jov i phendiá: “Kóli Tu san Devléskiro Čhavó, phen, sob (kaj) dalé bará te jačen marésa.”

⁴ Ne Jov otphendiá léske: “Isyn čhindló: ‘Na marésa jekhésa dživéla manúš, a kažnoné lavésa, so džála javrí Devléskire uštendyr’”

⁵ Tén'ci léla Les nálačho dro svénto fóro i čhuvéla Les pe Khangirjákiri stréha (čhakín),

⁶ i rakírla Léske: “Kóli Tu san Devléskiro Čhavó, uhty Kokoró telé; pal-dová so isyn čhindló: “Jov déla priphenybén Jangolenge Peskirenge pal Túte i pe vastá jone lydžána Tut, sob (kaj) Tu te na obštavespe (te na obstempinespe) pir bar ĥerjasa Peskirjasa.”

⁷ Isúso phendiá léske: “Isyn adiáke-pac' čhindló: ‘Na propatiakir Ras-Devlés, Devlés péskires.’”

⁸ Nevéstyr léla Les nálačho pe drieván vučy bérga i sykavéla Léske saré svetóskire kralipená i léngire baripena,

⁹ i rakírla Léske: “Saró me dáva Túke, kóli peresa i pokloninesape mánge.”

¹⁰ Tén'ci rakiréla léske Isúso: “Džá Mándyr, nálačho, isyn čhindló: ‘Devléske tyréske kloninpe i Léske jekhéske dynarin.’”

¹¹ Tén'ci mekéla Les nálačho, i ake, Jangóly javné i dynarindlé Léske.

Isúso Léla te Kerél Péskiri Butý dre Galiliéia

¹² Syr šundiá Isúso, so Ianos lyné, to durija dre Galiliéia;

¹³ i gii Nazarietostyr, javdiá i jaciá te dživél ke Kapiernaumo pašýl mórjo (derjáv), pe štéty Zavulonoskire i Niefalimoskire,

¹⁴ sob (kaj) te spolninélpe dová, so phendiá proróko Isajo:

¹⁵ “Phuv Zavulonoskiri i phuv Nafalimoskiri, so isyn pe drom pašýl mórjo (derjáv), pale Iordáno, Najudengiri Galiliéia,

¹⁶ ake, manušá, savé sys bešté dro kalypén, dykhné baró dud (svéto); i pe odolénde, savé isyn sýrby mulé, – pal-dová so jone dživéna bi Devléskiro, zasvencyndia dud.”

¹⁷ Dalé časostyr Isúso lyjá te rakirél: “Riskirén péskiro džiibén ke Devél, pal-dová so javdiá pašyledýr Kralipén dro Bolybnáskiro Rajo.”

Isúso Prikharela Štaré Mačhibnar'jen

¹⁸ Gii pašýl Galilejakiro mórjo (derjáv), Jov dykhciá duje pšalén, Simonos, savés khardé Pétri, i Jendris (Andriejos), léskire pšalés, savé začhurdenas khudia (sietki) dro mórjo (derjáv), pal-dová so jone sys mačhibnarja.

¹⁹ I Jov rakiréla lénge: “Javén Mánca, i Me keráva tuméndyr manušéngire mačhibnar'jen”

²⁰ I jone jekhátyr (srázu) mekné péskire khudia i giné pal Léste.

²¹ I otgii odothýr duredýr, Jov dykhciá duje pšalén, Jakovós čhavés Zaviediejoskires i Ioanos, pšalés leskires, savé sys dre bárka (lodka) léngire dadésa Zaviediejosa, savé kerénas péskire khudia: i Jov khardiá len Pésa;

²² i jone jekhátyr mekné bárka i péskire dadés i giné Lésa.

Isúso Sykliakiréla, Phenéla Devléskiro Lav, i Sastiakirela

²³ I Isúso psirelas pir sarí Galiliéia, sykliakiri manušén pal Devléste dre léngire sinagogi i phení bahtalý zan (zvies') pal Kralipén i sastiakiri kažno nasvalypen i dukh dre manušénde.

²⁴ I gijá mavlýn (malva) pal Léste pir sarí Sirija: i janénas ke Jov sarén manušén, savé sys nasvale i men'čindlepe nalačhé Duhóstyr i čhonytkone nasvalypnastyr, praličostyr, i Jov sastiakirdia len.

²⁵ I giné pal Léste but manušá Galilejatyr, Dešufor'jendyr (Diesiatigradijatyr), Jerusalimóstyr, Judejátyr i pal Iordanostyr.