Матфеё 3 - Biblija - Pe Baltitko Romani čib (Romanes) 2019

Ianoskire-Boldeipnaskireskiro Phenybén pal Devléste

¹ Dre dolé dyvesá javéla Iáno Boldeipnari te phenél lav pir čhučí (pusto) phuv dre Judéia,

² i rakírla: “Priĥaljon péskire gréhi (bizy), kakaná javdiá pašyledýr Kralipén dro Bolybnáskiro Rajo.”

³ Pal-dová so jov isyn odová, pal konéste phendiá proróko Isajo: “Davá isyn zan, saví déla gódla pir čhučí phuv: ‘Kerén drom Ráske-Devléske, čhuvén Léske mamúj drom.’”

⁴ Kokoreste Ianoste sys uribén vierbliudytkone balendyr; cypitko kustýk pe léskire masá; léskiro xabén sys akridy i avgín (meda) feldytko.

⁵ Tedy džánas ke jov saró Jerusalimo i sarí Judéia i saré štéty Iordanoskire,

⁶ i jov boldia len dro Iordáno, paló dová, syr jone priĥaljonas péskire gréhi.

⁷ Ne syr jov dykhciá, so but Farisiéi i Sadukiei džánas te bolenpe ke jov, phendiá lénge: “Tumé san sapitko ródo! Kon sykliakirdiá tumen te našén Devléskire xoliátyr, so javéla syg?

⁸ Kerén vari-so, sob (kaj) te dophenen, so tumé mekné te kerén gréhi i risiné ke Devél.

⁹ I na duminen te rakirén péske: ‘Avraámo sys dad amaró;’ pal-dová so me rakiráva tuménge, so Devél moginéla dalendyr barendyr te ĥazdel bijatén Avraamóske.

¹⁰ Ake, uže tover paštó isyn pašýl kašteskiro kornjo (rukh): kažno kašt (drévo), so na lydžála lačhó barjakirdó (plódo), čingirena telé i čhurdena dre jag.

¹¹ Me bolava tumen paniésa pal tumaró pri ĥalyibén dre gréhi, ne Jov, Savó džála pal mánde, isyn zoraledýr mándyr, Konéske ĥeritka me na som mol te zlav; Jov javéla te bolel tumen Sventoné Duhósa (Fanosa) i jagása.

¹² Léskiro ĥanadytko (lopata) isyn dre Léskiro vast, i Jov žužakirela (čystinela) Péskiro šúrna i skedéla Péskiro parnó giv dre piralý, a phus xačkiréla jagása, saví na murdjola.”

Isusóskiro Boldeipen

¹³ Tén'ci javéla Isúso Galilejatyr ke reka (len') Iordáno ke Iáno, sob (kaj) Iáno te bolel Les.

¹⁴ Iáno ža terdiakirelas Les, rakirí: “Mánge trej te bolavpe Túte, a Tu javésa ke me?”

¹⁵ Ne Isúso otphendiá léske: “Mek adiáke kakaná te javél; pal-dová so adiáke aménge trej te kerás pir kažno čačipén.” Tedy jov domekela Les.

¹⁶ I syr Isúso boldiape, Jov gijá javrí jekhátyr (srázu) paniéstyr, i, ake, bolybén psiradyja (otčhakirdiape), i Iáno dykhciá Devléskiro Dúho (Fáno), Savó džálas telé syr golumbo, i mekelaspe telé pe Isusóste;

¹⁷ I ake, zan bolybnástyr, saví rakirdiá: “Kadavá isyn Miro drógo Čhavó, dre Savéste isyn Mirí bari rádyma.”