Матфеё 2 - Biblija - Pe Baltitko Romani čib (Romanes) 2019

Tanuki Vastokóstyr

¹ Kiéli Isúso bijándyja dro Vifliejémo pe phuv Judéia, kaj Irodo sys králi, javné tanuki (magi) vastokóstyr dro Jerusalimo i rakiréna:

² “Kaj ža isyn Judéngiro Králi, Savó bijándyja? Syr ame dykhciam čergen Léskiri pe vastóko, javdiám te pokloninaspe Léske.”

³ I kiéli králi Irodo šundiá davá, jov drieván zadumindiape (lyjá péske dro šeró), i saró Jerusalimo khetané lésa.

⁴ I skedyjá králi sarén rašángire barydyrén i lylvaritkonen (knižniken), i phuciá léndyr, kaj treindiá te bijandjol Xristóso?

⁵ I jone phendlé léske: “Dro Vifliejémo pe phuv Judéia”; syr i čhindiá proróko:

⁶ “I tu, Vifliejémo, phuv Judaskiri, tu na san tyknedýr Xulandyr Judejátyr; pal-dová so tútyr vydžála Šeraló, Savó javéla te xulainél pe Izrailjoskire manušénde.”

⁷ Tén'ci Irodo čorahanés prikhardia tanuken te vyĥaljol léndyr časo (cýro), dro savó čergen sykadyjá;

⁸ i jov bičhadiá len dro Vifliejémo i phendiá: “Džán i lačhés rozĥaljon pal Bijatoste; i, syr tumé lathéna Les, tedy piridén mánge, sob (kaj) i me adiáke-pac' te javav te pokloninavpe Léske.”

⁹ Kiéli jone vyšundle kralís, giné jone péskire dromésa, i ake, čergen, saví jone dykhné pe vastóko, džálas angíl lénde, paka na terdijá pe štéto, kaj sys Bijáto.

¹⁰ Kiéli jone dykhné čergen, jone drieván obradyndlepe.

¹¹ I jone zaginé dro kher i dykhné Bijatos Marijasa, dasa Leskirjasa, pyné pe čangá i poklonindlepe Léske; tén'či otčhakirde péskire kučipena (sokroviščy) i dyné Léske dáry: suvnakái, ladano i smirna.

¹² I syr jone doresné priphenybén te rakhénpe dro sunó, i te na risjon ke Irodo, to durine jone pe péskiri phuv javire dromésa.

Našaiben dro Jegípto

¹³ Kiéli jone giné, ake, Devléskiro Jangólo, javdiá dro sunó Jozáske i phendiá: “Uštý, le Bijatos i Da Leskirja, naš dro Jegípto, i jav odój angíl davá, syr te phenáv túke: pal-dová so Irodo kaméla te rodél Bijatos, sob (kaj) te muliakirél Les.”

¹⁴ I jov uštyjá, lyjá Bijatos i Da Leskirja ratiákiro, i gijá dro Jegípto,

¹⁵ i sys odój angíl dová, syr te merél Irodoske, sob (kaj) te spolninélpe Devléskiro rakiribén pir prorokoste: “Jegiptóstyr Me khardjom ke Pe Mires Čhavés.”

Irodoskiro Priphenybén te Zamarén Bijatén

¹⁶ Tén'ci Irodo, kiéli dykhciá, so tanuki (magi) xohade les, drieván xoliásyja i bičhadiá te muliakirén sarén bijatén-muršoren dro Vifliejémo i dre saré pašatuné štéty, dujendyr beršéndyr i tyknedýr pir časo, savó jov vyĥalyja tanukendyr.

¹⁷ Tedy spolnindiape prorokoskire-Jeriemiejoskiro rakiribén:

¹⁸ “Zan (glos) sys šundly dre Ráma, roibén, jasva i bari godlyma; Rahíl' rovela pal péskire bijatende, joj na kaméla, sob (kaj) te podrikiren la, pal-dová so len nane butýr.”

Risiben Jegiptóstyr

¹⁹ Ne kiéli myjá Irodo, ake, Devléskiro Jangólo javdiá dro sunó ke Joza dro Jegípto,

²⁰ i rakírla: “Uštý, le Bijatos i Da Leskirja, i džá pe phuv Izrailjoskiri; pal-dová so myné odolé, savé rodenas te muliakirén Bijatos.”

²¹ Jov uštyjá i lyjá Bijatos i Da Leskirja, i gijá pe Izrailjoskiri phuv.

²² Ne kiéli jov šundiá, so Arhielajo sys králi pirí Judéia paló léskire dadéste Irodoste, tedy pyjá dar pe léste dorik te džal; i, syr Devél podphendia léske te rakhelpe angíl dro sunó, Joza gijá pe štéty Galilejakire.

²³ I javdiá jov i lyjá te dživél ke fóro Nazarieto, sob (kaj) te kerélpe pir dová lav, so proróko phendiá: “So Léskiro lav javéla Nazariejo.”