Marko 8 - Biblija - Pe Baltitko Romani čib (Romanes) 2019

Isúso Čaliakirela Štar Tysjoncy Manušén

¹ Dre dola dyvesá, kiéli nevéstyr sys but manušá, i manušénge adalenge na sys nisó te xan, Isúso khardiá sykliaibnytkonén i phendiá:

² “Mánge isyn tango (žalko) adalen manušén, jone trin dyvesá isyn Mánca i lénde na jaciápe xabén;

³ kóli Me rozmekava krig len pir kherá bokhalenca, jone pir drom vymarenape zorjátyr, pal-dová so but léndyr javné durál.”

⁴ “A syr ame adáj pe dasavo štéto, kaj nisó nane, lathasa adákicy maró, sob (kaj) sarén te čaliakiras?” – otphendlé sykliaibnýtka.

⁵ “Kicý tuménde isyn laby maró?”, – phuciá tedy Isúso. “Eftá (bitrinéngiro deš)”, – phendlé sykliaibnýtka.

⁶ Tedy Isúso phendiá sarénge te bešén pe phuv, lyjá eftá laby, parikirdia Devléske pal davá, phagirdiá maró i lyjá te piridel len sykliaibnytkonénge, a odolé rozdenas maró manušénge.

⁷ Lathnepe lénde i nabutka mačhé; Isúso parikirdia Devléske pal lénde i phendiá sykliaibnytkonénge te rozden len.

⁸ Saré xané i čalyne i koterá, savé jačnépe, jone skedyné dre eftá korzíny (khudé).

⁹ Sarén, kon xaja, sys štar tysjoncy manušén. Tén'ci Isúso rozmekcia manušén,

¹⁰ I jekhátyr Jov besciá dre bárka i khetané sykliaibnytkonénca javdiá ke Dalmanufakire štéty.

Trébima dro Dívo

¹¹ Odój ke Isúso podginé Farisiéi i lyné te dophenen Léske. Lénge treindiá te uhtylén Les dro lav i jone trebindle Léstyr ĥiertýk (znamiénijo), sob (kaj) te sprobinen Les.

¹² Isúso xor dyjá ĥondiá i phendiá: “Palsó adalé manušá trebinena dívy? Rakiráva tuménge čačipén: ni saví ĥiertýk tuménge na javéla.”

¹³ Jov jačkirdiá len, nevéstyr besciá dre bárka i dyjape pe javír rig.

Farisiejengire i Irodengire Droždžy (Xumer)

¹⁴ I sykliaibnýtka bistyrde te len pésa maró, lénde dre bárka sys jekh marikly.

¹⁵ Pir drom Isúso lénge priphendiá: “Dykhén, rakhénpe Farisiejengire roščynatyr (zakvaskatyr) i kralískire Irodoskire roščynatyr.”

¹⁶ I lyné jone te rozduminen maškír péste: “Palsó da Jov rakiréla pal droždžy? Naúšto paldová, so ame na lyjam peso maró?”

¹⁷ Isúso udžindiá davá, phendiá lénge: “Rakiribén na pal dová, so tumé na lyné maró. Naúšto usajékh tumé kakaná na dykhéna, i na ĥaljona? Naúšto ile tumaré sarésa zašutine?

¹⁸ Naúšto, kóli tuménde isyn jakhá, tumé usajékh na dykhéna? Isyn kaná, tumé usajékh na šunéna? A syr ža tumé na ripirena.

¹⁹ Kóli Me phagirdjom pandž maré pe pandž tysjoncy manušénde, kicý pherdé korzíny (khudé) koterenca tumé skedyné?” “Dešudúi”, – rakiréna Léske.

²⁰ “Ne kóli Me eftá (bitrinéngiro deš) labenca čaliakirdjom štar tysjoncy manušén, kicý pherdé khudé koterenca tumé skedyné?” “Eftá”, – phendlé jone Léske.

²¹ Isúso phendiá: “Ne syr ža tumé usajékh na ĥaljona?”

Isúso Sastiakirela Korores dre Vifsaida

²² Jone javné dre Vifsaida; ke Isúso jandlé korores, i mangné Les, sob (kaj) Jov te čilavel les.

²³ Isúso lyjá korores pal vast, lydžijá gavestyr, čungardia pe léskire jakhá, čhudiá vastá upré pe léste i phuciá: “Dykhésa vari-so?”

²⁴ Odová podykhciá trusciál (krugom) i rakiréla: “Dykháva manušén; jone psiréna sýrby kaštá (drevy).”

²⁵ Isúso iščo (inké) jékhvar čhudiá vastá léske pe jakhá, odová manúš podykhciá kučes i sastija, jov jaciá te dykhél saró jasnes i šukár!

²⁶ Isúso bičhadiá les kheré priphenybnasa: “Ne džá pale dro gav i na rákir ni konesa odój.”

Petriskiro Pri ĥalyibén Isusóske

²⁷ Isúso sykliaibnytkonénca giné Galilejatyr dre gavá Kiesarijakire Filiposkire. Pir drom Isúso phuciá Péskire sykliaibnytkonendyr: “Pal konéste Man priléna manušá?”

²⁸ Sykliaibnýtka otphendlé Léske: “Jekh rakiréna, so Tu san Iáno Boldeipnari; javír rakiréna, so Tu san Ilíia; trita, so Tu san jekh ĥaratuné prorokendyr.”

²⁹ “A tumé pal konéste Man ginéna?” I Pétri otphenéla Léske: “Tu san Xristóso.”

³⁰ I Isúso priphendiá šylales lénge te na rakirén ni konéske pal davá.

Isúso Rakiréla pal Mén'ki, Save Javéna Léske

³¹ I Isúso lyjá te sykliakirél len, so Manušéskire Čhavéske javéna darane mén'ki, so Les na priĥaljona godephuré i rašángire barydyrá, so Jov javéla muliakirdo, i pir trin dyvesá Jov otdžidjola.

³² Jov mamúj (priames) rakirélas pal davá. I Pétri khardiá Les dre rig i lyjá te vyrakirel Les.

³³ Isúso risijá i dykhciá Péskire sykliaibnytkonén i priphendiá šylales Petriske: “Krig Mándyr, nálačho! Tu duminesa pal manušýtko, a na pal Devlýtko.”

³⁴ I Jov khardiá manušén i Péskire sykliaibnytkonén i phendiá lénge: “Konéste isyn pe iló te džal pal Mánde, mek te otphenelpe péstyr, mek te lel trušúl péskiro i te džal pal Mánde.

³⁵ Pal-dová so, kon myslinela dro iló džiibén péskiro te zrakhél, odová xasiakiréla les, i kon otdéla džiibén péskiro pal Mánde i pal Jevángielija – odová zrakhéla les.

³⁶ Ne savó lačhipén javéla manušéske, kóli léste javéla saró, so léske trej dalé svetóstyr, a jov xasiakiréla péskiro viéčno džiibén.

³⁷ Naúšto saštý (moginéla) te javél pe svéto vari-so, so isyn kučedyr péskire viečnone džiibnastyr?

³⁸ Kon kadavá grehitkoné i biladžaipnytkone rodóstyr ladžala Mándyr i lavéndyr Mirendyr, odoléstyr i Čhavó Manušéskiro ladžala, kiéli javéla dre Dadéskire – Péskiri jarko sláva sventoné Jangolenca.”