Marko 7 - Biblija - Pe Baltitko Romani čib (Romanes) 2019

Ĥaratuno Judýtko Sykliaiben pal Žužó i Nažužo

¹ Jekhvar javné Farisiéi i vari-savé lylvaritkonendyr, savé javné Jerusalimóstyr, i skedynépe pašýl Léste.

² I dykhné, so vari-savé Léskire sykliaibnýtka xána “melale vasténca”, so značynéla, “na móri vastá.”

³ Réndo (diélo) dro dová, so saré Farisiéi i saré Judy pririkirenpe ke phurengire-šeralengire prisykliaibena: jone na bešena te xan, paka na vymorna vastá,

⁴ i kiéli jone javéna targostyr, jone na bešena te xan, paka na vymorena vastá; sys i but javír priphenybená te rakhén: te moren tahtaja (čašy), musera (stakany) i xarkuné (miedítka) pirja;

⁵ paldová Farisiéi i lylvarítka phučné Isusóstyr: “Sóske Tyré sykliaibnýtka na keréna pir ĥaratuné-manušéngire prisykliaibena? Sóske jone xána maró namorde vasténca?”

⁶ I Jov phendiá lénge: “Čačipén phendiá proróko Isajo, syr jov rakirdiá pal tuménde, dujemuitkonende: ‘Adalé manušá kutiakirena man pe lavá, a čačunés ile léngire isyn dur Mándyr;

⁷ léngiro kutiakiriben Mánge nisó na mol. Jone sykliakiréna dová, so manušá pridumindle.’”

⁸ Tumé jačkirdé priphenybená Devléskire i keréna féni (tóka) pir manušýtka prisykliaibena.

⁹ Tumé šukár moginéna te otparuven Devléskire priphenybená pe péskire prisykliaibena”, – rakirdiá Isúso.

¹⁰ Mójza ž phendiá: “Kutiakir dadés péskires i peskirjá da”, i, “Kon rakiréla našukar pe dadéste peskireste ci date, te merél adavá manúš.

¹¹ Ne tumé sykliakiréna, so kóli manušéste isyn vari-so te pomoginel léskire dáke ci dadéske i jov phenéla: ‘Davá isyn Korbano (davá značynéla, so davá isyn dáro Devléske)’,

¹² tedy tumé dalésa samonesa sykliakiréna manušén te na kerén butýr nisó vaš péskire dadénge,

¹³ tumé otparuvena dalésa Devléskiro lav péskire prisykliaibnenca , i dasavé primiery (sykaibena) saštý te javén te dav but.”

¹⁴ I Isúso nevéstyr khardiá ke Pe manušén i phendiá: “Šunén Man i saré pričhuvén zor te ĥaljon:

¹⁵ Nisó daléstyr, so džála andré javrestyr dre manušéste, na moginéla te kerél manušés nažužesa; nažužesa manušés butedýr keréla dová, so džála javrí léstyr.”

¹⁶ [Konéste isyn kaná, mek te šunél!-ju.o.]

¹⁷ I kiéli Jov mekciá len i gijá dro kher, Léskire sykliaibnýtka phučné Léstyr pal primiéro (sykaibén).

¹⁸ I Jov phendiá lénge: “Naúšto i tumé iščo (inké) na ĥaljona? Nisó, so džála andré javriestyr dre manušéste, na moginéla te kerél les nažužesa,

¹⁹ pal-dová so, davá džála andré na dro iló Manušéskiro, a dre léskiro kužum i džála javrí léstyr.” (Dalé lavénca Isúso rakiréla, so kažno xabén isyn žužó).

²⁰ I Jov rakirdiá: “Dová, so vydžála manušéstyr, kodová keréla manušés nažužesa;

²¹ pal-dová so manušéskire iléstyr vydžána nalačhé dúmy, napatiaiben dre sém'ia (irí), čoriben, zamariben,

²² bléndo, skvapnyma, frotyma, xolý, ladžave réndy, jakhalo, phut'kiribén, dylnypén.

²³ Saró davá fuipén džála javrí manušéstyr, i keréla les melalesa.”

Džuvliákiro Patiaibén

²⁴ I uštyi, Isúso gijá odothýr dre Tironoskire štéty. I kiéli zagijá Jov dro kher, Jov na myslindia dro iló, sob (kaj) vari-kon te džinél, so Jov odój sys; ne Jov na mogindiá te ĥaradjol.

²⁵ Mavlýn (malva), so javdiá Isúso, rozgijápe sýges, i ke Jov javdiá džuvlý, savjakire čhate sys nálačho dúho (fáno). Joj iavdiá i pyjá ke Léskire ĥerá;

²⁶ adáia džuvlý sys griečanka (balamica) Sirofinijankakire rodóstyr i jaciá te mangél Isusós te vytradel nálačho dúho (fáno) čhatyr.

²⁷ I Jov rakirdiá láke: “Mek angledýr te čaliakiren čalés bijatén, pal-dová so na šukár te las krig maró bijatendyr i te čhurdas džuklenge.”

²⁸ Ne joj otphendiá i phendiá Léske: “Čačó, Rajo Dévla, ne i džukela tel skamínd xána bijatengire koterá, so bijaty mekéna.”

²⁹ I Jov phendiá láke: “Pal davá lav, džá; vygijá nálačho dúho (fáno) tyré čhatyr.”

³⁰ Joj risijá kheré, i čhaj lákiri sys pašty dro čhuibén, nálačho dúho (fáno) vygijá látyr.

Isúso Sastiakirdia Kašukes

³¹ I nevéstyr Isúso vygijá Tironoskire šteténdyr pirdál Sidono ke Galilejakiro mórjo (derjáv) pe Dešufor'jengiri phuv.

³² Odój ke Isúso jandlé kašukes i, savó rakirélas pharés i mangné Les te čhuvél vastá pe léste.

³³ Isúso lydžijá les dre rig, čhudiá andré péskire angušta (pal'cy) léske dre kaná. Tén'ci Jov čungardyja i čiladiá léskiri čib,

³⁴ i ĥazdyjá jov jakhá ke bolybén, pharés dyjá ĥondiá (dykhnindia dre péste) i phendiá manušéske: “Jeffata!” (So značynéla: “Otkerpe”).

³⁵ I léskire kaná otkerdepe, i léskiri čib lyjá šukár i jasnes te rakirél.

³⁶ Isúso priphendiá lénge te na rosphenén pal davá nikonéske. Ne, so butýr Jov priphenelas, adiáke jone butýr rozlydžanas mavlýn.

³⁷ I jone zoralés divindlépe i rakirdé: “Saró šukár, so Jov kerdiá, Jov až kašuken i bičibitkonen vysastiakirdiá.”