Marko 4 - Biblija - Pe Baltitko Romani čib (Romanes) 2019

Pal Sieinybnariste

¹ Isúso nevéstyr (nevés) sykliakirelas pe morjoskiro (derjavéskiro) brégo; pašýl Léste skedynépe adákicy manušá, so Jov besciá dre bárka, sob (kaj) te javél dro mórjo (derjáv), a, sob (kaj) saré manušá te jačénpe pe phuv pe brégo.

² Isúso sykliakirelas len buté primierenca (sykaibnenca), rakirí:

³ “Šunén! Jekh gavitko vygijá pe félda te sieinel

⁴ i sys adiáke: kiéli jov rosčhurdelas ziárki, tedy vari-savé ziárki pyné pašýl drom. Privurniandyne čirikliá i xané len.

⁵ Javír ziárki pyné pe baruno štéto, kaj sys nábut phuv; jone barine upré sýges, syr na sys xor dre phuv;

⁶ a kóli jaciá xačkiribén khamestyr, rostki (ščuki) murdalyne (zvianindle) i zašutine, pal-dová so kórni (rukhá) lénde na xor sys.

⁷ Javír ziárki pyné dre dylyny čar, dylyné čarjá barine upré i zamardé len, i jone na dyné pribaripen.

⁸ A javír ziárki pyné pe lačhí phuv, dyné pribaripen dre trijánda i dešušovdeša i šel móly!”

⁹ I Isúso rakirdiá lénge: “Konéste isyn kaná, mek te šunél.”

Savó isyn Smyslo dre Isusóskire Primiery (Sykaibena)

¹⁰ Kiéli manušá rozginepe i Isusósa jačnépe dešudúj i javír manušá, savé šundlé Les, jone phučné Léstyr, so značynena dalé primiery (sykaibena)?

¹¹ I Jov rakirdiá lénge: “Garadé čačipená Devléskire Kralipnaskire dyné tuménge. Ne kon isyn durál Kralipnastyr, odolénge rakirelape primierenca (sykaibnenca).

¹² Jone dykhéna jakhénca, i na dykhéna, jone šunéna, i na ĥaljona; a kóli jone riskirenas péskiro džiibén ke Devél, tedy jone javénas primangne.”

Isúso Rosphenéla Smyslo dre Primiery (Sykaibena)

¹³ Duredýr rakiréla Jov: “Naúšto i tumé na ĥaljona davá primiéro (sykaibén)? Syr tumé tedy ĥaljona saré primiery (sykaibena)?

¹⁴ Sieinybnaskiro čhuvéla dre phuv Devléskiro lav.

¹⁵ Isyn manušá, savé isyn sýrby daja ziárka pašýl drom. Syr féni (tóka) jone šunéna lav, to javéla nálačho i čorela les léndyr.

¹⁶ Isyn adasavé manušá, savé isyn sýrby daja ziárka, saví posieindly pe baruno štéto: jone šunéna lav i jekhátyr (srázu), ake, priléna les radymása.

¹⁷ A adiáke, syr kórni (rukhá) xor lénde nane, tedy jone sys sarésa nadlenga. Kóli pal prilyno lav jone dykhéna tradypen i pharipén, jone mekéna lav jekhátyr.

¹⁸ Javír ziárki, savé počhude dre dylyny čar, isyn sýrby manušá, savé šunéna lav:

¹⁹ ne kažno dyvesýtko košybén, xohaibén pal barvalypén, javír mysli pe iló javéna i murdiakirena dre lénde lav i keréna les bibarjakirdoneskiresa.

²⁰ Ziárki, savé počhude pe lačhí phuv, isyn sýrby manušá, savé šunéna lav, priléna les i déna pribaripen dre trijánda i dre šovdešá i dre šel móly.”

Pal Momoly

²¹ Isúso phendiá lénge: “Kóli zahačkirena momoly, na čhuvéna la tel piriskirdy pirí ci tel čhuibén? Naúšto na čhuvéna la dro šandalo (podsviečniko)?

²² Pal-dová so nisó nane čorahano; sob (kaj) te na javél bicialó (dyc'lo), nisó nane sčhakirdo, sob (kaj) te na vydžál pe dud (svéto), pe jakhá manušénge.

²³ Konéste isyn kaná, mek te šunél!”

²⁴ I rakirdiá lénge: “Ripiren mištó davá, so tumé kakaná šunéna: savjása mierasa tumé mierinena, adiáke tumen javéna te mierinen i iščo (inké) butýr.

²⁵ A konéste isyn, odoléske iščo (inké) javéla dynó, a konéste nane, odoléstyr javéla otlyno i dová nábut, so isyn.”

Primiéro (Sykaibén) pal Ziárka

²⁶ Isúso rakirdiá duredýr: “Devléskiro Kralipén isyn sýrby jekh manúš, savó sieinela félda;

²⁷ i ratý manúš isyn sutó, pe zlóko (pe ránko) uštéla, i prodžána (nakhena) dyvesá, ziárki ĥazdénape i barjona, a manúš kokoró na džinéla, syr davá saró kerélape.

²⁸ A phuv kokori barjakiréla. Angíl sykadjola rostko (ščuko), tén'či koloso, koloso pherdjola ziarkasa.

²⁹ Kóli ziárka vyspiainela, javéla sčhinyben, tedy gavitko javéla sierposa (čhindlesa) te čhinel.”

Primiéro (Sykaibén) pal Garčyčno Ziárka

³⁰ Isúso rakirélas duredýr: “Sósa saštý (možna) te roŭninas Devléskiro Kralipén? Save primierosa (sykaibnasa) saštý les te sykavas?

³¹ Jov isyn syr garčyčno ziárka, saví isyn naj tyknedýr saré ziarkendyr pe phuv, i manúš čhuvéla la dre phuv,

³² Ne kiéli joj vybyrjola, tén'či javéla baredýr javirendyr barjakirdone raslinendyr. Tel lákire baré randiá čirikliá moginéna te khuven gniázdy (kúfy) dre randiengiri zer (tienjo).”

³³ Adiáke primierenca (sykaibnenca) Isúso sykliakirdiá manušén pe adákicy, pe kici jone mogindlé te ĥaljon;

³⁴ bi primierengiro Jov sarésa na sykliakirdiá, ne kiéli Jov jačelaspe jekhdžinó péskire sykliaibnytkonénca, Jov saró piriphenelas lénge.

Isúso Štyliakirela Štormo

³⁵ Dro dová dyvés, bel'velié, Isúso phendiá Ppeskire sykliaibnytkonénge: “Piridžasa pe javír rig.”

³⁶ I kiéli jone otmekne manušén, jone lyné Les pésa dre daja-pac' bárka, kaj Isúso sys; i javír barki sys Lésa.

³⁷ I, ake, pe mórjo (derjáv) ĥazdyjápe zoralý balvál. Pani marelas zoralés pir barkakiro borto i začhuvelas la.

³⁸ Isúso dro dová časo sys sutó pe korma, čhuvi šeranduny tel šeró. Sykliaibnýtka džangavenas Les, i phendlé Léske: “Sykliakiribnáskiro! Túke so, usajékh isyn, so ame xasjovasa?”

³⁹ Isúso uštyjá, priphendiá balvaliake te na phurdel i phendiá valnenge: “Štyl! Pirijačen!” I balvál štylyja i jaciá divno štylypen.

⁴⁰ “Ne, so tumé strahádyne? – phendiá Jov lénge, – kaj isyn tumaró patiaibén?”

⁴¹ Piristrahade sykliaibnýtka phučenas jekh jekhestyr: “Ne kon Jov isyn adasavó, so i balvál i mórjo (derjáv) Les kandéna?”