Marko 13 - Biblija - Pe Baltitko Romani čib (Romanes) 2019

Pal Khangirjákiro Rosphagiriben

¹ Kiéli Isúso vydžálas Khangirjátyr, jekh sykliaibnytkonendyr rakiréla Léske: “Dykh, Sykliakiribnariskiro! Save bará! Save uprekeribena!”

² “Tu dykhésa saré dalé baré kherá?”, – phendiá Léske Isúso. “Na jačélape adáj bar pe bar, savó na javélas čhurdynó telé.”

Pharé Piridživipena i Tradypena

³ Kiéli Isúso sys beštó pe Olivitkone-bergákiro sklono angíl Khangirí, sykliaibnýtka Pétri, Jakovo, Iáno i Jendri phučenas Léstyr jekh pe jekh javirendyr:

⁴ “Phen aménge, kiéli davá saró javéla i saví špéra (znako) javéla angíl, syr saró davá kerélape?”

⁵ Isúso otphendiá Lénge: “Rakhénpe, sob (kaj) nikón te na xohavél tumen.

⁶ But javéna ke tumé Miré lavésa i javéna te rakirén: ‘Me som’, i buten xohavena.

⁷ Kiéli tumé šunena pal maribén i mavlynia (malvy) pal maribena, na andyršan. Saró davá trej te javél, ne davá iščo (inké) na saró.

⁸ Pal-dová so ĥazdénape manušá pe manušénde i kralipén pe kralipén. Dre rázna štéty javéla te trinskirelpe phuv i javéla bokh. Saró davá javéla angíl sýrby dukhá, dre savé nevó manúš bijandjola,

⁹ Dykhén ža pal péste; tumen javéna te sendinén, i javéna te marén dre sinagogi. Pal Mánde tumen javéna te tyrden angíl rande i kral'jénde, i tumé javéna te dophenen lénge pal Mánde.

¹⁰ Ne angledýr saréstyr trej te phenelpe lav Jevangielijatyr vaš saré nácyi.

¹¹ Kiéli tumen lydžána te zden, na piridživen angíl, so tuménge te rakirén; rakirén dová, so tuménge javéla dynó dre dová-pac' mardó (štúnda) te rakirén; pal-dová so na tumé kokoré javéna te rakirén, a Svénto Dúho (Fáno).

¹² Pšal javéla te biknel pe meribén pšalés i dad javéla te biknel péskires bijatós; čhavoré javéna te biknen péskire daden, sob (kaj) te muliakirén len.

¹³ Saré javéna te na den patýv zoralés tuménge pal Miro lav; a odová, savó vyrikiréla saró davá, javéla zrakhno.

Zamekibnaskiro Džungalypén (Brytkima)

¹⁴ Kiéli tumé dykhéna golotyniakiro/ zamekibnaskiro džungalypén (brytkima), odój, kaj láke na treindiá te javél (mek te ĥaljol odová, kon ginéla), ĥáda, mek odolé, savé isyn dre Judéia, te našén dre bérgi;

¹⁵ kon isyn pe kherítko bérga, mek te na zdžal telé, i te na džal tele dro kher te lel vari-so kheréskire mištypnástyr.

¹⁶ Kon isyn dre félda, mek te na risjol pale te lel péskiro uribén.

¹⁷ Men'ka javéla tedy perale džuvlienge i džuvlienge, savé čaravena kolynesa tyknoren dre dolé dyvesá!

¹⁸ Mangénpe Devléske, sob (kaj) davá te na javél ivantakiro/ivendeskiro (zimakiro).

¹⁹ Tedy javéla dasaví pharí bída, saví na sys svetóskire anglypnástyr, savó Devél kerdiá, ke adadyvés, i so butýr na javéla nijékhvar.

²⁰ I kóli Devél te na tykniakirelas dalé dyvesá, tedy nikón na vydživelas. A vaš manušénge, savén Jov Kokoró vykedyjá, Jov tykniakirdia dalé dyvesá.

²¹ Tén'ci kóli vari-kon phenéla tuménge: ‘Ĥáda, isyn Xristóso!’ Ci ‘Jov isyn odój’, – na patián,

²² iavéna xohané Xristosy, xohané proróki; jone sykavéna baré ĥertyka (znamiénii) i keréna dívy, sob (kaj) te xohaven až kodolén manušén, savén Devél vykedyjá, kóli javéla saštý.

²³ Rakhénpe. Me tuménge saró angíl phendjom.

Čhavéskire-Manušéskiro Javiben

²⁴ A dro dolé dyvesá, syr prodžála (nakhela) daja pharí bída, kham murdjola, i čhon na javéla te svencynel péskire svetosa (losasa),

²⁵ i čergeniá peréna bolybnástyr, i bolybnáskire zorja javéna trinskirde.

²⁶ Tedy manušá dykhéna Manušéskire Čhavés, Savó javéla te džal dre óbloki baré zorjása i dre sláva.

²⁷ I tedy bičhavéla Jov Péskire Jangolen i skedéla khetané, konés Jov vykedyjá štaré rigéndyr, phuvjákire jagoróstyr (krajostyr) ke Bolybnáskiro jagóro.

²⁸ Sykljon primiéro (sykaibén) inžyritkone kaštéstyr: kiéli léskire randiá jačéna kovlé i mekéna patria (listy), to tumé džinén, so syg javéla lynaj (nilaj)

²⁹ adiáke i tumé, syr dykhéna, so davá saró adiáke kerlape, džinén, so Jov isyn nádur, pašýl vudará.

³⁰ Čačes, Me rakiráva tuménge: na prodžála davá manušýtko ródo, paka saró davá kerélape ke kónco/ke jagóro (spolninelape).

³¹ Bolybén i phuv prodžána, a lavá Miré na prodžána.

Dyvés ci Mardó Nadžindle

³² Nikón na džinéla ni dyvés, ni mardó (štúnda), kiéli davá saró javéla, ni bolybnáskire Jangóly, ni Čhavó – a jekh Dad džinéla.

³³ Dykhén, i rakhénpe i mangénpe Devléske: pal-dová so tumé na džinéna, kiéli dasavo časo javéla.

³⁴ Davá saštý (možna) te primierines manušésa, savó gijá dro daratuno drom. Jov jačkiréla péskiro kher, sob (kaj) te pridykhen pishárja. Kažnonéske pisharíske jov déla zadyiben, a odoléske, savó sys terdó pašýl pórta, priphendiá te dykhél rakhunes (pil'nes).

³⁵ Adiáke i tumé: “Dykhén, na soven!” Pal-dová so tumé na džinéna, kiéli risjola kheréskiro xulái: moginéla dre paš rat, ci syr probagala bašno, ci pe zlóko;

³⁶ sob (kaj), kiéli jov javéla, te na zauhtylel tumen, so tumé san suté.

³⁷ I dová, so Me rakiráva tuménge, rakiráva sarénge: rakhénpe!”