Marko 12 - Biblija - Pe Baltitko Romani čib (Romanes) 2019

Pal Manušéste, Savó Zdyja dro Najmo Vinagrádniko

¹ I Isúso lyjá te rakirél manušénge primierenca (sykaibnenca): “Jekh manúš čhudiá vinagrádniko, i tyno pašýl léste, vy ĥanadia ĥanbín (jama) te tasavel mol (vino) i kerdiá vučardý (vyška) te rakhén, i zdyja les vinagradar'jenge dro najmo i kokoró tradyjá.

² Ne kiéli javdiá časo, jov bičhadiá ke vinagradarja jekhe péskire pishar'jendyr te lel péskiri paš aplodostyr,

³ ne vinagradarja uhtyldé les, mardé i otbičhade les krig nisosa.

⁴ Tedy jov bičhadiá nevéstyr ke jone javire pisharís, ne i léske pharade šeró barénca i ladžakirdé les.

⁵ I bičhadiá tritone dynarís; a les vinagradarja sarésa zamardé; konés xuláj na bičhavelas, jone sarén marenas ci zamarenas.

⁶ Léste butýr ni konés na jačelaspe te bičhavel apríč péskire jekhe drogoné čhavéste. “Ne, ĥáda, jone na čilavena miré čhavés”, – dumindia jov i bičhadiá les dro kónco (dro jagóro).

⁷ I vinagradarja phendlé jekh jekhéske: “'Gada, isyn nasliedniko (prilyibnaskiro pe mištypén): javén, zamarasa les i vinagrádniko javéla amaró.”

⁸ Jone lyné les, zamardé i čhurdyné javrí les vinagradnikostyr.

⁹ So javéla te kerél vinagradnikoskiro xulái? Jov javéla, muliakiréla vinagradar'jen, a vinagrádniko zdela javirénge.

¹⁰ Ci na gindlé tumé dro Čhinybén: ‘Bar, savó na prilyné butiarné, jaciá šeralé baresa pe venglo vaš kher.

¹¹ Davá isyn Devléstyr i isyn divno dro amaré jakhá’”

¹² I jone rodenas saštypen te uhtylel Les, ne darándyne manušéndyr, pal-dová so jone ĥalyné, so Jov rakirdiá davá primiéro (sykaibén) pal lénde; jone mekné Les i giné krig.

Myto Kiesarjoske

¹³ I jone bičhadé ke Isúso vari-savé Farisiejendyr i Irodianendyr, sob (kaj) te uhtylén Les dro lav.

¹⁴ Kodolé manušá javné ke Isúso i phučné: “Sykliakiribnáskiro! Ame džinása, so Tu san čačunó i sykliakiresa Devléskire čačipnenge, na dykhí pe manušéskiro štéto maškír javire manušénde, Tu na daresa nikonestyr; phen aménge čačunés: ci pir Zakóno te pleskiras myto kiesarjoske? Te pleskiras aménge ci nad?”

¹⁵ Isúso džindiá léngiri frotyma i phendiá lénge: “Sóske tumé kaména te propatiakiren Man?” – phuciá Jov. “Janén Mánge dinarijo te dykháv.”

¹⁶ Léske jandlé ĥasprin (kapieika) i Jov phuciá léndyr: “Konéskiro muj i lav isyn vyčhindlé adái?” “Kiesarjoskiro”, – phendlé jone Léske.

¹⁷ Tedy Isúso phendiá lénge: “Otdén kiesarjoskiro kiesarjoske, a Devléskiro Devléske.” Jone drieván divindlépe Léstyr.

Pal Lyiben i pal Otžidyipen Muléndyr

¹⁸ I javné vari-savé Sadukiei ke Isúso. Sadukiei rakirdé, so nane otdžidyipen meribnástyr. Jone jačné te phučén Léstyr:

¹⁹ “Sykliakiribnáskiro! Mójza čhindiá vaš aménge: kóli vari-konéste pšal meréla i jačkiréla džuvliá bi čhavorengiro, mek léskiro pšal te lel adalia džuvliá paloróm, sob (kaj) te riskirél pale ródo mulé pšaleskiro.

²⁰ Sys eftá bitrinéngiro deš pšála; i pérvo pšal lyjá romniá, i myjá, na jačkirdiá péske ródo;

²¹ i javír lyjá la i myjá, na jačkirdiá péske ródo: i tríto pšal adiáke-pac';

²² i saré eftá na jačkirdé čhavorén. Syg pal sarénde i džuvlý myjá.

²³ Dro otdžidyipen, kiéli jone uštena meribnástyr, konéskiri romný javéla kadaja džuvlý? Pal-dová so saré eftá pšála sys lákire romá.”

²⁴ Isúso phendiá lénge: “Tumé xohavenape, pal-dová so tumé na džinéna ni Čhinybén, ni zor Devléskiri?

²⁵ Save otdžidjona meribnástyr, na javéna te vydžán paloróm; i na javéna te lenpe; a jone javéna syr Jangóly dro Bolybnáskiro Rajo.

²⁶ Kakaná, rakirí pal otdžidyipen muléndyr: ci na gindlé tumé dre Mojzáskire lylvaria pal dová, syr Devél phendiá Léske Péskiro lav xrustostyr, savó xačolas jagása: ‘Me som Devél Avraamóskiro, Devél Isaakoskiro i Devél Jakovóskiro?’”

²⁷ Jov isyn Devél na mulenge, Jov isyn Devél džidé-manušéngiro! Tumé drieván xohavenape.”

Naj Zoraledýr Priphenybén

²⁸ Jekh lylvaritkonendyr šundiá, syr jone dophenenas Léske, to pri'galyja, syr mištés Isúso otphendiá lénge i phuciá Léstyr: “Savó priphenybén isyn baredýr saréndyr?”

²⁹ Isúso otphendiá: “Ĥáda, isyn baredýr saréndyr: ‘Šun Izrailjo! Raj Devél amaró isyn jekh Devél;

³⁰ rikir dro péste syr Drógima Ras-Devlés tyrés saré ilésa peskiresa i saré Duhósa tyresa i saré godiása tyrjasa i saré zorjása tyrjasa’.

³¹ Javír priphenybén isyn syr pérvo: ‘Rikir dro iló pašatunes tyrés, syr kokoró pes’. Nane priphenybená baredýr dalendyr.”

³² “Mištó! Čačipén Tu phendián, Sykliakiribnáskiro, – phendiá Léske lylvarítko, – “Devél isyn Jekh i javír butýr nane apríč Léste;

³³ i te rikires syr Drógima Les saré ilésa, saré godiása, saré zorjása, te rikires dro iló pašatunes péskires, syr kokoró pes-butýr, syr celoné-xačkiribnaskire dyibená i svénta dyibená.”

³⁴ Isúso dykhciá, so lylvarítko god'vares otphendiá i phendiá Léske: “Nadur tu san Devléskire Kralipnastyr.” Dolé molostyr nikoneste butýr na sys muršypen te zadel Isusóske butýr phučibena.

³⁵ I, kiéli nevéstyr Isúso sykliakirdiá dre Khangirí, Jov otphenélas: “Syr adalé lylvarítka rakiréna, so Xristóso isyn Čhavó Davidóskiro?”

³⁶ Davído ža Kokoró phendiá Sventoné Duhósa: “Phendia Raj Devél Ráske-Devléske miréske: beš pe čačó (pravo) vast Mándyr, paka Me čhuváva vergén Tyrén tel ĥerá tyré.”

³⁷ Davído ž Kokoró khardiá Les “Raj Devél”, katýr ža Jov isyn Čhavó Léskiro?” I but manušá šundlé Les radymása.

³⁸ I rakirdiá Isúso duredýr dro Péskiro sykliakiribén: “Rakhénpe lylvaritkonendyr, savénge pir iló te psirén dre dlenge uribená i lénge trej, sob (kaj) te patyvakiren len pe targitka štéty;

³⁹ savé vykedena te bešén pe anglatuné štéty dre sinagogi i pal khardé skaminda,

⁴⁰ savé obhana pivliengire (udovengire) kherá i mangénape ĥará (dlúges), sob (kaj) len te dykhén; adasaven manušén užakiréla pharó sendiakiriben.”

Čororé-Pivliakiro Dyibén

⁴¹ I Isúso besciá angíl Khangirjákire-lovitko piralý (tyknori) i dykhciá, syr manušá čhuvénas lové dre piralý. But barvalé manušá čhuvénas baré kicypena lové.

⁴² Ne ĥáda, podgíia čorori pivly (udova), i čhudiá duj xarkuné ĥaspria (miedítka gaspria), so isyn syr jekh kodranto.

⁴³ Jov khardiá Péskire Sykliaibnytkonén i phendiá: “Čačes, Me rakiráva tuménge: adáia čorori pivly čhudiá butýr saréndyr, savé čhuvénas dre tyknori,

⁴⁴ pal-dová so jone čhuvénas péskire balvalypnastyr, a joj péskire čororipnastyr dyjá saró, so láte sys, saró so sys láte te dživél.”