Marko 1 - Biblija - Pe Baltitko Romani čib (Romanes) 2019

Iáno Boldeipnari

¹ Davá isyn Jevangielijakiro anglypén (načalo) Isusóskiro Xristosóskiro, Devléskire Čhavéskiro.

² Syr isyn čhindló dre Isajoskire-prorokoskiri lylvarí: “Ake, Me bičhaváva Miré vykedyné manušés angíl Túte, savó keréla drom Túke:

³ Ake, isyn zan, saví déla gódla pe čhučí (pusto) phuv: ‘Kerén drom Ráske-Devléske, čhuvén Léske mamúj (roŭno) drom.’”

⁴ Iáno Boldeipnari javdiá pe čhučí phuv, sykliakiri len te riskirén péskiro džiibén ke Devél vaš dová, sob (kaj) Jov te otmekél gréhi angíl boldeipen.

⁵ I džánas ke jov but manušá Judejákire phuvjátyr i Jerusalimóstyr, jone priĥaljonas péskire gréhi, i jov boldia len dre reka (len') Iordáno.

⁶ Iáno sys uridó dro uribén vierbliudytkone balendyr, pe léste sys trusciál (vokrug) trušúl cypitko kustýk, jov xaja saranča i avgín (meda) vešytkone berliniendyr (pčolendyr).

⁷ Dre léskire-phenybnaskiro lav jov rakirdiá: “Pal mánde džála Odová, Kon isyn zoraledýr mándyr, me na som mol až te rosphandav simirja Léskire ĥeritkonendyr.

⁸ Me bolava tumen paniésa, a Jov javéla te bolel tumen Sventoné Duhósa.”

Isusóskiro Boldeipen i Nalačheskiro Propatiakiriben

⁹ I sys adiáke dre dolé dyvesá: javdiá Isúso Galilejakire Nazarietostyr, i boldia Les Iáno dre reka (len') Iordáno.

¹⁰ I jekhátyr (srázu), syr Isúso vydžálas paniéstyr, Iáno dykhciá, syr otčhakirdiape bolybén, i Dúho (Fáno), savó džálas telé pe Léste syr golumbo;

¹¹ i zan rozdyjape bolybnástyr: “Tu san Miro drógo Čhavó! Dre Túte isyn Mirí bari rádyma!”

¹² I jekhátyr Dúho (Fáno) lydžijá Les pe čhučí phuv.

¹³ I sys Jov štardešá dyvesá pe čhučí phuv, Les propatiakirelas nálačho; Jov sys riskiribnáskire murdalénca (zvierienca) i Jangóly dynarinénas (služynénas) Léske.

Pérva Sykliaibnýtka

¹⁴ Paló dová, syr Iáno sys zakedyno, javdiá Isúso dre Galiliéia, rospheni lav pal Jevangielijakiro bahtalypén pal Devléste,

¹⁵ i rakirdiá: “Podgíia časo (cýro) i Devléskiro Kralipén javdiá pašyledýr; riskirén péskiro džiibén ke Devél i patián dre Jevángielija.”

¹⁶ I syr Jov gijá pašýl Galilejakiro mórjo (derjáv), dykhciá Simonos i léskire pšalés Jendris; jone sys mačharja (mačhibnarja) i dro davá časo jone čhurdenas khudia (sieti) dro mórjo (derjáv).

¹⁷ I phendiá lénge Isúso: “Džán pal Mánde, Me keráva tuméndyr manušéngire staribnar'jen.”

¹⁸ I jone jekhátyr (srázu) jačkirdé khudia i giné pal Léste.

¹⁹ Progii nábut duredýr, Jov dykhciá Jakovós i Ianos, čhavén Zieviediejoskiren, jone sys bešté dre bárka (lodka) i kerénas khudia;

²⁰ Jov jekhátyr khardiá len; i jone giné Lésa, jačkiri dre bárka péskire Dadés Zaviediejos i butiarnen.

Isúso Sastiakirela Nasvalen

²¹ I kiéli jone javné dro Kapiernaumo, Isúso jekhátyr (srázu), dro pérvo sávato (subóta), gijá dre sinagoga te sykliakirél.

²² Léskiro rakiribén divindia manušén, Jov sykliakirdiá len adiáke, syr Léste sys baró pravo, ne na adiáke, syr lylvarítka (knížniki).

²³ Dre sinagoga sys manúš, dre savéste sys nálačho dúho (fáno), i jekhátyr (srázu) jov dyjá gódla:

²⁴ “So Túke trej améndyr, Isúsie Nazarietostyr? Tu javdián te xasiakires amen? Me džinóm (džináv), kon Tu adasavó san, Tu san Svénto Devléskiro!”

²⁵ “Štyljov, – zorjása priphendiá Isúso, – “vydža léstyr!”

²⁶ Nálačho dúho (fáno) trinskirdia zoralés manušés i godlása vygijá léstyr.

²⁷ I saré strahádyne i phučenas jekh jekhestyr: “So da dasavo isyn? Nevó sykliakiribén i dasavé zorjása! Jov až priphenela nalačhé duhenge (fanenge) i dolé kandéna Les!”

²⁸ Sýges pal Léste rozgijápe zan (zvies') pir sarí Galiliéia.

²⁹ I jekhátyr (srázu), vygii sinagogatyr, jone javné dro kher Simonoskiro i Jendriskiro, Jakovosa i Ianosa.

³⁰ Simonoskiri sasuj sys nasvaly i pašty, láte sys baró xačkiribén, i jekhátyr Isusóske phendlé pal láte.

³¹ Jov podgíia ke joi, lyjá la pal vast, pomogindia te ĥazdelpe; xačkiribén lákiro progijá, i joj lyjá te dynarinél lénge.

³² Bel'velié, syr zagijá kham, ke Isúso lyné te janén nasvalen i odolén, konéste sys nálačho dúho (fáno);

³³ i saró fóro skedyjape pašýl vudár.

³⁴ Dro dová dyvés Isúso sastiakirdia drieván but samone pharé nasvalypnendyr i Jov tradelas javri nalačhé dúhi, i priphenelas Jov lénge te na rakirén, pal-dová so jone džindlé, so Jov sys Xristóso.

³⁵ Pe javír zlóko (ránko), uštyi angíl dyvés, Isúso gijá odorík, kaj nikonés nane, i mangdiápe Devléske odój.

³⁶ Símono že i javír, kon sys Lésa, lyné Les te rodén,

³⁷ I lathné Les i lyné te rakirén Léske: “Saré Tut rodéna!”

³⁸ Jov lénge rakiréla: “Javén, džása dre pašatuné gavá, sob (kaj) Mánge i odój te phenáv lav. Me ž i javdjom vaš dová.”

³⁹ I Jov phenelas lav pal Devléste dre sinagogi pir sarí Galiliéia, i tradelas javrí nalačhé dúhi (fany).

Sastiakiriben Nalačhé Cypitkone Nasvalypnastyr

⁴⁰ Ke Isúso javéla manúš, savó sys nasvaló prokazasa: jov pyjá pe čangá angíl Léste, i mangdiá: “Vysastiakir Man, kóli Túke isyn pir iló.”

⁴¹ Isusóske jaciá tango (žalko) les: “Mánge isyn pir iló, jav sastó”, – phendiá Jov, protyrdyi vast, i čiladiá les.

⁴² I jekhátyr, sarí dukh gijá krig léstyr i jov jaciá sastó.

⁴³ Isúso adáj že jekhátyr (srázu) otbičhadia les, paló dová, syr priphendiá šylales Léske,

⁴⁴ i rakiréla Léske: “Nikonéske pal davá na rosphen; ne džá; sykáv pes rašáske, i jan svénto dyibén pal sastiakiriben, syr davá trej pir Mojzáskiro Zakóno, davá javéla tyró dophenybén manušénge.”

⁴⁵ Ne jov, vygii, jekhátyr lyjá te rosphenel sarénge pal péskiro sastiakiriben, pal-dová uže Isusóske sys naštý te sykadjol dro fóro, i Jov jačelaspe pe dová štéto, kaj nikonés na sys pal foritko kustýk (granica), i manušá skedenaspe ke Jov saré šteténdyr.