Luka 5 - Biblija - Pe Baltitko Romani čib (Romanes) 2019

Isúso Prikharela Pervoné Sykliaibnytkonén

¹ Jekhvar Isúso sys terdó pe brégo pašýl Gienisarietoskiro ziero (oziero), a manušá tasavenaspe, sob (kaj) te javén pašyledýr ke Jov i ke Devléskiro lav;

² i Jov dykhciá duj barki (lodki) pašýl ziero (oziero); a mačhibnarja vyginé léndyr i xal'kirenas khudia (sieti).

³ Isúso zagijá dre jekh bárka, saví sys Simonoskiri, i mangdiá Les te plyvinel (te del plima) krig nábut duredýr bregostyr; i kiéli Jov besciá, lyjá te sykliakirél manušén.

⁴ A kiéli Isúso končyndia te sykliakirél, tedy phendiá Simonoske: “Otplyvin (de plima duredyr), kaj isyn xor i začhurde péskire khudia, sob (kaj) vari-so te staren.”

⁵ I Símono otphendiá Léske: “Sykliakiribnáskiro! Ame kerdiám butý sarí rat, i nisó ame na uhtyldiam; ne pal-dová, syr Tu rakirésa, me keráva adiáke.”

⁶ I jone začhurdyne khudia i uhtyldé adákicy but mačhé, so léngire khudia lyné te kušen.

⁷ I jone lyné te sykavén vasténca péskire malenge (drugenge) javire barkatyr, sob (kaj) te javén i te dzn vast lénge; kodolé javné i pherdiakirde adiáke duj barki, so jone lyné lyné te tasadjon.

⁸ Kiéli Símono dykhciá davá, jov pyjá pe angíl Isusóste pe čangá i phendiá: “Mek man, Rajo Dévla, me som grehítko manúš!”

⁹ Símono i javír manušá, savé sys Lésa, divindlépe darása pe dasavo mačhengiro uhtylyben;

¹⁰ Jakovo i Iáno, Zaviediejoskire čhavé, malá Simonoske, divindlépe adiáke-pac'. Tén'ci Isúso phendiá Simonoske: “Na, andyrša, Simonie, Me keráva adiáke, so tu javésa te stares manušén.”

¹¹ I kiéli jone vytyrdyne duj barki pe brégo, to jone jačkirdé saró, i giné pal Léste.

¹² Jekhvar Isúso sys dro jekh fóro; sys odój jekh manúš, savó sys saró dre prokáza i, kiéli jov dykhciá Isusós, to jov pyjá pe phuv mósa, i lyjá te mangél Les, rakirí: “Rajo Dévla, kóli Tu kamésa, moginésa te vysastiakires man.”

¹³ Isúso protyrdyjá vast, čiladiá les i phendiá: “Kamám, tu kakaná san žužó (čysto).” I adáj že jov sys vysastiakirdo prokazatyr.

¹⁴ I Jov priphendiá Léske nikonéske te na sykadjol, a te džal te sykavél pes rašáske i te janel svénto dyibén pal péskiro vysastiakiriben, so priphendiá Mójza, syr dophenybén manušénge.

¹⁵ Ne mavlýn pal Isusóste rozdžalape usá butýr, i butýr, i but but manušá javénas te šunén Les, te sastiakirenpe Léste péskire nasvalypnendyr.

¹⁶ I Jov džálas pir štéty, kaj na sys manušá, i mangdiápe Devléske.

Isúso Vysastiakirela Praličytkone Manušés

¹⁷ Jekhvar, kiéli Jov sykliakirelas i sys bešté odój Farisiéi i Zakonóskire sykliakiribnarja, savé javné saré šteténdyr Galilejatyr i Judejátyr i Jerusalimóstyr, a Devléskiri zor sys Isusóste te vysastiakirel nasvalen,

¹⁸ ĥáda, vari-savé manušá jandlé nasvale manušés pe matraco i pričhude zor (starindlepe) te zalydžan les dro kher i te čhuvén angíl Isusóste;

¹⁹ i, syr jone na lathné, kaj te prolydžan les pal buté manušénde, to jone zaresne pe kheréskiri bérga i zmekne les matracosa pir (skroz') stréha (čhakín) maškirál angíl Isusóste.

²⁰ Kiéli Isúso dykhciá léngiro patiaibén, phendiá kodolé manušéske: “Otmekenape gréhi tyré!”

²¹ Lylvarítka i Farisiéi lyné te rakirén maškír péste: “Kon da dasavo isyn, Savó teliakirela Devlés? Kon da saštý (moginéla) te otmekél gréhi apríč jekhe Devléste?”

²² Isúso ĥalyjá léngire dúmy i otphendiá lénge: “So tumé adiáke pal davá duminéna?

²³ So lokhedýr te phenáv: ‘Otmekenape gréhi tyré’, ci te phenáv: ‘Uštý i psir?’

²⁴ Ne, sob (kaj) tumé te džinén, so Čhavéste Manušeskireste isyn pravo pe phuv te otmekél gréhi”, i Isúso phendiá praličytkoneske: “Túke rakiráva: Uštý, le matraco péskiro i džá dro péskiro kher.”

²⁵ I jov jekhátyr (srázu) uštyjá angíl lénde, lyjá dová, pe so sys paštó, i gijá dro péskiro kher, šarindoj Devlés.

²⁶ I jone saré strahádyne i slavindle Devlés: i sys dre dar, i rakirdé: “Save baré dívy ame dykhciam adadyvés.”

Isúso Kharéla Lievijos

²⁷ Paló davá Isúso vygijá i dykhciá mytytkone (taksytkone) skedyibnaris pir lav Lievijo, savó sys beštó dro mytytko kher, i rakírla léske: “Jav Mánca”,

²⁸ Lievijo uštyjá, mekciá saró i gijá pal Léste.

²⁹ I Lievijo kerdiá baró svenkitko skamínd vaš Léske dro péskiro kher: i odój sys but mytoskire skedyibnarja i javír manušá, savé sys bešté pal skamínd lénca.

³⁰ Vari-savé Farisiéi i léngire lylvarítka rakirdé xoliames Isusóskire sykliaibnytkonénge: “Vaš so tumé xána i p'jena mytoskire skedyibnar'jenca i grehengirenca?”

³¹ Isúso otphendiá lénge: “Na saste manušénge trej sastypnari (doktoro), a nasvalenge.”

³² Me javdjom te kharav te risjon ke Devél na patiaibnytkonen, a grehengiren.”

Pal Posto

³³ Jone phendlé Isusóske: “Sóske Ianoskire sykliaibnýtka but móly postinenape i mangénape Devléske; adiáke-pac' keréna i Farisiejengire sykliaibnýtka, a Tyré sykliaibnýtka xána i p'jena?

³⁴ Jov phendiá lénge: “Ci moginéna (saštý) tumé te začhuven Terneskire malen (drugen) te otphenenpe xabnastyr, kóli jone isyn pe Léskiro bjav, kiéli Ternó (Ženiho) isyn lénca?

³⁵ Ne javéna dyvesá, kiéli Ternó javéla lynó krig léndyr, tedy jone javéna te postinen dre dolé dyvesá.”

³⁶ I Jov phendiá lénge primiéro (sykaibén): “Nikón na čhuvéla pe phuranó uribén pohtanytko kotér (lapiko), savó jov otkošela nevoné uribnastyr; kóli jov keréla adiáke, jov roskošela nevó uribén, i nevó pohtanytko kotér na poddžála ke phuranó uribén.

³⁷ I nikón na čhuvéla neví mol dre phurané cypitka goné: pal-dová so neví mol (vino) prokošela goné i kokori mol vythadela, i goné xasjona.

³⁸ Ne neví mol trej te čhuvél dre neve goné, tedy zrakhélape i mol, i goné.

³⁹ I nikón, kon vyp'jela phurany mol, adáj že na zakaméla te p'jel neví mol; pal-dová so jov rakírla: “Phurany mol isyn fedýr”.