Luka 3 - Biblija - Pe Baltitko Romani čib (Romanes) 2019

Ianoskire-Boldeipnariskiro Phenybén

¹ Dro dešupandžto berš, kiéli Tivierijo sys khieningo (kiesarjo), a Pontijo Piláto sys balunitko (pravitieljo) pe Judéia, a Irodo sys xuláj pe Galiliéia, Léskiro pšal Filipo sys xuláj pe Itureja i Trahonitoskiri phuv, a Lisanijo xulaindia pe Avilineja;

² i kiéli Anna i Kaiáfa sys rašángire barydyrá, javdiá Devléskiro lav Ianoske, Zaharijeskire čhavéske pe čhučí phuv.

³ I jov javdiá pe phuv pašýl reka (len') Iordáno, sykliakiri manušén te bolenpe te sykavén, so jone riskirdé péskiro džiibén ke Devél, sob (kaj) Jov te otmekél gréhi.

⁴ Syr isyn čhindló dre Isajoskire-prorokoskiri lylvarí, savó rakírla: “Ĥáda, isyn zan, saví déla gódla pe čhučí phuv: ‘Kerén drom Ráske-Devléske, čhuvén Léske mamúj drom;

⁵ kažno dólo te javél pherdó, kažno bérga i bérgica te javén teledýr, kažno bangipen te javél roŭno i bangé dromá te javén gladka;

⁶ kažno loč te udžinel pal Devléskiro zrakhibén.’”

⁷ Iáno ž rakirdiá buté manušénge, savé javénas te bolenpe ke jov: tumé san sapitko ródo! Kon sykliakirdiá tumen te našén Devléskire xoliátyr, so javéla syg?

⁸ Kerén vari-so, sob (kaj) te javél mol, so tumé mekné te kerén gréhi i riskirdé péskiro džiibén ke Devél, i na duminen te rakirén péske: ‘Avraámo isyn dad amaró’, pal-dová so me rakiráva tuménge, so Devél moginéla dalendyr barendyr te ĥazdén čhavorén Avraamóske;

⁹ ĥáda, uže tover isyn paštó pašýl kašteskiro kornjo (rukh), kažno kašt, so na déla lačhó barjakirdó (plódo), čingirena telé i čhurdena dre jag.”

¹⁰ Manušá phučné Léstyr: “So ž aménge te kerás?”

¹¹ I Iáno otphendiá lénge: “Konéste isyn duj ĥáda, te del jekh odoléske, konéste nane; i konéste isyn xabén, te kerél adiáke-pac'.”

¹² I mytoskire skedyibnarja javné te bolenpe i phendlé Léske: “Sykliakiribnáskiro! So aménge te kerás?”

¹³ “Na len butedýr lové, syr tuménge saštý (domekno) te len pir Zakóno.”

¹⁴ Vari-savé xaladé adiáke-pac' phučné Léstyr: “A so ž aménge te kerás?” Jov phendiá xaladenge: “Na otlen zorjása nikonestyr, i na bangiakiren nikonés xohanés. Javén ráda daleske, so tuménge pleskirena.”

¹⁵ Ne pal-dová so manušá užakirde i dumindle dro péskiro iló, so, xobi, Iáno isyn Kokoró Xristóso,

¹⁶ Iáno tedy otphendiá sarénge: “Me bolava tumen paniésa, ne pal mánde džála Odová, Kon isyn zoraledýr mándyr, so me na som mol až te rosphandav simirja Léskire ĥeritkonendyr, Jov javéla te bolel tumen Sventoné Duhósa i jagása;

¹⁷ Léskiro ĥanadytko (lopata) isyn dro Léskiro vast, i Jov žužakirela Péskiri šúrna i skedéla parnó giv dre Péskiri piralý, a phus xačkiréla jagása, saví na murdjola.”

¹⁸ I but javír jov sykliakirdiá manušén, i rosphendiá bahtalý zan (zvies').

¹⁹ Jov, Iáno, adiáke-pac' vyrakirdia Irodoske, savó sys balunitko (tietrarho) pe doiá phuv, pal-dová so Irodo lyjá paloróm Irodiada, péskire-pšaléskire romniá i pal javír nalačhé léskire réndy;

²⁰ a Irodo iščo (inké) butýr kerdiá čoripén: jov čhudiá Ianos dro štaribén.

Hristosóskiro Boldeipen

²¹ I sys adiáke: kiéli saré manušá boldepe, i Isúso tež boldiape i mangdiápe, bolybén otčhakirdiape,

²² i Svénto Dúho (Fáno) zgija pe Léste dro dyc'ly patrín (óbrazo) syr golumbo, i sys zan bolybnástyr, saví rakirdiá: “Tu san Miro drógo Čhavó, dre Túte isyn bari Mirí rádyma!”

Hristosóskiro Ródo

²³ Kiéli Isúso lyjá te kerél Devléskiri butý, Léske sys trijánda berš; i, syr manušá dumindle, Jov sys Jozaskiro (Iosifoskiro) Čhavó,

²⁴ a Joza sys Ilijaskiro čhavó, Ilíia sys Matfatoskiro čhavó, Matfato sys Lievijoskiro čhavó, Lievijo sys Mielhijoskiro čhavó; Mielhijo sys Ianajoskire čhavó; Ianajo sys Jozaskiro čhavó;

²⁵ Joza sys Matafijoskiro čhavó, Matafijo sys Amososkiro čhavó, Amoso sys Naumoskiro čhavó; Naumo sys Jeslimoskiro čhavó; Jeslimo sys Nagiejoskiro čhavó;

²⁶ Nagiejo sys Maafoskiro čhavó; Maafo sys Matafijeskiro čhavó; Matafijo sys Siemieinoskiro čhavó; Siemieino sys Jozaskiro čhavó; Joza sys Judáskiro čhavó;

²⁷ Juda sys Joananoskiro čhavó; Joanano sys Risajoskiro čhavó; Risajo sys Zorovavieljoskiro čhavó; Zorovavieljo sys Salafiiljoskiro čhavó; Salafiiljo sys Nirijoskiro čhavó;

²⁸ Nirijo sys Mielhijoskiro čhavó; Mielhijo sys Adijoskiro čhavó; Adijo sys Kasamoskiro čhavó; Kasamo sys Jelmadoskiro čhavó; Jelmado sys Iroskiro čhavó;

²⁹ Iro sys Iosijáskiro čhavó; Iosija sys Jelijezeroskiro čhavó; Jelijezero sys Iorimoskiro čhavó; Iorimo sys Matfatoskiro čhavó; Matfato sys Lievijoskiro čhavó;

³⁰ Lievijo sys Simieonoskiro čhavó; Simieono sys Judáskiro čhavó; Juda sys Jozaskiro (Iosifoskiro) čhavó; Joza sys Jonanoskiro čhavó; Jonano sys Jelmakimoskiro čhavó;

³¹ Jeliakimo sys Mielieajoskiro čhavó; Mielieajo sys Mainanoskiro čhavó; Mainano sys Matafijoskiro čhavó; Matafijo sys Nafanoskiro čhavó; Nafano sys Davidóskiro čhavó;

³² Davído sys Jesiejoskiro čhavó; Jesiejo sys Avidóskiro čhavó; Avido sys Vaozóskiro čhavó; Vaózo sys Salmonóskiro čhavó; Salmano sys Naasonóskiro čhavó;

³³ Naasóno sys Aminadavóskiro čhavó; Aminadávo sys Adminoskiro čhavó; Admino sys Arnijoskiro čhavó; Arnijo sys Esromóskiro čhavó; Esrómo sys Fariesóskiro čhavó; Fariéso sys Judáskiro čhavó;

³⁴ Juda sys Jakovóskiro čhavó; Jakovo sys Avraamóskiro čhavó; Avraámo sys Farijoskiro čhavó; Farijo sys Nahoroskiro čhavó;

³⁵ Nahoro sys Sieruhoskiro čhavó; Sieruho sys Ragavoskiro čhavó; Ragavo sys Faliekoskiro čhavó; Falieko sys Jevieroskiro čhavó; Jeviero sys Salijoskiro čhavó;

³⁶ Salijo sys Kainanoskiro čhavó; Kainano sys Arfaksadoskiro čhavó; Arfakieado sys Simoskiro čhavó; Simo sys Nojoskiro čhavó; Nojo sys Lamiehoskiro čhavó; Lamieho sys Mafusailoskiro čhavó;

³⁷ Mafusailo sys Jenohoskiro čhavó; Jenoho sys Iariedoskiro čhavó; Iariedo sys Malielieiloskiro čhavó; Malielieilo sys Kainoskiro čhavó;

³⁸ Kaino sys Jenososkiro čhavó; Jenoso sys Sifoskiro čhavó; Sifo sys Adamoskiro čhavó; Adamo sys Devléskiro čhavó.