Joannostir 7 - Biblija - Pe Baltitko Romani čib (Romanes) 2019

Isúso i Léskire Pšála

¹ Paló davá Isúso psirdiá pir Galiliéia, ne Jov na kamdiá te džal dre Judéia, pal-dová so Judy rodyne te zamarén Les.

² Džálas Judýtko Svénko, kiéli jone čhuvénas búdy (kuščy).

³ Léskire pšála phendlé Léske: “Džá dalé štetóstyr i džá dre Judeja, sob (kaj) i Tyré sykliaibnýtka te dykhén réndy, savé Tu kerésa;

⁴ pal-dová so nikón na ĥaravela péskire réndy, kažno kaméla, sob (kaj) manušá te džinén pal léste; kóli Tu kerésa dasavé réndy, adiáke mek saró svéto te džinél pal Túte”

⁵ (Pal-dová so Léskire pšála adiáke-pac' na patiandyné dre Léste).

⁶ Isúso pe davá phendiá lénge: “Miro časo iščo (inké) na javdiá, ne vaš tuménge kažno časo poddžála.

⁷ Svéto na moginéla te bidykhel tumen (te nienavidinel), a svéto bidykhela Man, pal-dová so Me dophenava pal léste, so léskire réndy isyn nalačhé.

⁸ Tumé džán pe davá svénko, ne Me pe svénko na džáva, pal-dová so Miro časo iščo (inké) na javdiá.”

⁹ Adiáke phení lénge, Isúso jaciápe dre Galiliéia.

Isúso isyn pe Kuščengiro Svénko

¹⁰ Ne paló davá, syr Léskire pšála giné pe svénko, tedy i Jov gijá odorík, ne na biciales, a adiáke, sýrby čorahanés.

¹¹ Judy rodenas Les pe svénko i phučenas: “Kaj isyn adavá manúš.”

¹² But čingardá sys pal Léste maškír manušénde: “Jov isyn lačhó manúš,” – rakirdé jekh, a javír rakirdé: “Jov xohavela manušén.”

¹³ Ne nikón na rakirdiá pal Léste mamúi, pal-dová so darándyne Judéngire randyr.

¹⁴ Ne dro maškirál svénko Isúso gijá andré Khangirí i jaciá te sykliakirél.

¹⁵ Judy divindlépe, rakirí: “Katýr Jov džinéla Svénto Čhinybén, kóli Jov nikaj na syklyja?”

¹⁶ Isúso phendiá lénge: “Miro sykliakiribén isyn na Mándyr, ne isyn Odoléstyr, Kon bičhadiá Man.

¹⁷ Kon kaméla te kerél Léskiri vólia, odová javéla te džinél pal davá sykliakiribén, ci jov isyn Devléstyr, ci Me rakiráva Kokoró Péstyr.

¹⁸ Odová, savó rakiréla kokoró péstyr, mangéla péske sláva; ne kon rodéla sláva Odoléske, kon bičhadiá Les, Odová syn čačunó, i xohaibén nane dre Léste.

¹⁹ Ci Mójza na dyjá tuménge Zakóno? I nikón tuméndyr na keréla pir Zakóno. Pal so ž tumé kaména te muliakirén Man?”

²⁰ Manušá phendlé dro otphenybén: “Ci davá nálačho Dúho (Fáno) isyn dre Túte? Kon kaméla te muliakirél Tut?”

²¹ Isúso rakirí duredýr, phendiá lénge: “Me kerdjom jekh réndo, i saré tumé divinenape.

²² Mójza ž tuménge phendiá te občhinen čhavén (čačó, davá na Mojzastyr javdiá, a dadendyr), i dro sávato (subóta) tumé občhinena manušés.

²³ Kóli dro sávato tumé občhinena manušés, sob (kaj) te na javél parudo Mojzáskiro Zakóno, sóske ž tumé xoliasona pe Mánde, pal-dová, so Me jekhe manušés vysastiakirdjom dro sávato?

²⁴ Na sendinén manušés pir muj, a sendinén čačuné sendosa.”

Ci isyn Isúso Miesija?

²⁵ Adáj vari-savé manušá Jerusalimóstyr lyné te rakirén: “Ci Adavá isyn Manúš, Saves rodéna te zamarén?

²⁶ Ĥáda, Jov rakiréla murškanés, i nikón na rakiréla Léske ničý. Ci na uĥalyne barydyrá, so Jov isyn čačunó Xristóso?

²⁷ Ne ame džinása pal adalé manušéste, katýr Jov isyn. Ne kiéli javéla Xristóso, nikón na javéla te džinél, katýr Jov javdiá.”

²⁸ Tedy Isúso, sykliakiri dre Khangirí, phendiá zoralé zaniása: “I tumé džinéna Man i tumé džinéna, katýr Me som; i Me javdjom na Kokoró Péstyr. Ne Odová, Kon bičhadiá Man, isyn čačunó, Saves tumé na džinéna.

²⁹ Ne Me džinóm Les, pal-dová so Me javdjom Léstyr, i Jov bičhadiá Man.”

³⁰ I jone kamlé Les te uhtylén, ne nikón na čiladiá Les vastésa, pal-dová so Léskiro časo na javdiá.

³¹ But manušéndyr upatiándyne dre Léste i rakirdé: “Kiéli javéla Xristóso, naúšto Jov keréla butýr dívy, syr Adavá Manúš kerdiá?

Haladé isyn Bičhadé te Zakeden Isusós

³² Farisiéi šundlé, so manušá rakirdé xoliása maškír péste pal Isusóste, i bičhadé Khangirjákire stregar'jen (stražniken), sob (kaj) te uhtylén Les.

³³ Ne Isúso: “Iščo nagara jaciápe Mánge te javav tuménca, i Me džáva ke Odová phendiá, Kon bičhadiá Man.

³⁴ Tumé javéna te rodén Man, i na lathéna; i kaj Me javáva, odorík tumé na moginéna te javén.”

³⁵ Tedy Judy lyné te rakirén maškír péste: “Karik da Jov kaméla te džal adiáke, so ame na lathasa Les? Ci na kaméla Jov te džal pe Elinengiro štéto i te sykliakirél Jelinen (Griekén / Balamén)?

³⁶ So značynena dalé lavá, savé Jov phendiá: “Tumé javéna te rodén Man, i na lathéna: i kaj Me javáva, odorík tumé na moginéna te javén.”

Réki Džidé Paniésa

³⁷ Dro palatunó (posliednjo) i sámo glavno svenkitko dyvés, Isúso terdijá i phendiá zoralé zaniása: “Odová, kon kaméla te p'jel, mek te javél ke Me.

³⁸ Kon patiála dre Mánde, – syr isyn phendló dro Svénto Čhinybén, – ‘Léskire iléstyr javéna te thaden réki (leniá) džidé paniésa.’”

³⁹ Isúso adiáke rakirdiá pal Dúho (Fáno), savó javéla te odolénde, kon javéla te patial dre Léste; pal-dová so na sys pe lénde Svénto Dúho (Fáno), pal-dová so Isúso iščo (inké) na sys slavindlo.

Košybén Maškir Manušénde

⁴⁰ But manušéndyr, savé šundlé Léskire lavá, rakirdé: “Jov isyn čačunó Proróko.”

⁴¹ Javír rakirdé: “Davá isyn Xristóso”, ne vari-savé rakirdé: “Naúšto Galilejatyr javéla Xristóso?

⁴² Ci na phendló dre Svénto Čhinybén, so Xristóso javéla Davidóskire rodóstyr, i so Jov bijandjola dro fóro Vifliejémo, odolé štetóstyr, katýr sys Davído?”

⁴³ Adiáke vygijá pal Léste košybén maškír manušénde.

⁴⁴ Vari-savé léndyr kamlé te uhtylén Les; ne nikón Les na čiladiá.

Judytka Barydyrá na Patiána

⁴⁵ Adiáke Khangirjákire stregarja risiné ke rašángire barydyrá i Farisiéi, i adalé phučné léndyr: “Sóske tumé na jandlé Les?”

⁴⁶ E stregarja otphendlé adiáke: “Adavá manúš adiáke rakirdiá, so nikón nijékhvar na rakirdiá.”

⁴⁷ Farisiéi phendlé lénge: “So ž i tumen Jov zalydžijá dro bléndo?

⁴⁸ Ci upatiandyja dre Léste vari-kon theméskire barydyrendyr ci Farisiejendyr?

⁴⁹ Jekh adalé manušá, savé na roskedenape dro Zakóno, Devél prokošela len.”

⁵⁰ Nikadimo, savó javélas ke Jov ratý, sys jekh léndyr i rakiréla lénge:

⁵¹ “Ci sendinela amaró Zakóno manušés, kóli angledýr na vyšunena les i na udžinena, so jov kerdiá?”

⁵² Pe davá phendlé léske: “Ci na san i tu Galilijatyr? Rozdykh i tu kokoró ĥaljosa, so proróko na moginéla te javél Galilejatyr.”

⁵³ I saré jone giné péske pir kherá.