Joannostir 5 - Biblija - Pe Baltitko Romani čib (Romanes) 2019

Isúso Sastiakirela pašýl Kompinytko Štéto

¹ Paló saró davá sys Judýtko svénko, i Isúso gijá dro Jerusalimo.

² Dro Jerusalimo, nádur Bakritkone portatyr, sys venderi (prudo), savó pir Judýtko čib kharélape “Vifiezda”, paš saví sys trémo (koridoro) pandžine progiibnenca.

³ Odój sys pašté but nasvale: kororé, langale, šuké, /jone užakirenas panieskiro kunipen/.

⁴ Pal-dová so Devléskiro Jangólo pir dová-pac' časo džálas telé i kuniakirelas paní, i kon angledýr zadžalas dre venderín (prudo), odová vysastjola, savjása dukhasa jov te na javél.

⁵ Odój sys jekh manúš, savó sys nasvaló trijandaohto berš.

⁶ Isúso dykhciá les, so jov sys paštó i džiný, so jov isyn nasvaló adiáke ĥará (dlúges), phuciá léstyr: “Ci kamésa tu te vysastjos?”

⁷ Nasvalo manúš otphenélas Léske: “Rajo! Mánde nane manúš, savó čhuvelas man dre venderín, syr paní kuniakirelape; a kiéli me javáva pašyledýr, tedy vari-kon javír zmekelape angledýr mándyr.”

⁸ Isúso rakiréla léske: “Uštý, le péskiro čhuibén i psir.”

⁹ Kadavá manúš dre davá-pac' momiento vysastija, lyjá péskiro čhuibén i gijá. Adavá dyvés sys sávato (subóta).

¹⁰ Paldavá Judy rakirdé vysastiakirdeske: “Adadyvés isyn sávato; túke naštý te les čhuibén.”

¹¹ Jov otphenélas lénge: “Odová, Kon man vysastiakirdiá, phendiá mánge: ‘Le péskiro čhuibén i psir’”

¹² Jone phučné Léstyr paldavá: “Kon isyn Odová Manúš, Savó phendiá túke: ‘Le péskiro čhuibén i psir?’”

¹³ Ne manúš, savó vysastija, na džindiá kokoró, kon Jov adasavó sys, pal-dová so Isúso syg garadyja dro manušéngiro skedyibén, savó sys pe dová štéto.

¹⁴ Korigedýr (pozže) Isúso strenindia les dre Khangirí i phendiá léske: “Ĥáda, tu kakaná san sastó: na griešyn butýr, sob (kaj) te na kerélpe túsa vari-so fujedýr.”

¹⁵ Kadavá manúš gijá ke Judy i rosphendiá lénge, so manúš, Savó vysastiakirdiá les, isyn Isúso.

¹⁶ I paldavá Judy jačné te tradén Isusós pal dová, kamí te zamarén Les, so Jov kerdiá dasavé réndy (diély) dro sávato.

¹⁷ Ne Isúso otphendiá lénge: “Miro Dad ke kakaná keréla lačhé réndy i Me adiáke-pac' keráva.”

¹⁸ Tedy Judy iščo (inké) butedýr lyné te rodén Les, sob (kaj) te zamarén Les, pal-dová, so Jov féni na svenkindia sávato, ne i khardiá Devlés Péskire Dadésa, sýrby Jov gindia Pes adiáke-pac' Devlésa.

Čhavéskiro Pravo

¹⁹ Ne Isúso phendiá lénge: “Čačes, čačes, Me rakiráva tuménge: Čhavó nisó naštý te kerél Kokoró Péstyr, kóli Jov te na dykhél, so keréla Dad, pal-dová so dová, so Dad keréla, dová-pac' keréla i Čhavó.

²⁰ Pal-dová so Dadéske isyn drógo Léskiro Čhavó i Jov sykavéla Léske saró, so keréla Kokoró; Jov sykavéla Léske naj butýr réndy dalendyr, so tumé javéna te divinenpe.

²¹ Pal-dová so, syr Bolybnáskiro Dad ĥazdéla mulen i otdžidiakirela len, adiáke-pac' i Čhavó otdžidiakirela odolén, konés isyn Léske pir iló.

²² Dad nikonés na sendinela, ne Jov dopatiandyja saró séndo Čhavéske;

²³ sob (kaj) saré te kutiakiren Čhavés, syr kutiakirena Dadés. Kon na kutiakirela Čhavés, odová na kutiakirela i Dadés, Savó bičhadiá Les.

²⁴ Čačes, čačes Me rakiráva tuménge: odová, kon šunéla Miro Lav i patiála Kodoléske, Kon bičhadiá Man, léste isyn viéčno džiibén i jov pe séndo na javéla, jov kakaná pirigija meribnástyr dro džiibén.

²⁵ Čačes, čačes Me rakiráva tuménge: javéla časo i jov akaná javdiá, kóli mulé javéna te šunén Devléskire-Čhaveskiri zan (glos), i, kon šunéla, otdžidjola.

²⁶ Pal-dová so, syr Dad rikiréla džiibén Kokoró dre Péste, pal-dová so Jov sys Kokoró džiibnáskiri ĥanýng, adiáke-pac' i Čhavéske Jov dyjá zor te rikirél džiibén dre Kokoreste Péste;

²⁷ i Jov dyjá Čhavéske pravo te sendinel, pal-dová so Jov isyn Manušéskiro Čhavó.

²⁸ Na divinenpe pe davá, pal-dová so javéla dasavo časo, dre savó saré mulé, javéna te šunén Devléskire-Čhaveskiri zan;

²⁹ i džána javrí maĥilendyr (kuléndyr): odolé, savé kerdé lačhipén, otdžidjona-vaš džiibnytko Kralipén; a odolé, savé kerdé nalačhipen, otdžidjona vaš dová, sob (kaj) te javén sendindle.

Isúso Rakiréla pal Péste i pal Ianoste

³⁰ Me naštý (na mogináva) nisó te keráv Kokoró Péstyr, Me sendinava adiáke, syr Mánge isyn phendló te sendinav, i Miro séndo isyn čačunó, pal-dová so Me na keráva pir Péskiri vólia, a pir Miré-Dadéskiri vólia, Savó Man bičhadiá.

³¹ Kóli Me dophenava Kokoró pal Péste, to dophenybén Miro isyn na čačunó.

³² Isyn Mánde javír jakhítko (svidietieljo), savó dophenéla pal Mánde, i Me džinóm, so saró, so Jov rakiréla pal Mánde, isyn čačipén.

³³ Tumé bičhavenas manušén ke Iáno i léskiro dophenybén isyn čačunó.

³⁴ Mánge na trej manušéngiro dophenybén, a Me rakiráva vaš dová, sob (kaj) tumé te zrakhenpe.

³⁵ Iáno sys momolýtko (svietíl'niko), savó xačolas i délas jag i tumé vari-savó časo radyndlepe paš léskiri jag.

³⁶ A Mánde isyn dophenybén baredýr Ianoskirestyr; odolé réndy, savé Dad dyjá Mánge te keráv, i savé Me keráva, davá isyn dophenybén, so bičhadiá Man Miro Dad.

³⁷ Pal Mánde dophenéla Kokoró Miro Dad, Savó bičhadiá Man, tumé nijékhvar na šundlé Léskiri zan, i na dykhné Les

³⁸ I tumé na rakhena Léskiro lav dre péskire ile, paldová so tumé na patiána Odoléske, Saves Jov bičhadiá.

³⁹ Tumé sykliakiréna mištés Svénto Čhinybén, pal-dová so tumé dena gody peske duminéna, so pir léste tuménde javéla viéčno džiibén; a Svénto Čhinybén dophenéla pal Mánde,

⁴⁰ ne tumé usajékh na kaména te javén ke Me, sob (kaj) te javél tuménde viéčno džiibén.

⁴¹ Mánge na trej, sob (kaj) manušá te šarén Man.

⁴² Me džinóm (džináv) mištés tumen, tumé na rikirén syr Drógima Devlés dro tumaró iló.

⁴³ Me javdjom ke tumé vaš Miré-Dadéskiro lav, i tumé Man na priĥaljona, ne kiéli vari-kon javír javéla ke tumé kokoró péstyr, tumé priĥaljonas les.

⁴⁴ Syr tumé moginéna te upatian, kiéli tumé priléna manušýtko šaribén jekh jekhestyr, a na rodéna šaribén jekhe Devléstyr?

⁴⁵ Ná den godý péske (ná duminen), so Me javáva te bangiakirav tumen angíl Dadéste: Mójza javéla te bangiakirel tumen, pe savéste tumé rozginena.

⁴⁶ Kóli tumé patianas Mojzáske, tumé i Mánge patianas, pal-dová so jov čhindiá pal Mánde.

⁴⁷ Ne syr tumé na patiána doléske, so čhindiá Mójza, syr javéna te patián doléske, so Me rakiráva tuménge?”