Isúso 5 - Biblija - Pe Baltitko Romani čib (Romanes) 2019

Javír Občhinyben ke Gilgalo

¹ Kiéli saré Amoriejéngire králja, savé dživdé pir daja rig Iordanoskiri ke mórjo (derjáv), i saré Xanaanoskire králja, savé sys pašýl mórjo (derjáv), šundlé, so Raj Devél, Devél vyšut'kirdia paní Iordanoskiro angíl Izrailjoskire čhavénde, paka jone piridžanas: to tedy jaciá bi zorjakiro léngiro iló, i na jaciá butýr dre lénde dúho proti Izrailjoskire čhavénde.

² Dro dová-pac' časo Raj Devél phendiá Isusóske: “Ker péske vostra čhurja i občhin Izrailjoskire čhavén dro javír mólo”.

³ I kerdiá péske Isúso vostra čhurja, i občhindia Izrailjoskire čhavén pe štéto, savó sys khardo “občhinybnaskiri bérga”.

⁴ Ĥáda, sóske občhindia Isúso Izrailjoskire čhavén: saré manušá, savé vyginé Jegiptóstyr, muršá, saré, kon sys lačhó ke maribén pomyne pe čhučí phuv pe drom pir vygiiben Jegiptóstyr;

⁵ saré, savé vyginé manušá, sys občhindlé; ne saré manušá, savé bijándyne pe čhučí phuv pe drom, paló davá, syr vyginé Jegiptóstyr, na sys občhindlé.

⁶ Pal-dová so Izrailjoskire čhavé štardešá berš psirdé pir čhučí phuv, paka myné saré manušá, savé sys lačhé ke maribén, savé vyginé Jegiptóstyr, savé na šundlé Raskiri-Devléskiri zan, i savénge Raj Devél sovlahadiá, so jone na dykhéna phuv, saví Raj Devél sovlahasa dyjá lav léngire dadénge, te del lénge phuv, kaj thadéla thud i avgín.

⁷ A zamiést lénde ĥazdyjá léngire čhavén, savén občhindia Isúso, pal-dová so jone sys naobčhindle; pal-dová so len pir drom na občhinenas.

⁸ Kiéli saré manušá sys občhindlé, jačenaspe jone pe péskiro štéto dre stáno, paka vysastjonas.

⁹ I phendiá Raj Devél Isusóske (Johošuaske): “Akaná Me zlyjom tuméndyr ladž Jegiptóskiri. Sóske i kharélape dová štéto: Galgálo, adiáke-pac' ke davá dyvés”.

¹⁰ I sys terdé Izrailjoskire čhavé stanósa dro Galgálo, i kerdé Patradí pe dešuštarto čhonéskiro dyvés bel'velié pe Jerihonoskire loščyny.

¹¹ I pe javír dyvés Patradí lyné te xan, so vybarija pe daja phuv, opriesnoki i šuké ziárki (zjorny) dre dová-pac' dyvés.

¹² A manna pirijaciá te perél pe javír dyvés paló dová, syr jone lyné te xan, so barjola pe phuv, i na sys butýr manna Izrailjoskire čhavénde, ne jone xané dre dov-pac' berš dová, so barjola pe Xanaanóskiri phuv.

¹³ O Isúso, sys nádur Jerihonostyr, dykhciá upré i dykhéla, i, ĥáda, sys terdó angíl léste manúš, i dre léskiro vast sys vytyrdyny kurtála. Isúso podgíia ke jov i phendiá léske: “Ci amaró tu, ci vergéndyr amarendyr?”

¹⁴ Jov phendiá: “Nad; me som šeraló pe Ráskire-Devléskire xaladybén (voinstva), akaná javdjom darik”. Isúso pyjá péskire mósa pe phuv, i poklonindiape, i phendiá léske: “So xuláj miro phenéla péskire pisharíske?”

¹⁵ Šeraló pe Ráskire-Devléskiro xaladybén phendiá Isusóske: “Le tyré ĥeritka tyré ĥerendyr, pal-dová so štéto, pe savó tu san terdó, isyn svénto”. Isúso adiáke i kerdiá.