Isúso 4 - Biblija - Pe Baltitko Romani čib (Romanes) 2019

Ripiribnytka Bará

¹ Kiéli saré manušá piriginé pirdál Iordáno, Raj Devél phendiá Isusóske:

² “Len péske manušéndyr dešudúj manušén, pir jekhe manušéste rodycóstyr (čangatyr),

³ i den lénge uphenybén i phenén: “Len péske adathýr, maškirál Iordanos, kaj sys terdé tvardes ĥerá rašángire, dešudúj bará, i lydžán len pésa, i čhuvén len pe rat, kaj javéna te rat'kiren dre daja rat”.

⁴ Isúso khardiá dešudujen manušén, savén vykedyjá Izrailjoskire čhavéndyr, pir jekhe manušéste rodycóstyr;

⁵ i phendiá lénge Isúso: “Džán angíl Ráskire-Devléskiro, tumaré Devléskiro kovčego, maškirál Iordáno, i len odothýr i čhuvén pe péskiro psikó kažno (sváko) manúš pir jekh bar, pir Izrailjoskire čhavéngire-rodycoskiro ginybén,

⁶ sob (kaj) jone te javén tuménde syr znamiénii (ĥiertyká). Kiéli phučena tuméndyr dro (časo), savó javéla tumaré čhavé i phenéna: “Ke so tuménde dalé bará?”

⁷ Tumé phenéna lénge: “Dro ripiribén pal dová, so paní Iordanoskiro rozgijápe angíl Ráskire-Devléskiro zavietóskiro kovčego; kiéli jov gijá pirdál Iordáno, tedy paní Iordanoskiro rozgijápe. Adiáke bará dalé javéna vaš Izrailjoskire čhavénge ripiribnasa pe viéko”.

⁸ I kerdé Izrailjoskire čhavé adiáke, syr priphendiá Isúso: lyné dešudúj bará Iordanostyr, syr rakirdiá Raj Devél Isusóske, pir Izrailjoskiro čhavéngiro-rodycoskiro ginybén, i jandlé len pésa pe rat, i čhudé len odój.

⁹ I javír dešudúj bará čhudiá Isúso maškír Iordáno pe štéto, kaj sys terdé rašángire ĥerá, savé lydžiné zavietóskiro kovčego. Jone isyn odój i ke davá dyvés.

¹⁰ Rašaja, savé lydžiné kovčego, sys terdé maškír Iordáno, paka kerdó sys saró, so Raj Devél priphendiá Isusóske te phenés manušénge, – adiáke, syr rakirdiá Mójza Isusóske; a manušá dalé časosa bahtales piridžanas.

¹¹ Kiéli saré manušá piriginé Iordáno, tedy pirigija i Ráskire-Devléskiro zavietóskiro kovčego, i rašaja angíl manušénde;

¹² I čhavé Ruvimóskire, i čhavé Gadóskire, i paš Manasijáskiro ródyco piriginé angíl Izrailjoskire čhavénde mardytkonenca, syr rakirdiá lénge Mójza.

¹³ Pašýl štardešá tysjoncy mardytkonenca pe bran' piriginé angíl Raste-Devléste pe Jerihonoskire loščyny, sob (kaj) te marénpe.

¹⁴ Dre dová-pac' dyvés barjakirdia Raj Devél Isusós angíl saré Izrailjoskire jakhá, i jačné te darenpe léndyr, syr dardepe Mojzastyr, dre saré léskire džiibnáskire dyvesá.

¹⁵ I phendiá Raj Devél Isusóske:

¹⁶ “Priphen rašange, savé lydžána kovčego dosykaibnása (otkrovienijasa) te vydžán Iordanostyr”.

¹⁷ Isúso priphendiá rašange i phendiá: “Vydžán Iordanostyr”.

¹⁸ I kiéli rašaja, savé lydžiné Ráskire-Devléskiro zavietóskiro kovčego, vyginé Iordanostyr, tedy, syr léngire ĥerá terdiné pe phuv, paní Iordanoskiro sýges pothadyja pir péskiro štéto i gijá, syr tasiá i pe tríto dyvés, vučedýr saré péskire bregendyr.

¹⁹ I vyginé manušá Iordanostyr pe déšto dyvés pervoné-čhonéskiro, i čhudé stáno dre Galgálo, pe vastočno Jerihonoskiri rig.

²⁰ I dešudúj bará, savé lyné jone Iordanostyr, Isúso čhudiá dro Galgálo.

²¹ I phendiá Izrailjoskire čhavénge: “Kiéli sphučena dre pérvo časo čhavé tumaré péskire dadyr: ‘So značynena dalé bará?’”

²² Phenén tumaré čhavénge: “Izrailjo pirigija pirdál saró Iordáno pir šukí phuv.”

²³ Paldavá so Raj Devél, Devél tumaró, vyšut'kirdia paní Iordanoskiro vaš tumenke, paka tumé piriginé les, adiáke-pac' syr Raj Devél, Devél tumaró, kerdiá Lolé morjosa, savó vyšut'kirdia angíl aménde, paka ame pirigijam les,

²⁴ sob (kaj) saré phuvjákire manušá udžindlé, so vast Ráskire Devléskiro isyn zoraló, i sob (kaj) tumé te darén Rástyr-Devléstyr, Devléstyr tumarestyr, dre saré dyvesá.