Isúso 3 - Biblija - Pe Baltitko Romani čib (Romanes) 2019

Izrailjo Piridžala Iordáno

¹ I uštyjá Isúso tasiárles (ránes) pe zlóko, i giné jone Sitimatyr, i javné ke Iordáno, jov i saré Izrailjoskire čhavé, i rat'kirde odój, iščo (inké) na pirigii les.

² Pirdál trin dyvesá, giné poddykhibnaskire pir stáno,

³ I dyné manušénge uphenybén, rakirí: “Kiéli dykhéna Ráskire-Devléskiro, tumaré Devléskiro zavietóskiro kovčego, i rašán i Lievitén, savé lydžána les, tedy i tumé džán péskire štetóstyr i džán pal léste.

⁴ Usajékh javéla štéto maškír tuménde i lénde musinel te javél ke duj tysjoncy kuniá (lokti) mierasa: na poddžan ke jov pašýl, sob (kaj) te džinés tuménge drom, pir savó te džas; pal-dová so tumé na psirdé dalé dromésa ni tasiá, ni pe tríto dyvés”.

⁵ I phendiá Isúso manušénge: “Vysvencynenpe, pal-dová so atasiá keréla Raj Devél maškír tuménde dívy”.

⁶ Rašange phendiá Isúso: “Len zavietóskiro kovčego i džán angíl manušénde”. Rašaja lyné zavietóskiro kovčego, i giné angíl manušénde.

⁷ I Raj Devél phendiá Isusóske: “Dro davá dyvés Me láva te slavinav tut angíl saré Izrailjoskire-čhavéngire jakhá, sob (kaj) jone te džinén so, syr Me i sómas Mojzasa, adiáke Me javáva i túsa.

⁸ A tu de uphenybén rašange, savé lydžána zavietóskiro kovčego, i phen: “Syr zadžána dro Iordanoskiro paní, terdjon dro Iordáno”.

⁹ Isúso phendiá Izrailjoskire čhavénge: “Javén adarík i šunén Ráskire-Devléskire, tumaré Devléskire lavá”.

¹⁰ I phendiá Isúso: “Daléstyr tumé udžinena, so maškír tuménde isyn džidó Raj Devél, Savó tradéla tuméndyr Xananiejen, i Xietiejen, i Jeviejen, i Fierieziejen, i Giergiesiejen, i Amoriejen, i Jevusiejen:

¹¹ ĥáda, saré phuvjákiro Ráskire-Devléskiro zavietóskiro kovčego džála angíl tuménde pir Iordáno.

¹² I len péske dešudujen manušén Izrailjoskire rodycendyr, pir jekhéste manušéste rodycóstyr.

¹³ I syr féni (tóka) rašángire ĥerá, savé lydžána Ráskire-Devléskiro kovčego, saré phuvjákire Xulaskire, terdjona dre Iordanoskiro paní, Iordanoskiro paní xasjola, a paní, savó thadyja uprál paní, dová terdjola vantasa”.

¹⁴ I adiáke, kiéli manušá giné péskire šatrendyr, sob (kaj) te piridžan Iordáno, i rašaja lydžiné zavietóskiro kovčego angíl manušénde:

¹⁵ to tedy jekh manušá, savé lydžána kovčego zaginé dro Iordáno, i gera rašángire, lydžii kovčego obmeknepe dro Iordanoskiro paní (Iordáno vydžála saré péskire bregendyr dre saré dyvesá, kiéli pšienicakiro ukedyiben),

¹⁶ to paní, savó thadéla uprál, terdijá i terdijá vantasa pe drieván baró štéto ke Adamoskiro fóro, savó pašýl Cartano; i savó thadéla dre morjoskiri loščýna, dro Londo mórjo (derjáv), gijá i xasijá.

¹⁷ I manušá piridžanas proti Jerihóno; rašaja, savé lydžiné Ráskire-Devléskiro zavietóskiro kovčego, sys terdé pe šukí phuv maškír Iordáno tvardone ĥerjasa. Saré Izrailjoskire čhavé piriginé pir šukí phuv, paka saré manušá piriginé pirdál Iordáno.