Bìoball air-loidhne

Isúso 23 - Biblija - Pe Baltitko Romani čib (Romanes) 2019

Isúso (Johošuá) Roziačelape Manušénca

¹ Syr progijá but časo paló dová, syr Raj Devél štyliakirdia Izrailjo saré léskire vergéndyr saré rigéndyr, Isúso phurija, zagijá dre phuré beršá.

² I khardiá ke pe Isúso sarén Izrailjoskire čhavén, léngire phurydyren, léngire barydyrén, léngire sendar'jen i léngire dykhibnaskiren, i phendiá lénge: “Me phurijom, zagijom dre phuré beršá.

³ Tumé dykhné saró, so kerdiá Raj Devél, Devél tumaró, angíl tumaró muj sarénca adalé manušénca, pal-dová so Raj Devél, Devél tumaró, Kokoró mardiápe pal tuménde.

⁴ Ĥáda, me roskerdjom (rozdyjom) tuménge pir žriébijo adalé manušén, savé jačnépe dre mištypnáskiri miéra tumaré rodycenge, saré manušá, savén me tradyjom krig, Iordanostyr ke baró mórjo (derjáv), pe khameskiro zagiibén.

⁵ Raj Devél, Devél tumaró, Kokoró tradéla krig len tuméndyr, i zamarela len angíl tuménde, sob (kaj) tumé te doresen (te dolen) dro meknó mištypén (nasliedijo) léngiri phuv, syr rakirdiá tuménge Raj Devél, tumaró Devél.

⁶ Pir saró adiáke-pac' starinenpe te rakhén i kerén saró, so čhindló dre Mojzáskire-Zakonoskiri lylvarí, na otgii léstyr ni pe čačó (pravo), ni pe zérvo (liévo).

⁷ Na javén khetané dalé manušénca, savé jačnépe maškír tuménde, na priripiren léngire devlorengiro lav, na sovlahan lénca, i na dynarinén lénge, i na mangénpe lénge,

⁸ ne prijačen ke Raj Devél, Devél tumaró, syr tumé kerdé ke davá dyvés;

⁹ O Raj Devél tradyjá krig tuméndyr baré i zoralé manušén, i angíl tuménde nikón na vyterdija ke davá dyvés;

¹⁰ iekh tuméndyr protradela tysjonco, pal-dová so Raj Devél, tumaró Devél, Kokoró marelape pal tuménde, syr rakirdiá tuménge.

¹¹ Paldavá kažno mólo pričhuvén te rikirén syr Drógima Ras-Devlés, Devlés tumares.

¹² Kóli tumé otrisjona i prijačena ke manušá, savé jačnépe adalé manušéndyr, savé jačnépe maškirál tuménde, i zadžána dro semencypen lénca, i javéna te psirén ke jone i jone ke tumé,

¹³ to tedy džinén, so tumaró Raj Devél, Devél, na javéla butýr te tradel tuméndyr adalé manušén, ne jone javéna vaš tuménge feliasa i sietkasa, čupniasa vaš tumaré pašvare i phusadytkone xrustosa vaš tumaré jakhá, paka tumé javéna protradyne dolé lačhé phuvjátyr, saví dyjá tuménge Raj Devél, Devél tumaró.

¹⁴ Ĥáda, me akaná džáva sarésa dro drom saré phuvjákiro. A tumé džinén saré tumaré ilésa i saré tumaré diesa, so na jaciápe ivjá ni jekh lav saré lačhé lavéndyr, savé rakirdiá pal tuménde Raj Devél, Devél tumaró; saró kerdiápe čačipnása vaš tuménge, ni jekh lav na jaciápe, savó te na kerélpe.

¹⁵ Ne syr kerdiápe čačipnása pe tuménde kažno (sváko) lačhó lav, savó rakirdiá tuménge Raj Devél, Devél tumaró, adiáke Raj Devél keréla pe tuménde kažno (sváko) xoliamó lav, paka Jov tradéla krig ke xasibén tumen dalé lačhé phuvjátyr, saví dyjá tuménge Raj Devél, Devél tumaró.

¹⁶ Kóli tumé piridžana (keréna bang) Ráskire-Devléskiro, tumaré Devléskiro zavieto, savó Jov čhudiá tuménca, i džána i javéna te dynarinén javire devlorénge i te mangénpe lénge: tedy zahačola pe tuménde Ráskire-Devléskiri xolý, i syg xasjona tumé dalé lačhé phuvjátyr, saví dyjá tuménge Raj Devél”.

« Roimhe

Air adhart »

maintained by the United Bible Societies for the Baltic Romani Mission

British & Foreign Bible Society

Lean sinn:

Ceanglaichean taic

Sanasan