Isúso 21 - Biblija - Pe Baltitko Romani čib (Romanes) 2019

Znašybnaskire fórja

¹ Tén'ci Lieviténgire-strečakire barydyrá javné ke rašáj Jelizáro i ke Isúso, Navinoskiro čhavó, i ke Izrailjoskire-čhavéngire barydyrá pe stréčy,

² i rakirdé lénge dro Silómo, pe Xanaanóskiri phuv, i phendlé: “Raj Devél rakirdiá pir Mojzaste te den aménge fórja vaš džiibén i léngiri phuv vaš amaré kheritkoné murdalénge (skoto)”.

³ I dyné Izrailjoskire čhavé Lieviténge péskire mištypnaskire mieratyr, pir Ráskire-Devléskiro uphenybén, dalé fórja léngire phuvjása.

⁴ Vygijá žriébijo Kaafovoskire kheritkoné rodénge; i jaciápe pir žriébijo rašaskire Aaronóskire čhavénge, Lieviténge, Judáskire rodycóstyr, i Simieonoskire rodycóstyr, i Vieniaminóskire rodycóstyr, dešutrin fórja;

⁵ a javirénge Kaafoskire čhavéndyr: Jefriemóskire kheritkoné rodendyr rodycóstyr, i Danóskire rodycóstyr, i Manasijáskire rodycoskire pašatyr (pašestyr), pir žriébijo, jaciápe deš fórja.

⁶ A Girsonoskire čhavénge – Isaharoskire-kheritkoné rodóstyr, so isyn dre léngiro ródyco i Asiroskire rodycóstyr, i Niefalimoskire rodycóstyr, i Manasijáskire-rodoskire pašatyr dre Vasáno, pir žriébijo, jačné dešutrin fórja;

⁷ Mierarinoskire čhavénge, pir léngire kherítka ródy, Ruvimóskire rodycóstyr, Gadóskire rodycóstyr i Zavulonoskire rodycóstyr dešudúj fórja.

⁸ I otdyné Izrailjoskire čhavé Lieviténge dalé fórja léngire phuvjása, syr rakirdiá Raj Devél pirdál Mojzaste, pir žriébijo.

⁹ Judáskire-čhavéngire rodycóstyr i Simieonoskire-čhavéngire rodycóstyr dyné fórja, savé adáj khardé pir lav:

¹⁰ Aaronóskire čhavénge, Kaafonoskire kheritkoné rodóstyr, Lievijoskire čhavéndyr, adiáke syr žriébijo léngiro sys pérvo,

¹¹ dyné fóro Kiríaf-Arba, Jenakoskiro dad, javirés kharlape Xievróno, pe Judaskiri bérga, paš-foritko phuv sys pašýl láte;

¹² a félda dalé foróskiri i léskire gavá otdyné dre majonko Xalievoske, Jefonijaskire čhavéske.

¹³ I adiáke rašaskire Aaronóskire čhavénge dyné znašybnaskire fórja vaš umaribnar'jenge – Xievróno i léskiri phuv, – Livna i lákiri phuv,

¹⁴ Iatiro i léskiri khetaný phuv, – Ještemo i léskiri khetaný phuv,

¹⁵ Xolono i léskiri khetaný phuv, – Daviro i léskiri khetaný phuv,

¹⁶ Aino i léskiri khetaný phuv, – Juta i lákiri khetaný phuv, – Bief-Šemiešo i léskiri khetaný phuv: jeniá fórja duje dalé rodycendyr;

¹⁷ a Vieniaminóskire rodycóstyr: – Gavaóno i léskiri khetaný phuv, – Gieva i lákiri khetaný phuv,

¹⁸ Anafofo i léskiri khetaný phuv, – Almono i léskiri khetaný phuv: štar fórja.

¹⁹ Saré fórja Aaronóskire čhavénge, rašange, jačnépe dešutrin fórja léngire khetanune phuv'jenca.

²⁰ I Kaafoskire čhavéngire kheritkoné rodycenge, Lieviténge, javire Kaafonoskire čhavéndyr, pir léngiro žriébijo, jačnépe fórja Jefriemóskire rodycóstyr;

²¹ i dyné lénge znašybnaskiro fóro vaš umaribnariske – Sihiemo i léskiri khetaný phuv, pe Jefriemóskiri bérga, – Gieziero i léskiri khetaný phuv,

²² i Kivcaimo i léskiri khetaný phuv, Bief-Orono i léskiri khetaný phuv: štar fórja;

²³ Danóskire rodycóstyr: Jelfiekie i léskiri khetaný phuv, – Giviefono i léskiri khetaný phuv,

²⁴ Aialono i léskiri khetaný phuv, – Gaf-Rimono i léskiri khetaný phuv: štar fórja;

²⁵ pašatyr (pašestyr) Manasijáskire rodycóstyr: – Faanaho i léskiri khetaný phuv, – Gaf-Rimono i léskiri khetaný phuv: duj fórja.

²⁶ Saré fórja léngire phuv'jenca sys deš, so jačnépe javire rodénge Kaafoskire čhavéndyr.

²⁷ A Girsonoskire čhavénge, Lievitoskire rodóstyr, dyné: pašatyr Manasijáskire rodycóstyr znašybnaskiro fóro vaš umaribnariske – Golano dre Vasáno i léskiri khetaný phuv, i Bieještiera i lákiri khetaný phuv: duj fórja;

²⁸ Isaharoskire rodycóstyr: – Kišyono i léskiri khetaný phuv, – Davrafo i léskiri khetaný phuv,

²⁹ Jarmufo i léskiri khetaný phuv, – Jen-Ganimo i léskiri khetaný phuv: štar fórja;

³⁰ Asiroskire rodycóstyr: – Mišalo i léskiri khetaný phuv, Avdono i léskiri phuv,

³¹ Hielkafo i léskiri khetaný phuv, – Riehovo i léskiri khetaný phuv: štar fórja;

³² Niefalimoskire rodycóstyr znašybnaskiro fóro vaš umaribnariske – Kiedieso dre Galiliéia i léskiri khetaný phuv, – Xamof-Doro i léskiri khetaný phuv, – Karfano i léskiri khetaný phuv: trin fórja.

³³ Girsonoskire čhavénge pir léngire kherítka ródy (pliémi), doresné dešutrin fórja léngire phuvjása saré for'jéndyr.

³⁴ Mierariskire-čhavéngire kheritkoné rodóske, palatuné (posliednjone) Lieviténge, dyné: Zavulonoskire rodycóstyr Ioknieamo i léskiri khetaný phuv, Karfo i léskiri khetaný phuv,

³⁵ Dimna i lákiri khetaný phuv, Nagalalo i léskiri khetaný phuv: štar fórja;

³⁶ Ruvimóskire rodycóstyr Biecero i léskiri khetaný phuv, Jaca i léskiri khetaný phuv,

³⁷ Kiediemofo i léskiri khetaný phuv, – Miefaafo i léskiri khetaný phuv: štar fórja;

³⁸ Gadóskire rodycóstyr: znašybnaskire fórja vaš umaribnariske – Ramófo dre Galaádo i léskiri khetaný phuv, – Mahanaimo i léskiri khetaný phuv,

³⁹ Jesievóno i léskiri khetaný phuv, – Iaziero i léskiri khetaný phuv: saré sys štar fórja.

⁴⁰ Saré fórja Mierariskire čhavénge pir léngire kherítka ródy, palatuné (posliednjone) Lievitentire rodycenge, pir žriébijo, jačnépe dešudúj fórja.

⁴¹ Saré Lieviténgire fórja maškír Izrailjoskire-čhavéngiro majenko (vladienijo) sys štardešá ohtó fórja léngire phuvjása khetanune.

⁴² Paše dalé fórja sys: pašýl kažno fóro, pašýl léste sys khetaný phuv – adiáke sys pašýl dalé saré fórja.

⁴³ Adiáke otdyjá Raj Devél Izrailjoske sarí phuv, pal saví sovlahadiá Jov te del léngire dadénge, i jone doresné (dolyne) la dro meknó mištypén (nasliedijo) i lyné te dživén pe láte.

⁴⁴ I dyjá lénge Raj Devél ramánjo (pokojo) saré rigéndyr, syr sovlahadiá léngire dadénge; i nikón léngire saré vergéndyr na vyrikirdia proti lénde; sarén léngire vergén Raj Devél otdyjá dre léngire vastá.

⁴⁵ Na jaciápe nijékh lav, savó na kerdiápe čačipnása saré lačhé lavéndyr, savé Raj Devél rakirdiá Izrailjoskire kheréske; saró kerdiápe ke kónco (ke jagóro) (spolnindiape).