Isúso 13 - Biblija - Pe Baltitko Romani čib (Romanes) 2019

Phuvjá, Save Jačnépe

¹ Kiéli Isúso phurija, i zagijá dre phuré beršá, tedy Raj Devél phendiá léske: “Tu phurijan, zagijan dre phuré beršá, a phuv te les dre meknó mištypén jačélape iščo (inké) drieván but.

² Ĥáda, saví jačélape phuv: sarí provincyja pašýl Filistimo i sarí Giesuroskiri phuv.

³ Sihorostyr, so isyn angíl Jegípto ke miéža Jekronoskiri ke paš-ratítko (sievierno rig), dalé phuvjá ginenape Xanaanskonenca, pe savé isyn pandž xulaja Filistimoskire: Gazsko, Azotsko, Askalonsko, Giefsko, Jekronsko i Avieisko;

⁴ ke paš-dyvés (jugo) sarí Xanaanóskiri phuv Miearatyr Sidonskonatyr ke Afieko, ke Amoriejéngire rigá,

⁵ adiáke-pac' phuv Gievaloskiri i saró Liváno ke khameskiro ŭzgiiben Vaal-Gado, so isyn pašýl Jermonoskiri bérga, ke zagiibén dre Jemafo.

⁶ Sarén bergitkonen manušén Livanostyr ke Misriefof-Maimo, sarén Sidonianen Me vytradava Izrailjoskire-čhavéngire móstyr; rozde la dre mištypnáskiri miéra Izrailjoske, syr Me rakirdjom túke;

⁷ rozde daja phuv dre mištypnáskiri miéra jeniá rodycenge i pašake Manasijáskire rodycóske.

⁸ A ródyco (čang) Ruvimoskiro i Gadoskiro javire pašésa Manasijáskire rodycosa doresné péskiri mištypnáskiri miéra Mojzastyr pal Iordáno ke vastóko, syr dyjá lénge Mójza, Ráskiro-Devléskiro pishári,

⁹ Aroierostyr, savó isyn pe brégo Arnonoskire rekicakiro (lenorjakiro), i fóro, savó isyn maškír sýgno rékica (lenorí) pe dólo, i sarí loščýna Miedieva ke Divono;

¹⁰ adiáke-pac' saré Sigonoskire fórja, Amoriejéngire kralískire, savó sys kralísa ke Jesievóno, ke miéžy Amonitianengire,

¹¹ adiáke-pac' Galaádo i miéža Giesursko i Maahakire, i sarí bérga Jermono i saró Vasáno ke Salha,

¹² saró Vasanoskire-Ogoskiro kralipén, savó sys kralísa dre Astarofa i dre Jedreja. Jov jaciápe jekh Riefaimendyr, savén Mójza domardiá i protradyja.

¹³ Ne čhavé Izrailjoskire na vytradyné manušén Giesuroskiren i Maahijoskiren, i dživéla Giesuro i Maaha maškír Izrailjo ke davá dyvés.

¹⁴ Jekhe rodycóske Lievijoskireske na dyjá mištypnáskiri miéra: svénto janybén Ráskiro-Devléskire, Devléskiro Izrailjoskiro, ake, isyn léskiri mištypnáskiri miéra, syr phendiá léske Raj Devél.

¹⁵ Rodycoske Ruvimóskire čhavénge pir léngire kherá dyjá mištypnáskiri miéra Mójza:

¹⁶ rigasa lengirjasa sys Aroiero, savó isyn pe Arnonoskire-rekicakiro (lenorjakiro) brégo, i fóro, savó isyn maškír rékica (lenorí), i sarí loščýna pašýl Miedieva,

¹⁷ Jesievóno i saré léskire fórja, savé isyn pe loščýna, i Divono, Vamofo-Vaalo i Bief-Vaal-Mieono,

¹⁸ Iaaca (Jaca), Kiediemofo i Miefaafo,

¹⁹ Kiriafaimo, Sivma i Cerief-Šaharo pe bérga Jemieko,

²⁰ Bief-Fiegoro i štéty pašýl sklono Fasgakiro i Bief-Ješymofo,

²¹ i saré fórja pe loščýna, i saró Sigonoskiro kralipén, Amorieiskone-kralískiro, savó sys kralísa dre Jesievóno, savés zamardiá Mójza, adiáke-pac' i Madiamskone šeralen: Jevijas, i Riekiemos, i Curas, i Xuras, i Rievos, Sigonoskire thagar'jen, savé dživdé pe doiá phuv;

²² adiáke-pac' Valaamos, Vieoroskire čhavés, zumakiribnaskires, zamardé Izrailjoskire čhavé kurtalása khetané dre ginybén, kicý jone zamardé.

²³ Rigasa pir miéža Ruvimóskire čhavéngire sys Iordáno. Ĥáda, isyn mištypnáskiri miéra Ruvimóskire čhavengiri, pir léngire kheritkarody, fórja i gavá léngire.

²⁴ Mójza adiáke-pac' dyjá mištypnáskiri miéra Gadóskire rodycóske, čhavénge Gadoskirenge, pir kherítka ródy léngire:

²⁵ rigasa lengirjasa sys Jaziero (Iaziero) i saré Galaadóskire fórja, i paš Amonoskire čhavéngiro pe phuv ke Aroiero, so isyn angíl Rava,

²⁶ i phuvjá Jesievonoskire ke Ramaf-Micfa i Vietonimo, i Mahanaimostyr ke Daviroskire-miežakire rigá,

²⁷ i pe dólo Bief-Garamo i Bief-Nimra i Sokhofo i Cafono, so jaciápe Sigonoskire kralipnastyr, Jesievonoskire kralískiro; léskire rigasa sys Iordáno ke Xinieriefoskiro paní pal Iordáno ke vastóko.

²⁸ Ĥáda, isyn Gadóskire-čhavengiri mištypnáskiri miéra, pir kherítka ródy léngire, fórja i gavá léngire.

²⁹ O Mójza dyjá mištypnáskiri miéra i pašake Manasijáskire rodycóske, savó sys pal paš Manasijáskire-čhavéngire rodycóstyr, pir kherítka ródy léngire;

³⁰ Léngiri rig pir miéža sys: Mahanaimostyr saró Vasáno, saró Ogaskiro kralipén, Vasanoskire-kralískiro, i saré gavá Jairoskire, so isyn dre Vasáno, šovdešá fórja;

³¹ a paš Galaadaskiri i Astarofoskiri i Jedrejakiri, Vasanoskire-Ogoskire-kralipnaskire fórja, dyné Mahiraskire čhavénge, Manasijáskire-čhavéskire i pašake Mahiroskire čhavénge, pir kherítka ródy léngire.

³² Ĥáda, so, Mójza dyjá dre mištypnáskiri miéra pe Moavitoskire loščyny pal Iordáno proti Jerihóno ke vastóko.

³³ Ne Lievijoskire rodycóske Mójza na dyjá mištypnáskiri miéra: Raj Devél, Devél Izrailjoskiro, Kokoró sys léngiri mištypnáskiri miéra, syr Jov rakirdiá lénge.