Isúso 1 - Biblija - Pe Baltitko Romani čib (Romanes) 2019

Devél Vykedyjá Isusós

¹ Kiéli myjá o Mójza (Moisiejo), Ráskire-Devléskiro pishári, Raj Devél phendiá Isusóske (Johošuaske/Ješuaske), Navinoskire čhavéske, Mojzáskire dynaríske:

² “Mójza, pishári (rabo) Miro, myjá; i adiáke uštý, piridža pir davá Iordáno, tu i saré adalé manušá, pe phuv, saví Me dáva lénge, Izrailjoskire čhavénge.

³ Kažno štéto, pe savó terdjona tumaré piré (stópy) ĥerá, Me dáva tuménge, syr Me phendjom Mojzáske:

⁴ saré čhučé phuvjátyr i Livanostyr ke reka (len') bari, reka (len') Jevfrato, sarí Xietiejéngiri phuv; i ke baró mórjo (derjáv), ke khameskiro zagiibén (zapado) javéna tumaré miežakire rigá.

⁵ Nikón na uterdjola angíl túte dre saré tyré džiibnáskire dyvesá; i syr Me sómas Mojzasa, adiáke Me javáva i túsa; Me na otdžava tútyr i na jačkirava tut.

⁶ Jav zoraló i murškanó; pal-dová so tu adalé manušénge piridesa phuv, saví Me sovlahadjom dadénge lengirenge te dav lénge.

⁷ Dykh, jav zoraló i drieván murškanó, i lačhés rakh i ker saró pir Zakóno, savó rakirdiá túke Mójza, o pishári Miro; na otdža léstyr ni pe pravo (čačó), ni pe liévo (zérvo), sob (kaj) te te kerés god'vares dre saré tyré réndy (diély).

⁸ Mek te na otdžal daja Zakonoskiri lylvarí tyré uštendyr; ne sykljov dre láte dyvés i rat, sob (kaj) dre čačipén te kerés ke kónco (ke jagóro) saró, so dre láte čhindló: tedy tu javésa te priles baht dre tyré dromá i javésa te te kerés god'vares.

⁹ Ĥáda, Me rakiráva túke: jav zoraló i murškanó, na dar i na strahadjov; pal-dová so túsa Raj Devél, tyró Devél, isyn usiendie (viezdie), karik tu na džasas”.

Priphenybén te piridžas Iordáno

¹⁰ I dyjá Isúso uphenybén manušéngire dykhibnar'jenge i phendiá:

¹¹ “Prodžan pir stáno, i den uphenybén manušénge, i phenén: ‘Skedén péske xabén vaš drom; pal-dová so, promeki trin dyvesá, tumé džána pal davá Iordáno, sob (kaj) te javes te les phuv, saví Raj Devél, Devél dadéngiro tumarengiro, déla tuménge dro meknó mištypén (nasliedstvo).’”

¹² A rodycóske Ruvimóskire, Gadóskire i pašake (pašeske) Manasijáskire rodycóske Isúso phendiá:

¹³ “Priripiren, so rakirdiá tuménge Mójza, pishári Ráskiro-Devléskiro: Raj Devél, Devél, tumaró štyliakirdia tumen, i dyjá tuménge daja phuv.

¹⁴ Džuvliá tumaré, čhavé tumaré i kherítka murdalá (skoto) tumaró mek te jačénpe pe phuv, saví dyjá tuménge Mójza pal Iordáno; a tumé saré, kon moginéla te marélpe, len mardýtko (oružijo), džán angíl tumaré pšalénde i den vast lénge.

¹⁵ Paka Raj Devél štyliakirela tumaré pšalén, syr i tumen; paka i jone doreséna dro meknó mištypén (nasliedstvo) phuv, saví Raj Devél, Devél tumaró, déla lénge. Tedy risjon dro tumaró meknó mištypén, i javén xulanca pe phuv, saví Mójza, pishári Ráskire-Devléskiro, dyjá tuménge pal Iordáno ke khameskiro ŭzgiiben”.

¹⁶ Jone dro otphenybén Isusóske phendlé: “Saró, so phenésa aménge, kerása, i karik bičhavesa amen, ame džása.

¹⁷ Syr šundiám ame Mojzás, adiáke javása te šunas i tut: jekh Raj Devél, Devél tyró, mek te javél túsa, syr Jov sys Mojzasa.

¹⁸ Kažno, kon javéla proti tyró rakiribén i dro saró na javéla te šunél tyré lavá, so tu javésa léske te rakirés, javéla otdynó meribnáske. Dykh, jav zoraló i murškanó!