Isajos 3 - Biblija - Pe Baltitko Romani čib (Romanes) 2019

So Javéla Jerusalimosa

¹ Ake, Raj Devél, Raj Devél bolybnáskire-jangoléngiro, zalela Jerusalimóstyr i Judejátyr khija i destó, podrikiribén marésa i podrikiribén paniésa.

² Ras i xalades, sendaris i prorokós, manušés, savó isyn čorahano (magiko) i phures,

³ Pandždešengire, šerales i baré ras, i god'varé manušés, manušés, savó keréla šukaripén, i odolés, kon džinéla, syr kuč te rakirél.

⁴ I Me dáva lénge terné-beršengiren dre barydyrende, čhavoré javéna te rossendiakiren (te xulainen) maškír lénde.

⁵ Jekh javéla tasado javiresa dro narodo, kažno javéla zatasado péskire pašatunesa; ternó čhavó ĥazdélape pe phureste, butiarno – pe raste.

⁶ Tén'ci uhtyléla manúš péskire pšalés, dre péskiri čékar' (siemieistvo), i phenéla léske: “Isyn túte uribén, jav amaré rása, mek te javén dalé rosphagirdé kherá telo tyró vast.”

⁷ A jov sovlahala i phenéla: “Naštý te vysastiakirav narodoskire fránsy (dukhá), nane mánde maró i uribén, na kerén man narodoskire xulása”

⁸ Adiáke phadija Jerusalimo, pyjá Juda, pal-dová so léngiri čib i léngire réndy (diély) nane pal Raste-Devléste, jone na vyrikirena Devléskiro baripén.

⁹ Mina léngire moskiri dosykavela pal lénde, pal péskiro grého jone rosphenena saró čačipén, syr Sodomliani, jone na garavenape: bída lénge! Kokoré péske jone janéna bibibaht (fuipén).

¹⁰ Phenén devlytkoné manušéske: kuč léske, jov priléla barjakirdé (plódy) péskire rendostyr.

¹¹ Ne bída isyn nalačhé manušéske: jov priléla xolý pal péskire réndy.

¹² Bijaty tasavena miro narodo, džuvliá xulainena pe léste. Narodo Miro! Tyré xulaja xohade tut, lydžiné krig tut čačuné droméstyr.

Devél Sendiakiréla Péskiro Narodo

¹³ Uštyjá Raj Devél pe séndo, Jov isyn terdó, sob (kaj) te sendiakirél narody.

¹⁴ Devél sendiakirelpe phuredyrenca Péskire narodóstyr, léskire ranca: “Tumé občorde vinagrádniko; dre tumaré kherá rakhelape dová, so tumé čorde čororestyr.

¹⁵ So tumé oblena Miro narodo, tasavena čororen?” – rakiréla Raj Devél, Raj Devél bolybaskiro-jangoléngiro.

¹⁶ I phendiá Raj Devél: “Pal-dová so čhaja Sionoskire isyn phut'kirdé, gazdena vučés péskiro šeró, kharéna ke pe jakhénca, bašavena lénge ĥerengire ukedeibenca.

¹⁷ Občhinela Raj Devél léngire balá pe fiélia makuška (gutup), léla krig léngiro uribén.”

¹⁸ Dro dová dyvés otlela Raj Devél lancore ĥerendyr, čergenorja, čhonore.

¹⁹ Čenia, miriklia, šeritka dykhlore, vastytka, kustyka, dušlorja (šteklycy) kučoné makhibnasa, čorahane priphandybena.

²⁰ Angrustiá pe angušta i angrustiá dre nakh.

²¹ Upratuno uribén, telatuny ídia, dykhle, traminengire / muitka (košel'ki).

²² Gindaly, sane gada i dykhle.

²³ Gudly sung paruvelape pe nakuč sung; šelo javéla syr kustýk, krenca balá parudjona pe nango šeró, buĥle gada – pe šmaty, šukaripén paruvelape pe tavra.

²⁴ Muršá tyré peréna kurtalátyr, zoralé tyré xasjona pe maribén.

²⁵ Javéna te tanginen, javéna te rovén pašýl šeralé-foróskiri pórta (vráty); i javéla joj te bešél pe sarésa čhučí phuv.