Isajos 11 - Biblija - Pe Baltitko Romani čib (Romanes) 2019

Otbaripen Jesiejoskiro

¹ I vybarjola otbaripen Jesiejoskire kornjostyr (rukhestyr); kadavá rukh vybarjakirela neví rand'.

² Javéla čhudo pe léste Ráskire-Devléskiro Dúho (Fáno), dúho, savó déla Devléskiri godý i godypén phuvitko; savó déla podphenyben i zor, dúho pir džinybén i pir svénto džiibén.

³ Ráskire-Devléskire darása pherdjola Jov, i javéla Jov te sendiakirél na adiáke, syr dykhéna Léskire jakhá, na adiáke, syr šunéna Léskire kaná.

⁴ Jov javéla te sendiakirinel čororen čačipnása; kodolengire, kon stradynela pe phuv, réndy čačipnása rossendiakirela; Jov Péskire vuštengire destesa marela phuv, Péskire vuštengire duhósa zamarela grehitkoné manušés.

⁵ I obphandelape Jov čačipnása pir trušula (čriesly), čačipén javéla Léskiro obphandypen upré pir ĥerá.

⁶ Tén'ci ruv javéla te dživél khetané bakroresa, rič javéla paštó khetané buznoresa; guruvoro, ternó ščer (liévo) i ruv khetané javéna; tyknó bijáto javéla len te lydžál.

⁷ Gurumny javéla te čaravelpe ričihasa, čhavoré léngire javéna pašté khetané; ščer (liévo) javéla te xal phus, sýrby guruv.

⁸ Bijáto javéla te khelel (te broinel) pašýl sapeskiri nora, jov protyrdela péskiro vast ke saplyniakiri gniázda (kúfo).

⁹ Na javéna te kerén xolý ci doš pe Mirí svénto bérga, pal-dová so phuv pherdjola Devléskire džinybnasa, syr mórjo (derjáv) pherdjol paniésa.

Miesija i Izrailjoskiro Jačaibén

¹⁰ I javéla dro dová dyvés: ke kornjo (rukh) Isiejoskiro, savó jačéla syr sciago te prikharel narody, obrisjona Najudýtka nácyi, i baripnasa javéla léskiro otkhinyben.

¹¹ Javéla dro dová dyvés adiáke: iščo (inké) protyrdela Raj Devél Péskiro vast, sob (kaj) te riskirél jačaibén Péskire narodóstyr, savó jačélape ke Asuro, dro Jegípto, ke Patroso, ke Xuso, ke Jelamo, ke Sienaaro, ke Jemafo, pe ostrovy, savé isyn pir mórjo (derjáv).

¹² I kharéla ke Pe Najudýtka nácyi i skedéla Jov vytradyné manušén Izrailjostyr, i rosčhurdyne Judén skharela štaré jagorendyr pe phuv.

¹³ Jefriémo pirijačéla te del jakhalo (te zavidynel), saré, kon ĥazdyjápe pe Judaste, javéna xas'kirde; Jefriémo na javéla te del jakhalo Judáske, Juda na gazdelape pre Jefriemoste.

¹⁴ Priurniana pe Filistimlianengire psiké ke zapado (ke pal-panitko rig); občorena sarén čhavén vastokóstyr, protyrdena péskiro vast ke Jedomo ke Moávo; Amonoskire čhavoré javéna léngire butiarnenca.

¹⁵ I vyšut'kirla Raj Devél reka (len'), so isyn pašýl mórjo (derjáv) Jegiptóskiro, protyrdela Jov Péskiro vast ke reka (len') dre zoralý balvál, rozmarla la pe eftá javír rekicy, adiáke, so dre triviki javéna la te piridžan.

¹⁶ Tén'ci vaš jačaibén Léskire narodóstyr javéla baró drom, syr davá sys vaš Izrailjo, kóli jov vydžálas Jegiptóskire phuvjátyr.