Ioil 2 - Biblija - Pe Baltitko Romani čib (Romanes) 2019

Devléskiro Dyvés te Sendiákir

¹ Phurdén dro rógo (dre truba) pe Sióno, i ĥazdén gódla pe svénto Devléskiri bérga; mek saré manušá, kon dživéla pe phuv – te izdran, pal-dová so javéla pašedyr Ráskire-Devléskiro dyvés, ake, jov otkerlape:

² iavéla davá dyvés kaló i tugitko, xmurýtko dyvés ĥenstone kalypnasa (ciamlypnasa), syr óbloki pe zlóko (pe ránko) rozdžanape pale bérgi, adiáke-pac' i javéna manušá, baré i zoralé, savé na sys viekendyr: i kadasavé-pac' butýr na javéna nijékhvar pal lénde maškír manušéngire ródy.

³ Angíl lénde džála jag, so pohala saró, a palál pal lénde xačkiribén, so pekela saró. Angíl lénde phuv isyn sýrby únta (sado) Edemoskiri, a palál pal lénde jačélape čhučakirdy mal (stiep), nisó nikaj na kerélape léndyr.

⁴ Jone javéna vydycjon sýrby graja: i jone javéna te prastan syr uklisté pe grénde-celdar'jende.

⁵ Jone tradéna uklisté pir bergengire fiéli (makuški) ĥrukatosa sýrby maribnytkoné vurdenendyr, sýrby bari jag, saví pharadjola, kiéli pohala phusa, sýrby zoralé manušá, kon isyn skedynó te marélpe.

⁶ Angíl lénde darátyr javéna te bandjon dukhasa manušá, a saré léngire muiá jačéna parné.

⁷ Jone prastána syr zoralypnaskire muršá, i jone piriresena pir vánta syr maribnaskire manušá; kažno (sváko) léndyr džála angíl péskire dromoresa, i jone na zmarenape dro strojo.

⁸ Jone na špulena (pihinena) jekh jekhés, kažno (sváko) léndyr džála dre léngiri kolona. I kiéli jone peréna pe maribnýtka [kop'i-r.s.], jone na dukhavena pes.

⁹ Jone prastána odorík i pale pir fóro; jone ĥazdénape pe vánty prastaindoj: jone zaresena dre kherá, jone zadžána dre kherá pir fenštry syr čor.

¹⁰ Phuv javéla te izdral angíl lénde, i bolybén te riskirelpe kham i čhon pokaljona, i čergeniá pirijačena te ziainen.

¹¹ I phenéla zoralés Raj Devél Péskire zaniása (glosasa) sýrby grumo angíl Léskiro xaladybén: pal-dová so isyn zoralypnaskire Léskire maribnaskire muršá. Dyvés Ráskire-Devléskiro isyn baró i drieván trašano, i kon déla ráda te vyrikirel les?

Devél Kharéla Odolén, Kon Jačnépe te Risjon ke Jov

¹² “Paldavá akaná”, – rakiréla Raj Devél, – “risjon ke Me saré tumaré iléstyr postosa, rovibnasa i tugasa?”

¹³ I riskirén tumaró iló, a na uribén, risjon ke Raj Devél, tumaró Devél, pal-dová so Jov isyn lačhé-diéskiro i but isyn láska Léste. Jov liéntes (nasyges) xoliasóla, i Jov isyn lačhé-ilýtko; i Jov tanginela (žalinela) angíl dová, syr te kerél bibáht.

¹⁴ Kon džinéla, ci Jov požalinela, i mekéla bahtalypén pal Péste, sob (kaj) tumé te janén svénto dyibén givestyr, i thaduno svénto dyibén Ráske-Devléske, tumaré Devléske?

¹⁵ Phurdén zoralés dro rógo (trambura) pe Sióno, poden zvies' (zan) pal svénto posto, kharén te javén pe svénto skedyibén,

¹⁶ keden manušén, keden khetané godephuren (phurydyren), keden bijatén i kolynytkone tyknemasen; mek te džal javrí ternó léskire komoratyr, i terný lákire štubatyr.

¹⁷ Mek rašaja, dynárja Ráskire-Devléskire, te rovén maškír trémo i altárjo, i mek jone te phenén: Požalin Tyré manušén, o Rajo-Dévla, i na de Tyró mištypén te bipatyvakiren, sob (kaj) Najudýtka nácyi te xulainen pe lénde, savé javéna te rakirén: Kaj isyn léngiro Devél?’”

Raj Devél Sykavéla Láska

¹⁸ Tén'ci Raj Devél jačéla te zevlynel pal Léskiri phuv, i Jov sykavéla Péskiro iló pal Léskire manušénde.

¹⁹ O Raj Devél otphenéla i phenéla Péskire manušénge: “Ake, Me bičhaváva tuménge giv, mol (vino), i maslinitko dzet, i tumé javéna čale léndyr; i Me keráva adiáke, sob (kaj) Najudýtka nácyi butýr te na bipatyvaliakiren tumen.

²⁰ I Me durjakirava tuméndyr xaladybén paš-ratitkoné (sieviernone) rigátyr, i Me tradava len krig pe bipanieskiri i čhučí phuv, léngire mujenca te risjon ke vastočno mórjo (derjáv), i léngire dumenca te risjon ke pal-panitko (západno) mórjo (derjáv). Léngiri khan javéla te ĥazdelpe, i džungaló (brydko) khandypen léndyr džála upré, pal-dová so jone kerdé baré dívy.

²¹ Na strahadjov, o phuv, rádynpe i viesielinpe (lošaljov): pal-dová so Raj Devél javéla te kerél baré dívy!

²² Na darén, murdalá feldýtka: čaritka féldy pe čhučí phuv déna péskiri čar, phabalyn déla péskiri phabaj; inžyritka drevy i vinagradýtka drevicy déna múri i pribaripen.

²³ Tumé, čhavoré Sionoskire, radynénpe, i viesielinenpe (lošaljon) Rástyr-Devléstyr, tumaré Devléstyr, sob (kaj) Jov te del lačhó vesnakiro bryšýnd čačipnása, i Jov keréla adiáke, so javéla bryšýnd, syr sys bryšýnd: vesnakiro i pal-lynaskiro (osieniakiro) dro pérvo čhon.

²⁴ Givaobkeribnaskire šurny javéna pherdé givesa, i priesy javéna te občhuvenpe vinagradytkone sokósa (xumésa) i maslinitkone dzetesa.

²⁵ I Me dáva pale tuménge saró dová, so xaja phakitko skočko, kirme, bambuly (žuki) i listengiro kirmo – Miro baró xaladybén, so Me bičhadjom pe tuménde.

²⁶ I tumé javéna te xan, kicý kaména i javéna čale, i tumé javéna te šarén Ras-Devlés, tumaré Devlés, Kon kerdiá divnes tuménca. I Miré manušén butýr na javéna te ladžakiren.

²⁷ I tumé javéna te džinén, so Me som maškír Izrailjo i so Me som Raj Devél, tumaró Devél, i butýr nane javire Devlés. Miré manušén butýr nijékhvar na ladžakirena.

Devél Déla Péskiro Dúho

²⁸ I paló (poslie) davá javéla adiáke, so Me dáva pherdés Miro Dúho kažnoné ločake (plotiake); tumaré čhavé i tumaré čhaja javéna te angilphenen, tumaré phurané manušá javéna te dykhén suné, i tumaré terné manušá javéna te dykhén dykhibena.

²⁹ I až rovno adiáke-pac' Miré pishar'jénge i Miré pisharicenge Me dáva Miro Dúho dre dolé dyvesá.

³⁰ I Me sykaváva dívy pe bolybén i pe phuv, rat i jag i thuvale stýlby.

³¹ Kham parudjola pe kalypén, i čhon parudjola pe rat, – angíl, syr javéla baró i trašano Dyvés Ráskire-Devléskiro.

³² I javéla adiáke dre dolé dyvesá, so, kóli vari-kon javéla te kharel lav Ráskire-Devléskiro, to odová zrakhélape; pal-dová so zrakhibén javéla pe bérga Sióno dro Jerusalimo syr Raj Devél phendiá: i vaš kodolénge, savé jačnépe, kon javéla te kharel Ras-Devlés.