Filipiicenge 4 - Biblija - Pe Baltitko Romani čib (Romanes) 2019

Uphenybená

¹ I adiáke, miré dróga, savén me kamám te dykháv, tumé san mirí rádyma i baht, terdjon zoralés dro péskiro džiibén dre Raste – Devléste.

² Mangáva Jevodija, i Sintihiias te duminen adiáke-pac' dre Raste-Devléste;

³ i me mangáva i tut, miro čačunó mal pir butý, te des vast lénge, adalé džuvlienge, savé lynepe te rosphenén bahtalý zan (zvies') khetané mánca, i Klimientosa i javire miré malenca pir butý, savengire lavá isyn dre Devléskire-džiibnáskiri lylvarí.

⁴ Radynénpe ŭsády (sak) dro tumaró jekhipén Rása-Devlésa: i me nevéstyr phenáva: “Radynénpe.”

⁵ Mek saré manušá te džinén tumaré-iléskiro kovlypen, Raj Devél isyn sarésa pašýl.

⁶ Na phagiren šeró péske ni pal so, ne kažno mólo, kiéli tumé mangénape Devléske, mangénpe parikiribnasa te otčhakiren péskire patierja (molitvy) angíl Devléste;

⁷ i Devléskiro ramánjo (miro), savó isyn vučedýr kažnoné amaré džinybnastyr, javéla te rakhél tumaré ile i godý dro jekhipén Isusósa Xristosósa.

⁸ I ake, pšalále miré, saró, so isyn čačunó, so nane xohanó, so isyn patiaibnýtko, so isyn žužó, so isyn mol te sykavél patýv, so isyn patyvalo, kóli isyn vari-savó lačhipén i vari-savó šaribén, jekh pal davá tumé duminen.

⁹ Saró, so tumé vysyklyne, i so prilyné i šundlé, ci so tumé dykhné dre mánde, dová i kerén, i Devléskiro ramánjo (miro) javéla tuménca.

Parikiriben pal Talano

¹⁰ Me drieván obradyndjompe dro jekhipén Rása-Devlésa, so tumé kakaná lyné te pekenpe (te zabotison) pal mánde, tumé i angledýr peknepe, ne tuménge na sys saštypen (vozmožnost'/vakancyja).

¹¹ Me rakiráva davá na paldová, so mánge vari-so trej; ne paldová so me prisyklyjom te javav rado sareske, so mánde isyn.

¹² Me džináv te dživáv i dro čororipen i dro mištypén, me vysyklyjom sareske i dro saró, te javav čalo i te vyrikirav bokh, te javav dro mištypén i te javav dro nauhtylyben.

¹³ Me saró mogináva te vyrikirav zorjása, saví Xristóso déla mánge.

¹⁴ Ne tumé šukár kerdé, so dyné vast, kiéli mánde sys bída.

¹⁵ Ne i tumé džinéna, Filipiicale, so syr me lyjom te rosphenav bahtalý zan (zvies'), kiéli me vygijom Makiedonijatyr, ni jekh khangirí na sys khetané mánca i na pomogindia mánge lovenca pšaléndyr i na prilyjá man apríč jekhe tuménde;

¹⁶ Tumé adiáke-pac' i dre Fiesalonika na jekh mólo bičhavenas mánge pe džiibén.

¹⁷ Me rakiráva davá na vaš dová, so me rodyjom lové pšaléndyr, ne me kamám, sob (kaj) tumé te kerén dová, so janéla tuménge lačhipén.

¹⁸ Me dorescjom butýr, syr mánge trej, me som rado, kiéli dorescjom Jepafoditostyr saró, so tumé bičhadé mánge sýrby gudló aromato, syr drógo svénto dyibén, savó isyn lačhó Devléske.

¹⁹ Ne mek miro Devél te pherdiakirel saró, so tuménge trej pir Péskiro barvalypén dre sláva pir Isusóste Xristosóste.

²⁰ Mek te javél sláva amaré Devléske i Dadéske pe saré viéki. Amín'.

Pavlískiro Palatunó Piridyiben “Ramánjo”

²¹ Piridén “ramánjo” saré Isusóskire Xristosóskire sventonenge. Adiáke-pac' saró piridena ‘ramánjo’ tuménge saré pšála, savé isyn khetané mánca, piridena “ramanie” tuménge.

²² Piridena “ramánjo” tuménge saré svénta, ne naj butýr khieningoskire (kiesarjoskire) kheréstyr.

²³ Mek bahtalypén amaré Ráskire-Devléskiro, Isusóskire Xristosóskiro te javél sarénca tuménca. Amín'.