Filipiicenge 3 - Biblija - Pe Baltitko Romani čib (Romanes) 2019

Čačunó Patiaibén

¹ Kakaná, pšalále miré, radynénpe dro jekhipén Rása-Devlésa: mánge nane pharó te čhinav tuménge pal davá-pac', ne vaš tuménge davá isyn sykliaiben.

² Rakhénpe manušéndyr, savé keréna bibáht, syr džukela, rakhénpe xoliamé manušéndyr, rakhénpe xohané občhinybnastyr.

³ Pal-dová so občhinyben davá isyn ame tuménca, savé mangénape Devléske Léskire Duhósa, i šarasape dro jekhipén Isusósa Xristosósa, i ame na drieván patiása dre loč (plot'),

⁴ mek i me adiáke-pac' drieván patiáva dre loč; a kóli vari-kon javír kaméla te patial drieván dre loč, tedy mánde isyn butýr saštypen:

⁵ me sómas občhindlo pe ohtóto (bidujéngiro déšto) dyvés, syr bijandyjom, me som Izrailjoskire rodóstyr, i me som Vieniaminóskire rodycóstyr, Judo Judendyr, i me som Farisiejo pir sykliakiribén;

⁶ me sómas baró vérgo i xačkirdé ilésa tradyjom Xristososkiri Khangirí i pir Zakonoskiro čačipén me som bidošakiro;

⁷ ne so vaš mánge sys l'góta, me lyjom te ginav pal xasibén vaš Xristosóske.

⁸ I me ginava saró javír pal xasibén vaš dová, sob (kaj) butedýr te udžinav miré Ras-Devlés, Isusós Xristosós, vaš Léske me saréstyr otphendjompe, me saró ginava pal šuma (smieti), sob (kaj) mánge jekh te javav dro jekhipén Xristosósa;

⁹ i te javav sarésa dro jekhipén Lésa na péskire čačipnása; savó isyn Zakonóstyr, ne čačipnása, savó isyn pir patiaibén dro Xristosóste, čačipnása, savó isyn Devléstyr pir patiaibén,

¹⁰ sob (kaj) te udžinav Les i Léskire otdžidiakiribnaskiri zor, i te javav khetané dre Léskire mén'ki, i te merav, syr Jov.

¹¹ Sob (kaj) féni (tóka) te doresav otdžidiakiriben muléndyr ke džiibén.

Prastaiben ke Res (Celjo)

¹² Ne pal-dová, so me ničý saró davá na dorescjom, i me na som kakaná bidošakiro, ne me pričhuvava zor te lathav, ci na lathava i me dová, pal so i lathiá man Isúso Xristóso vaš Péske.

¹³ Pšalále, me ginava, so kokoró me na lathjom, ne jekh, so me bistrava dová, so jaciápe pale, i me džáva angíl,

¹⁴ me prastava ke celjo, ke naj vučedýr patýv, vaš saví Devél khardiá man pir Xristosóste Isusóste.

¹⁵ I adákicy, pe kicý améndyr isyn bidošakire manušá, lénge adiáke trej te duminen, a kóli tumé pal davá pe javír duminéna, to i davá Devél otčhakirela tuménge.

¹⁶ Ne dová, so ame prilyjam, adiáke i ame javása te duminas i te dživás.

¹⁷ Pšalále, pričhuvén zor te kerén adiáke-pac' syr me, i dykhén pe odolé manušénde, savé keréna dová-pac', syr i tumé duminéna pal aménde;

¹⁸ pal-dová so but manušá, pal savénde me častes rakirdjom tuménge, a kakaná i jasvénca me rakiráva, keréna syr vérgi Xristosóskire meribnáske pe trušúl:

¹⁹ jone isyn terdé pe drom ke xasibén, léngiro devel isyn kužum (želudko), i léngiri sláva isyn dre ladž, jone duminéna jekh pal dalé svetóskire réndy:

²⁰ pal-dová so ame sam džiibnarja themestyr (štetóstyr), savó isyn dro Bolybnáskiro Rajo, odothýr ame užakirasa i amaré Zrakhibnaris Ras-Devlés, Isusós Xristosós,

²¹ Savó paruvela amaré xasibnýtka masá adiáke, so jov javéla te zdžal pe Léskire masá zorjása, savjása Jov čhudiá telé saró angíl Péste.