Filipiicenge 2 - Biblija - Pe Baltitko Romani čib (Romanes) 2019

Hristosóskiro Kandypen i Baripén

¹ I kóli vaš tuménge isyn vari-savó podrikiribén dre Isusóste, kóli isyn vari-saví baht tumaré patyvatyr ke javír manušá, kóli isyn vari-savó iléskiro khetanypen pir Dúho, kóli isyn vari-savó tangipén i žalima,

² tedy pherdiakiren mirí rádyma, sob (kaj) tumé te javén khetané, te javén tuménde jekh dová-pac' vykedyiben, i dživén jekh jekhésa dro lado, i te kerén réndy (diély) pir jekh res (celjo);

³ i te na kerén ničí pir xolý, ci pir péskiro šaribén, a te kandén jekh jekhés, te ginen javire manušén fedýr péstyr;

⁴ na jekh pal péste kažno manúš isyn bangó te dykhél, ne i pal javirende.

⁵ Paldavá trej, sob (kaj) te javél tuménde doiá-pac' godý, saví isyn dre Isusóste Xristosóste;

⁶ Savéste sys andratuno khetanypen Devlésa, ne Jov na gindia Pes te sykavél adasavesa-pac', syr Devél,

⁷ a Jov čhudiá dre rig Péskiri Devlytkima, Jov jaciá syr pishári, savó zdžála pe manušénde, i pir dykhibén – Jov jaciá syr manúš;

⁸ Jov čhudiá Pes teledýr, kandyjá ke meribén, i meribén pe trušúl.

⁹ Paldavá adiáke-pac' i Devél ĥazdyjá Les i dyjá Léske lav vučedýr saré lavéndyr,

¹⁰ sob (kaj) vaš Isusóskiro lav, saró, so isyn pe bolybén, pe phuv, i tel phuv, te bandjol pe čangá,

¹¹ i, sob (kaj) kažno čib te rakirél, so Raj Devél, Isúso Xristóso, isyn Raj Devél vaš Devléskire-Dadéskiri sláva.

Ziainen Syr Dud dro Svéto

¹² I paldavá, miré dróga, syr tumé saró časo, kiéli me som tuménca, ne butýr saréstyr kakaná dro davá časo, kiéli man nane tuménca, pričhuvén zor darása i izdranypnasa te kerén butý vaš péskiro zrakhibén,

¹³ pal-dová so adavá isyn Devél, Savó vykharela dre tuménde vólia i réndy pir Péskiro vykedyiben.

¹⁴ Saró kerén bi xoliamé rakiribnaskiro i bi kunipnaskiro,

¹⁵ sob (kaj) tuménge ni dro so te na javél bang i, sob (kaj) tumé te javén žužé (čysta) Devléskire čhavé i bidošakire maškír manušénde, savé isyn biladžaipnytka i rozmekne, kaj tumé ziainena syr čergeniá dro svéto,

¹⁶ kiéli rakhena džiibnáskiro lav vaš miro šaribén dro Xristosóskiro dyvés, so me na ivjá (na naprásnes) psirdjom i kerdjom butý.

¹⁷ Ne kóli mánge prijavelape te otdav péskiro džiibén syr svénto dyibén pal tumaró patiaibén, to me som rado, i me javáva te radynavpe khetané sarénca tuménca.

¹⁸ I adiáke-pac' tumé radynénpe, i radynénpe mánca.

¹⁹ Ne me radynava pes dre Raste – Devléste Isusóste te bičhavav syg ke tumé Ximas, sob (kaj) i me, syr me udžinava nevipen pal tuménde, te javav adiáke-pac' podrikirdo dro dúho (fáno).

²⁰ Pal-dová so mánde nane nikonés adasaves (nikón adasavó), syr jov isyn, kon saré iléstyr pekelape (dela tugi) pal tumaré réndy (diély).

²¹ Saré pekenape (zabotisona) pal péste, a na pal dová, so trej Isusóske Xristosóske.

²² Ne syr jov (Xima) pes sykadiá, tumé kokoré džinéna, pal-dová so jov sys khetané mánca, syr čhavó dadésa, dynarindiá vaš bahtalý zan (zvies').

²³ Paldavá me kamám te bičhavav les ke tumé, syr me javáva te džináv, so javéla duredýr mánca:

²⁴ ne me drieván patiáva dre Raste-Devléste, so me i kokoró javáva ke tumé;

²⁵ ne me vykedyjom, so trej te bičhavav ke tumé Jepafroditos, pšalés i miré males (drugos) pir butý, savés tumé bičhadé te pekelpe pal mánde;

²⁶ pal-dová so jov drieván mangdiá te dykhél sarén tumen i pharés piridživelas pal dová, so tumé šundlé pal léskiro nasvalypen;

²⁷ a jov drieván sys nasvaló, gin ke meribén, ne Devél potangindia les, i na jekhe les, ne adiáke-pac' i man, sob (kaj) te na javél mánde túga pe túga.

²⁸ I paldavá me sygedýr bičhadjom les ke tumé, sob (kaj), kiéli tumé les nevéstyr dykhéna, te obradynenpe, i me javáva nábut te tuginav.

²⁹ Prilén les paldavá radymása dro jekhipén Rása-Devlésa i kerén patýv adasavé manušénge, syr jov isyn;

³⁰ pal-dová so jov na tangindia péskiro džiibén ke meribén i kerdiá butý bi darákiro vaš Xristosóske, sob (kaj) te del vast mánge, syr tumé na mogindlé davá te kerén.