Filipiicenge 1 - Biblija - Pe Baltitko Romani čib (Romanes) 2019

¹ Pavlístyr i Ximastyr (Timafiejostyr), Isusóskire Xristosóskire pishar'jendyr, ke saré svénta manušá dre Filipy, kon patiála dre Isusóste Xristosóste saré jepiskopenca (khangirjákire barydyrénca) i diakonenca;

² mek te javél bahtalypén i ramánjo (miro) tuménge amaré Devléstyr Dadéstyr i Rástyr-Devléstyr, Isusóstyr Xristosostyr.

Pavlískiro Mangipén (Pátieri) pal Patiaibnaskirende

³ Me parikirava miré Devléske, kiéli kažno mólo ripirava pal tuménde,

⁴ saró časo dro miro mangipén Devléske, baré radymása me mangavape Devléske pal tuménde,

⁵ pal-dová so tumé rosphenenas bahtalý zan (zvies') pervoné dyveséstyr i adiáke-pac' ke adadyvesatuno dyvés,

⁶ me patiáva zoralés dro dová, so Devél, Kon lyjá te kerél dre tuménde davá lačhó réndo, javéla te kerél ke/žýko dová Dyvés, kiéli nevéstyr javéla Isúso Xristóso:

⁷ čačes, davá trej mánge te myslinav pal sarénde tuménde, pal-dová so tumé san dro miro iló i kakaná dro štaribén (bešyben), adiáke-pac', kiéli me zaterdjovava pal sarénde tuménde i dophenava patiaibén pal bahtalý zan (zvies'), sarén tuménde, savé san khetané mánca dro Devléskiro bahtalypén.

⁸ Devél isyn jakhítko mánge, so tumé san drieván dróga mánge saré tumé, Isusóskire Xristosóskire laskasa.

⁹ I me mangavape Devléske pal dová, sob (kaj) tumarí patýv ke javír manušá usá butýr i butýr te barjol pir džinybén i kažno xor ĥalyibén,

¹⁰ sob (kaj) tumé moginénas te rozlen (te rozgaljon), so isyn fedýr vaš tuménge, sob (kaj) tumé te javén žužé i bibangipnaskire dro Dyvés, kiéli Xristóso javéla,

¹¹ sob (kaj) tumaró džiibén te javél pherdó čačipnása, savó isyn pir Isusóste Xristosóste, vaš Devléskiri sláva i šaribén.

Te Dživél vaš Pavliske Značynéla te Javel Syr Xristóso

¹² Pšalále, me kamám, sob (kaj) tumé te džinén, so saró, so kerdiápe mánca, i so pomogindia mánge mištó te rosphenav bahtalý zan,

¹³ adiáke, so jaciá džindló xaladenge dre prietorija i javirénge, so me som beštó dro štaribén pal patiaibén dro Isusóste Xristosóste,

¹⁴ so baredýr paš pšaléndyr pir Raste-Devléste, pir davá, so me som beštó dro štaribén pal patiaibén, jačné zoraledýr dro patiaibén dre amaré Raste-Devléste i te rakirén Devléskiro lav bi darákiro.

¹⁵ Čačó, so vari-savé léndyr rosphenena Xristosóskiro lav pir zevlynypén i pir dová, so vyprobinena jekh jekhés, ne javír rosphenena lav pal Xristosóste patyvása.

¹⁶ Jekh manušá rosphenena Xristosóskiro lav daléstyr, so jone sprobinena zorja dro lav jekh jekhésa, a na iléstyr, jone kaména te kerén, sob (kaj) te javél mánge pharedyr dro štaribén.

¹⁷ Ne javír manušá rosphenena lav pir láska; jone džinéna, so me som čhudo te zaterdjovav pal bahtalý zan.

¹⁸ Ne so isyn daléstyr? Sýrby te na rosphenén Xristosóskiro lav dujemuitkes (pritvornes) ci saré iléstyr, me i daleske som rado i me adiáke-pac' javáva te radynavpe;

¹⁹ pal-dová so me džinóm, so davá javéla mánge dynó vaš zrakhibén pir tumaró mangipén i podrikiribén Isusóskire-Xristosóskire Duhóstyr.

²⁰ Me džinóm zoralés i me patiáva, so mánge ni dro so na javéla ladžavo, a me, syr ĥaredyr, adiáke-pac' i kakaná bi darákiro, javáva te barjakirav patýv Xristosóske miré džiibnasa, ci javáva me džidó, ci muló.

²¹ Paldavá so džiibén vaš mánge isyn Xristóso, i meribén davá isyn butýr džiibén Xristosósa;

²² ne kóli mánge te dživáv dre loč (plot'), dová déla rádyma pal mirí butý, tedy me na džinóm, so fedýr mánge te vykedav.

²³ Man tyrdela i jekh i javír: mánde isyn vykedyiben te roziačavpe džiibnasa i te javav khetané Xristosósa, pal-dová so davá isyn fedýr saréstyr,

²⁴ ne te jačavpe džidó, davá isyn butýr trej vaš tuménge;

²⁵ i me čačes, džinóm davá, so me jačavape i me javáva sarénca tuménca khetané vaš tumarí baht i rádyma dro patiaibén;

²⁶ sob (kaj) tumaró šaribén dro jekhipén Xristosósa te barjol pir mánde, kiéli me javáva javír mólo ke tumé.

²⁷ Dživén gožes adiáke, sob (kaj) te javén lačhé Xristosóskire – bahtalé zaniake (zviesiake), sob (kaj) me, kiéli javáva i dykháva tumen, ci na javáva, ne sob (kaj) te šunav tuménde, so tumé san terdé zoralés dro jekh dúho (fáno), so tumé marenape khetané pal patiaibén dre bahtalý zan (zvies'),

²⁸ i sob (kaj) tumé te na darén ni dro so manušéndyr, savé isyn scial (proti) tuménde, davá vaš lénge isyn dynó sykaibén ke xasibén, a vaš tuménge ke zrakhibén, i davá saró isyn Devléstyr;

²⁹ pal-dová so tuménge sys dynó vaš Xristosóske na so te patián dre Léste, ne i te piridživen mén'ki pal Léste,

³⁰ dasavé-pac' pharipnasa, savó tumé vari-kiéli dykhné dre mánde, i kakaná tumé šunéna pal mánde.