Ester 7 - Biblija - Pe Baltitko Romani čib (Romanes) 2019

Amanoskiro Xasiakiriben

¹ I javné králi Amanosa pe svenkitko xabén ke králica Estéra.

² I phendiá králi Estere i dre davá javír dyvés pe svénko (bankiéto): “So isyn pe iló túte, králica Estéra? Davá javéla kerdó pir lav. I savó isyn mangipén tyró? Mek ke paš kralipén, davá javéla kerdó pir lav.”

³ Tén'ci otphendiá králica Estéra, i phendiá: “Kóli me lathjom tangipén (žalima) dre tyré jakhá, o Králi, i kóli kralíske javéla pir iló, tedy mek te javél darindlo miro džiibén mánge, pir iló miro, i miré manušénge, pir miro mangipén!

⁴ Paldavá so bikindle amen, man i miré manušén, pe tradypen krig, umariben i xasibén. Kóli ame te javas bikindle syr pishárja i pisharicy, to me javáva štyl, usajékh vérgo na riskiréla uriéža kralískiri.”

⁵ I otphendiá králi Artaksiérkso, i phendiá kralicake Esterake: “Kon isyn adasavó, i kaj isyn kodová, savó sys tromalo (murškanó) dre péskiro iló te kerél adiáke?”

⁶ I otphendiá Estéra: “Vérgo i nálačho manúš – kadavá isyn zahalo Amáno!” I Amáno strahadyja angíl kralíste i kralicate.

⁷ I králi uštyjá dre bari xolyn péskiri svenkostyr moliasa, i gijá dre felatiniakiri únta (sado); ne Amáno jaciápe te mangél pal džiibén péskiro králica Estéra, pal-dová so jov dykhciá, so užakiréla les pánda (fuj sud'ba) kralístyr.

⁸ Kiéli králi risijá felatiniakire untatyr pe štéto dro kher, kaj sys svénko, Amáno sys pyi ke čhuibén, pe savó sys Estéra. I phendiá králi: “Až kaméla i te lel pe zor králica dre kher mánde, kiéli me som!” Lav vygijá kralískire uštendyr, i začhakirde muj Amanoske!

⁹ I phendiá Xarbona, jekh jevnuhendyr, savó sys pašýl kralíste: “Ĥáda, i vešyna (kašt) isyn”, savó kerdiá Amáno vaš Mardohiejoske, savó rakirdiá lačhipén vaš kralíske, isyn terdó pašýl kher Amanoskiro, vučipnása dre pandždešá kuniá. I phendiá králi: “Ublaven les pe léste.”

¹⁰ Adiáke jone ublade Amanos pe kašt, savó jov kerdiá Mardohiejoske. Tén'ci bari xolyn kralískiri štylyja.