Ester 4 - Biblija - Pe Baltitko Romani čib (Romanes) 2019

E Estéra Déla Lav te Podel Vast Judénge

¹ Kiéli Mardohiéjo udžindiá saró, so kerdiápe, jov roskustia péskire ídi, i čhudiá pe péste balytko gonó (vriétiščo) i práska; i jov vygijá pe maškirál fóro baré i kirkone jasvénca, i zadyja gódla.

² I dogijá ke kralískire vudará; adiáke syr naštý sys te zadžál dre kralískire vudará dro balytko gonó.

³ Adiáke-pac' i dro kažno provincyja i štéto, karik dogijá kralískiro priphenybén i léskiro uphenybén, sys baró piridživipen Judénge, i posto, i roviben, i gódla; balytko gonó i práska sys čhuibnasa vaš butenge manušénge.

⁴ I javné butiarné Esterakire i lákire jévnuhi, i rosphendlé láke, i drieván zoralés lyjá te piridživel králica. I joj bičhadiá ídia, sob (kaj) Mardohiéjo te urjavel len i te zlel péstyr péskiro balytko gonó; ne jov na prilyjá.

⁵ Tedy Estéra khardiá Gafahos, jekhe kralískire jevnuhendyr, savés králi čhudiá ke joi, i bičhadiá les ke Mardohiéjo te udžinel: so sys dasavo i sóstyr davá gijá?

⁶ I gijá Gafaho ke Mardohiéjo pe foróskiri foruný (plóšča), saví sys angíl kralískire vudará.

⁷ I rosphendiá léske Mardohiéjo pal saró, so lésa kerdiápe, i pal ci but rup, pal savó dyjá lav Amáno te pleskirel dre kralískiri piralý (kazna) pal Judénde, sob (kaj) te muliakirén len.

⁸ I podyja léske manušéngiro piričhinyben priphenybnastyr, savó sys phendló dre Suzy, i pal muliakiriben léngiro, sob (kaj) te sykavél Esterake i te del džinybén láke pal saró; apríč davá jov phendiá láke, sob (kaj) joj te džal ke králi i drieván te mangél les te potanginel (te žalinel) len i, sob (kaj) joj mangdiá les pal péskire manušénde.

⁹ I javdiá Gafaho, i piriphendia Esterake Mardohiejoskire lavá.

¹⁰ I phendiá Estéra Gafahoske, i bičhadiá les te phenél Mardohiejoske:

¹¹ “Saré manušá, savé keréna butý pašýl kralíste i dre kralískire provincyi džinéna, so kažnonéske manušéske, i muršeske i džuvliáke, kon zadžála ke králi dre andratuný gréda, i kon na sys khardo, jekh séndo – meribén; jekh odová, ke kon protyrdela králi péskiro suvnakunó destó, kodová jačélape džidó. A me na som khardy ke králi, ĥáda, až trijánda dyvesá.”

¹² I piriphendle Mardohiejoske Esterakire lavá.

¹³ I phendiá Mardohiéjo dre otphenybén Esterake: “Na dumin, so tu jekhdžiny zrakhesape dro kralískiro kher saré Judendyr.

¹⁴ Kóli tu dro davá časo javésa štyl (promolčinesa), tedy vast (pomošč) i zrakhibén javéna vaš Judénge javire štetóstyr, a tu i tyré – dadéskiro kher, xasjona. I kon džinéla, ci na vaš davá časo tu i dorescian (dolyjan) kralískiri patýv?”

¹⁵ I phendiá Estéra adiáke dro otphenybén Mardohiejoske:

¹⁶ “Džá, skéde saré Judén, savé isyn dre Suzy, i postinen vaš mánge, i na xan i na p'jen trin dyvesá, ni dyvesé, ni ratý, i me péskire butiarnenca adiáke-pac' javáva te postinav, i korigedýr (pozže) me džáva ke králi, xoc' davá isyn proti zakóno, i kóli trej javéla te xasjovav, to xasjovava.”

¹⁷ I gijá Mardohiéjo, i kerdiá, syr priphendiá léske Estéra.