Ester 3 - Biblija - Pe Baltitko Romani čib (Romanes) 2019

Amáno Pridumindia te Muliakirén Judén

¹ Paló (poslie) davá Artaksiérkso králi dyjá baró pravo Amanoske, Amadafoskire čhavéske, Vugejaninoske, i ĥazdyjá les, i čhudiá léskiro štéto, kaj jov sys beštó, vučedýr saréndyr thagar'jéndyr, savé sys léste.

² I saré, kon dynarindiá pašýl kralíste, savé sys pašýl kralískire vudará, klonindepe i pyné mósa pe phuv angíl Amanoste; pal-dová so adiáke priphendiá králi. A Mardohiéjo na klonindiape i na pyjá mósa pe phuv.

³ I rakirdé manušá, savé dynarindlé pašýl kralíste, savé sys pašýl kralískire vudará Mardohiejoske: “Sóske tu phagiresa kralískiro uphenybén?”

⁴ I syr jone léske rakirdé kažno dyvés, a jov na kandyjá len, tedy jone rosphendlé Amanoske, sob (kaj) te dykhén, ci vyterdjola dre péskiro lav Mardohiéjo, pal-dová so jov phendiá lénge, so jov sys Judo.

⁵ I kiéli dykhciá Amáno, so Mardohiéjo na kloninelaspe, i na perelas mósa pe phuv angíl léste, tedy pherdija xoliása Amáno.

⁶ I sykadyjá léske, so nisó na mol te čhuvél vast pe jekhéste Mardohiejoste; ne adiáke, syr phendlé léske, savéndyr manušéndyr Mardohiéjo, tedy zadumindia Amáno te muliakirén Judén, savé sys dre saró Artaksierksoskiro kralipén, syr Mardohiejoskire manušén.

⁷ Dro pérvo čhon, savó isyn čhon Nisano, dre dešuiavir berš kralískiro Artaksierksoskiro čhurdyné žriébijo, angíl Amanoskiro muj dyvés dro dyvés i čhonestyr dro čhon, i pyjá žriébijo pe dešuiavir čhon, pe čhon Adaro.

⁸ I phendiá Amáno Artaksierksoske, kralíske: ‘Isyn jekh manušá, savé rosčhurdyne i vybičhade maškír manušénde pir saré tyré-kralískire provincyi; i léngire zakóny na zdžanape saré manušytkoné zakonenca, i kralískire zakóny jone na spolninena; i kralíske naštý adiáke te jačkires len.

⁹ Kóli kralíske javéla pir iló, tedy mek te javél začhindló syr priphenybén te muliakirén len; i deš bará talánty rup me pleskirava dre manušéngire vastá, kon kerdiá daja butý, sob (kaj) te lydžán dre kralískiri piralý (kazna).’

¹⁰ Tedy králi zlyjá péskiri angrusty čergenorjasa péskire vastéstyr i otdyjá la Amanoske, Amadafoskire čhavéske, Vugejaninoske, savó sys vérgo Judénge.

¹¹ I phendiá králi Amanoske: “Me dáva túke davá rup i manušén; i ker lénca adiáke, syr túke zdelape.”

¹² I sys khardé kralískire lylá-čhinybnaskire dro pérvo čhon, pe léskiro dešutrito dyvés, i sys čhindló, syr phendiá Amáno, kralískire barydyrénge dre provincyi theméskire i barydyrénge pe kažno provincyja i thagar'jénge kažnoné manušéngire; dre kažno provincyja lákire čhinybnasa i saré manušénge pe léngiri čib. Saró sys čhindló Artaksierksoskire kralískire lavéstyr i sphandlo kralískire angrustiasa čergenorjasa.

¹³ I bičhadé sys lylá pir manušénde dre saré kralískire provincyi, sob (kaj) te zamarén, (te xasiakirén) i te muliakirén sarén Judén, tyknen i phuranen, bijatén i džuvlién, dro jékh dyvés, pe dešutrito dyvés dešuiavir-čhonéskiro, dro Adaroskiri čhon, i barvalypén léngiro te zalen.

¹⁴ Piričhinyben dalé uphenybnastyr sys te otdén dre kažno provincyja syr zakóno, savó sys phendló (ob'iavindlo) vaš saré manušénge, sob (kaj) jone te javén skedyné ke dová dyvés.

¹⁵ Manušá, savén bičhadé, sýges giné kralískire priphenybnasa, i uphenybén sys phendló i dre kralískiri felatin Suzy. I králi i Amáno sys bešté i piné, a fóro Suzy sys dre baró piridživipen.