Ester 2 - Biblija - Pe Baltitko Romani čib (Romanes) 2019

Estéra Jačélape Kralicasa

¹ Paló (poslie) davá, kiéli štylyja Artaksierksoskire-kralískiri xolý, jov priripirdia pal Astiniate i paldová, so joj kerdiá, i so sys priphendlo pal láte.

² I phendlé terné-beršengire (otroki), savé dynarindlé pašýl kralíste: mek te rodén kučes kralíske ternen gožonen patyvalé džuvlién.

³ I mek králi te čhuvél dykhibnaskiren dre saré péskire kralipnaskire-provincyjakire štéty, savé skedéna sarén terné patyvalé džuvlién, savé sys goža mósa, ke kralískiri felatin [šerutno-r.s.] Suzy, dre džuvliéngiro kher tel Giegajoskire – kralískire-jevnuhoskiro rakhiben, savó sys džuvliéngiro rakhibnari, i mek lénge te vyden makhlunia vaš šukaripén.

⁴ I terný patyvalý džuvlý, saví javéla lačhí kralískire jakhenge, mek te javél kralicasa zamiést Astiniate. I lačhó sys davá lav dre kralískire jakhá, i jov adiáke i kerdiá.

⁵ Sys dre kralískiri felatin dre Suzy, jekh Judo; lav léskiro sys Mardohiéjo, Naroskiro čhavó, Šymaskiro čhavó, Kišoskiro čhavó, Vieniaminóskire rodóstyr.

⁶ Jov sys Jerusalimóstyr vybičhado khetané javire plienonenca, savén vylydžijá o Jehonija, Judejákiro králi, savén vybičhadia Navuhodonosóro, Vavilonóskiro králi.

⁷ I barjakirdia jov Gadassa, – joj isyn adiáke-pac' Estéra, – léskire-kakeskiri čhaj, adiáke syr láte na sys ni da, ni dadés. Terný daja Judyca sys šukár stemása (stanósa) i šukár mósa. I kiéli myné lákire daj i dad, Mardohiéjo lyjá la ke pe zamiést čhate.

⁸ Kiéli sys phendló sarénge kralískiro priphenybén i léskiro uphenybén, i kiéli sys skedyné but terné patyvalé džuvliá ke kralískiri felatin dre Suzy tel Giegajoskiro rakhiben, to tedy sys lyny i Estéra dro kralískiro kher tel Giegajoskiro rakhiben, kon sys džuvliéngiro rakhibnari.

⁹ I jaciá lačhí léskire jakhenge adáia terný patyvalý džuvlý, i jaciá léste láska ke joi, i jov sygniakirdia te del láke makhlunia vaš gožyma i saró, so sys uphendló (naznačyndlo) pe lákiri paš, i te čhuvén ke joj eftá patyvalé džuvlién, savé sys mol te javén pašýl láte, kralískire kheréstyr; i pirilydžija la i lákire patyvalé džuvlién dre naj fededýr džuvliéngire-kheréskiri paš.

¹⁰ Na rakirdiá Estéra ni pal péskire manušénde, ni pal péskiro ródo; pal-dová so Mardohiéjo dyjá láke uphenybén, sob (kaj) joj te na rakirél davá.

¹¹ I kažno dyvés Mardohiéjo javélas ke džuvliéngire-kheréskiri gréda (dvóro), sob (kaj) te udžinel pal Esterakiro sastypen, i pal-dová, so kerélape lása.

¹² Kiéli javdiá časo kažnoné terné patyvalé džuvliáke te zadžál ke králi Artaksiérkso, paló dová, syr dre proginé (nakhle) dešudúj čhoná saró kerdó sys pe láte, so trej džuvliénge, – pal-dová so adákicy dyvesá treindiá te prodžas léngire makhlunienca: šov čhoná mirrovone ksilesa i šov čhoná khandypnenca i javirenca džuvlitkone makhluniénca.

¹³ Tedy adiáke prigotovindly terný patyvalý džuvlý te zadžál ke králi. Sob (kaj) joj te na potriebinel, láke dénas saró vaš vygiiben džuvlitkone kheréstyr dro kralískiro kher.

¹⁴ Bel'vielié joj zadžalas, i pe zlóko (ránko) risjolas dre javír džuvlitko kher, tel Šaazgazokiro rakhiben, kralískire jevnuhoskiro, kon sys kralískire-džuvliéngiro rakhibnari; i butýr na vydžála ke králi, kóli féni králi zamangela la, i joj kharélaspe pir lav.

¹⁵ Kiéli podgíia časo Esterakiro, Abihailoskire čhake, Mardohiejoskire-kakeskire, savó lyjá la ke pe zamiést čhate – te džal ke králi, tedy joj na mangdiá ničý, apríč dová, pal so phendiá láke Giegajo, kralískiro jevnuho, džuvliéngiro rakhibnari. I lathiá Estéra lačhó otlydžaiben ke pe dre saré manušéngire jakhá, kon dykhciá la.

¹⁶ I lyné Estéra ke králi Artaksiérkso, dre léskiro kralískiro kher, dre déšto čhon, dre čhon Tiebiéfo, dro eftáto (bitrinéngiro déšto) berš léskire kralipnaskiro.

¹⁷ I pokamdia králi Estéra butýr péskire saré džuvliéndyr, i joj iaciá drógo léske i lačhó otlydžaiben butýr saréndyr terné patyvalé džuvliéndyr; i jov čhudiá kralítko koróna pe lákiro šeró, i kerdiá la kralicasa pe Astiniakiro štéto.

¹⁸ I kerdiá králi baró svénko vaš sarénge péskire theméskire range i vaš manušénge, savé dynarindlé pašýl léste, – svénko vaš Esterake, i kerdiá l'góta provincyiénge i rozdyja dáry kralitkone nažalimatyr.

¹⁹ I, kiéli javír mólo skedyné sys terné patyvalé džuvliá, i Mardohiéjo sys beštó pašýl kralískire vudará.

²⁰ Estéra usá na rakirdiá pal péskiro ródo i pal péskire manušénde, syr priphendiá láke Mardohiéjo; a lav Mardohiejoskiro Estéra kerélas ke kónco (ke jagóro) i akaná adiáke-pac', syr i tedy, kiéli joj barija ke kak.

²¹ Dre dová časo, syr Mardohiéjo sys beštó pašýl kralískire vudará, duj kralískire jevnuhi, Gavafa [Bigtano-ju.o.] i Fara [Terešo-ju.o.], savé rakhne progo, rosholiasyne i zadumindle te ĥazdén vast pe Artaksierksoste kralíste.

²² To udžindiá pal dová réndo, Mardohiéjo, i piridyja Esterake kralicake, a Estéra phendiá kralíske Mardohiejoskire lavéstyr.

²³ Réndo sys rozĥalyno i lathno čačunesa, i len dujén, ublade pe kašt. I sys začhindló pal Mardohiejoskiro lačhó réndo dre lylvarí kralíste angíl léste.