Ереме́ё 3 - Biblija - Pe Baltitko Romani čib (Romanes) 2019

Jeriemiéjo Kharéla Izrailjo te Risjol ke Devél

¹ Iščo rakiréna jone: ‘Kóli manúš rozdžalape péskire romniása, i joj džála krig léstyr i joj iačéla romný javire manušéske, ci saštý, sob (kaj) joj te risjol pale ke jov? Ci na javéla kodoia phuv xor magirdy? Ne tumé, manušá Izrailjostyr, kamlé but javire devloré sýrby nalačhi džuvlý, ne saroiekh (usajékh) risjov ke Me’, – rakiréla Raj Devél.

² Ĥazden péskire jakhá pe vučé bimanušengire štéty i Dykhén akaná, kaj tumé sykade patýv javire devlorénge. Paše dromá tumé sánas bešté vaš lénge, sýrby o Arabo pe čhučí phuv, i tumé magirdé péskiri phuv nalačhé kamibnasa i fuipnasa.

³ Paldavá paningá sys pririkirde, i na sys vesnakire bryšynda i tuménde čikata jačné sýrby nalačhé džuvliáte, ne tumé na prilyné ladžakiriben.

⁴ Ci javéna tumé te kharén jasvénca Man: ‘Miro Dádo! Tu san Lydžaibnaskiro amaré ternypnastyr?

⁵ Ci jačesape Tu xoliamó pe saré viéki? Ci javésa Tu te rikires xolý ke sámo kónco (ke jagóro)?’ Dykhén, tumé phendlé davá, ne tumé kerdé čoripén adákicy but, kicý tumé féni mogindlé!”

Jeriemiéjo isyn Bičhadó Javír Mólo ke Manušá Izrailjostyr, Save Durine Devléstyr

⁶ I phendiá Raj Devél mánge, Jeriemiejoske, dre dyvesá, kiéli Iosija (Josija) sys králi: ‘Ci dykhcián tu, so kerdiá čhaj Izrailjoskiri, saví otgijá patiaibnastyr? Lákire manušá psirenas tel kažno vučí bérga, i kažno zeleno drévo i jone sykade patýv ke javír devloré sýrby nalačhi džuvlý.

⁷ I paló dová, syr Izrailjo kerdiá saró davá, Me phendjom: “Risjov ke Me.” Ne jov na risijá. I léskiri zdyibnaskiri phen Judéia dykhciá davá.

⁸ I dykhciá Judéia davá, kiéli pir pričyna, so Izrailjo otgijá patiaibnastyr i léskire manušá usá sykavenas kamiben ke javír devloré sýrby nalačhi džuvlý, to Me bičhadjom Izrailjoskire manušén krig Péstyr, i dyjom léske rozginybnytko lyl (foda), ne léskiri zdyibnaskiri phen Judéia na darandyja, ne joj gijá i joj adiáke-pac' sykadiá patýv ke javír devloré.

⁹ I sys adiáke, so Judéia magirdia phuv péskire nahratone kamibnasa, i joj délas patýv barenge i kaštenge.

¹⁰ Ne usajékh (saroiekh) Izrailjoskiri zdyibnaskiri phen Judéia na risijá ke Me saré iléstyr, ne joj féni pefromi (pemisni), – phendiá Raj Devél.

¹¹ Tén'ci phendiá Raj Devél mánge, Jeriemiejoske: “Izrailie, savó otgijá patiaibnastyr, sykadiá pes čačunedyr, syr zdyibnaskiri Judéia.

¹² Džá i rosphen (obzaniakir) sarénge dalé lavá odój ke paš-ratiakiri (šylaly) rig, kon isyn odój dro pliéno, i phen: ‘Risjov, otgiibnytko Izrailie!’ -rakiréla Raj Devél, – ‘Me na javáva te dykháv xoliames pe túte, pal-dová so Me som lačhé-diéskiro i Me na javáva te rikirav xolý pe saré viéki.

¹³ Féni (jekh) priĥaljov péskiri bang, so tu phagirdian Ráskire-Devléskiro, Devléskiro Zakóno, i tu čhurdesape jekhe rigátyr pe javír angíl čužoné devlorende, tel kažno zeleno drévo, i so tu na šundián Mirí zan’, – phendiá Raj Devél.

¹⁴ “Risjon tumé, otgiibnytka čhavé”, – phendiá Raj Devél, – pal-dová so Me som tumaró Xulái. Me láva jekhés kažnoné foróstyr, i dujén kažnoné semjostyr (rodóstyr), i Me janáva tumen pe Sióno.

¹⁵ I Me dáva tuménge čhupnar'jen [pastyrien-r.s.] pir Miro iló, savé javéna te čaliakiren tumen džinybnasa, i ĥalyibnasa.

¹⁶ I javéla adiáke: kiéli tuménde bijandjona but-but manušá i javéna butýr i butýr manušá tuménde, dro dolé dyvesá, – phendiá Raj Devél, – tuménde na javéna te rakirén butýr: kovčego (mohtó) Devléskire Zavietosa.’ Manušénde na javéla davá pe godý: jone na javéna ni te ripirén davá, ni te javén ke kovčego ni na podkeren les.

¹⁷ Dro davá časo (cýro) jone javéna te kharén Jerusalimo Ráskire-Devléskiro tronosa, i saré manušéngire nácyi kedenape khetané ke Jerusalimo i butýr na javéna te psirén nakandunes pir léngire pharé ile.

¹⁸ Dre dolé dyvesá manušá Judejákire kheréstyr javéna ke Izrailjoskiro kher, i jone javéna khetané te džán phuvjátyr, so isyn pe paš-ratítko (šylaly) rig ke phuv, so Me dyjom tumaré dadénge syr meknó mištypén.

¹⁹ I phendjom Me, Raj Devél: ‘Syr Me prilava tumen syr Miré čhavorén i Me dáva tuménge lačhí phuv, naj šukaredyr mištypén saré manušéngire nacyiéndyr!’ – i iščo (inké) Me phendjom: ‘Tedy tumé javéna te kharén Man ‘Amaró Dad’, i tumé na otdžana krig Mándyr.

²⁰ Ne tu, Izrailie, sýrby napatiaibnytko romný, saví durjola péskire romestyr, adiáke-pac' tyré manušá mekné Man!

²¹ Šunén zaniá pe vučé štéty, syr rovena i mangénape Izrailjoskire čhavoré, pal-dová so jone piririskirde péskire dromá dro džiibén, i jone bistyrde Ras-Devlés, péskire Devlés.

²² Risjon tumé, otgiibnytka čhavorale, i Me sastiakirava tumaró načačipén. I jone phendlé: ‘Ake, ame džása ke Tu, pal-dová so Tu san, Raj Devél, amaró Dad.’

²³ Čačipén, so ame ivjá patiandyjam, so bérgicy vyrakhena amen, so buté-bergengiri zor podela vast aménge: čačipnása Raj Devél, amaró Devél féni vyrakhela amen.

²⁴ Pal-dová so ladž, so kerdé amaré dadá ternypnastyr, pohalas léngire-bakréngire stády i tedy, léngire čhavén i čhajén.

²⁵ Ame sam pašté dre amarí ladž, i amaró biladžaipén čhakirdia amen: pal-dová so ame kerdiám grého proti Raste-Devléste, amaré Devléste: ame i amaré dadá, amaré tyrnypnastyr ke adadyvés, i ame na kandyjam Ráskire-Devléskiri, amaré-Devléskiri zan!”