Čysly 9 - Biblija - Pe Baltitko Romani čib (Romanes) 2019

Javír Patradí

¹ I phendiá Raj Devél Mojzáske pe Sinajoskiri čhučí phuv, pe javír berš, syr Judy vyginé Jegiptóskire phuvjátyr, dro pérvo čhon:

² “Mek Izrailjoskire čhavé te kerén Patradí dro uphendló vaš láke časo:

³ pe dešuštarto dyvés dalé-čhonéskiro dyvés, bel'velié, te kerén la dro uphendló vaš láke časo, pir saré uphenybená i pir saré lákire zakóny kerén la.”

⁴ I phendiá Mójza Izrailjoskire čhavénge, sob (kaj) jone te kerén Patradí.

⁵ I kerdé jone Patradí dro pérvo čhon, pe dešuštarto čhonéskiro dyvés bel'velié, pe Sinajoskiri čhučí phuv: dre saró, syr priphendiá Raj Devél Mojzáske, adiáke i kerdé Izrailjoskire čhavé.

⁶ Sys manušá, savé sys nažužé, savé čiladepe ke manušýtka trúpy, i na mogindlé te kerén Patradí dre dová dyvés; i javné jone ke Mójza i Aaróno dre dová dyvés,

⁷ i phendlé léske odolé manušá: “Ame sam nažužé, so čiladiampe ke manušýtka trúpy; vaš so aménge te na das dová, sob (kaj) ame te janas svénto dyibén Ráske-Devléske dre uphendló časo maškír Izrailjoskire čhavénde?”

⁸ I phendiá lénge Mójza: “Terdjon, me šunava, so phenéla pal tuménde Raj Devél.”

⁹ I phendiá Raj Devél Mojzáske, rakirí:

¹⁰ “Phen Izrailjoskire čhavénge: kóli kon tuméndyr ci tumaré rodóstyr javéla nažužo, so čilavelaspe ke trúpo, ci javéla dro baró drom, tedy i jov isyn bangó te kerél Devléskiri Patradí;

¹¹ pe dešuštarto dyvés javire-čhonéskiro, bel'velié, mek dasavé te kerén la, i opriesnokenca i kirkone čar'jenca mek te xan la;

¹² i mek te na jačkiren látyr nisó ke ránko (ke zlóko), i lákire kokalý na phagiren; mek te kerén la pir saré uphenybená pal Patradí;

¹³ a kon isyn žužó i nane dro drom, i na keréla Patradí, – xasjola dová di péskire manušéndyr, pal-dová so jov na jandiá svénto dyibén Ráske-Devléske dre péskiro časo: lydžála pe péste grého odová manúš,

¹⁴ kóli tuménde javéla te dživél manúš javire rigátyr, tedy i jov isyn bangó te kerél Ráskire-Devléskiri Patradí: pir uphenybén pal Patradí i pir lákiro Zakóno jov isyn bangó te kerél la; jekh uphenybén mek te javél tuménde i vaš manušénge javire rigátyr, i vaš péskire manušéske.

Obloko i Jag

¹⁵ Dro dová dyvés, kiéli sys čhudý uprál šátra (skínija), óbloko učhakirdiá šátra dosykaibnása (otkrovienijasa), i bel'veliatyr pe šátra sys bicialy sýrby jag (savó sys syr stýlbo) ke sámo ránko (ke zlóko).

¹⁶ Adiáke sys usady (sak): óbloko učhakirelas la dyvesé, i dasavo-pac' syr jagitko stýlbo sys ratý.

¹⁷ I kiéli óbloko šatratyr ĥazdelaspe, tedy Izrailjoskire čhavé džánas dro drom, i pe štéto, kaj óbloko terdjolas, odój terdjonas Izrailjoskire čhavé stanósa (taborosa).

¹⁸ Pir Ráskire-Devléskiro uphenybén Izrailjoskire čhavé džánas dro drom, i pir Ráskire-Devléskiro uphenybén terdjonas: dro saró dová časo, kiéli óbloko terdó sys pe šátra, i jone sys terdé;

¹⁹ i kóli óbloko ĥará (dlúges) sys terdó pe šátra, tedy i Izrailjoskire čhavé kerdé pir davá Ráskiro-Devléskiro uphenybén i na džánas;

²⁰ iavír mólo óbloko nábut dyvesá sys pe šátra: jone pir Ráskire-Devléskiro uphenybén terdjonas, i pir Ráskire-Devléskiro uphenybén džánas dro drom.

²¹ Javír mólo óbloko sys terdó féni (tóka) bel'veliatyr ke ránko (ke zlóko), i rankostyr ĥazdelaspe óbloko, tedy i jone džánas; cji, kóli dyvesé i ratý sys terdó óbloko, to kiéli ĥazdelaspe, to i jone tedy džánas;

²² cji, kóli duj dyvesá, ci čhon, ci vari-kicý dyvesá sys terdó óbloko pe šátra, to tedy i Izrailjoskire čhavé sys terdé i na džánas dro drom; a kiéli jov ĥazdelaspe, tedy i jone džánas.

²³ Pir Ráskire-Devléskiro uphenybén jone terdjonas, i pir Ráskire-Devléskiro uphenybén jone džánas dro drom: jone kerdé pir Ráskire-Devléskiro uphenybén, savó Jov dyjá pir Mojzaste.